21 shlokas
- 1
तद् आहुर् अशान्तम् इव वा एतत्स्तोत्रं यत्स्तोत्रियेण नानुप्रतिपद्यन्ते
tad āhur aśāntam iva vā etatstotraṃ yatstotriyeṇa nānupratipadyante
- 2
केनैषां स्तोत्रियप्रतिपदो ऽनितं भवतीति
kenaiṣāṃ stotriyapratipado 'nitaṃ bhavatīti
- 3
स ब्रूयाद्वाग्वा अनुष्टुप्
sa brūyādvāgvā anuṣṭup
- 4
वाच्य् उ वै सर्वाणि छन्दांसि
vācy u vai sarvāṇi chandāṃsi
- 5
यद् आग्नेयम् ऐन्द्रं पवमानं तेनैषां स्तोत्रियप्रतिपदो ऽनितं भवति
yad āgneyam aindraṃ pavamānaṃ tenaiṣāṃ stotriyapratipado 'nitaṃ bhavati
- 6
जया ह वै नामैते स्तोमा यत्पवमानाः
jayā ha vai nāmaite stomā yatpavamānāḥ
- 7
पवमानैर्वै देवा असुरान्पराञ्च एव जयन्त आयन्
pavamānairvai devā asurānparāñca eva jayanta āyan
- 8
तद्यत्पवमानाः पराञ्च एव भवन्ति यथा पराङ् एव जयन्न् इयात्तादृक्तत्
tadyatpavamānāḥ parāñca eva bhavanti yathā parāṅ eva jayann iyāttādṛktat
- 9
तान्यद् अनुष्टुभानुप्रतिपद्यन्ते वाग्वा अनुष्टुब्वाग् उ वै वाचयित्री वाचा वा आह प्रेहि जयाभिक्राम मापक्रमीर् इति
tānyad anuṣṭubhānupratipadyante vāgvā anuṣṭubvāg u vai vācayitrī vācā vā āha prehi jayābhikrāma māpakramīr iti
- 10
स यथा वाचा ब्रूयात्प्रेहि जयाभिक्राम मापक्रमीर् इति तादृक्तत्
sa yathā vācā brūyātprehi jayābhikrāma māpakramīr iti tādṛktat
- 11
देवा वै पवमानाः
devā vai pavamānāḥ
- 12
तानि देवानां स्तोत्राणि
tāni devānāṃ stotrāṇi
- 13
तानि देवा अन्वायत्ताः
tāni devā anvāyattāḥ
- 14
प्रजाः पृष्ठोक्थानि
prajāḥ pṛṣṭhokthāni
- 15
तानि प्रजानां स्तोत्राणि
tāni prajānāṃ stotrāṇi
- 16
तानि प्रजा अन्वायत्ताः
tāni prajā anvāyattāḥ
- 17
तद्यत्पवमानैः पराचीनैर् एव स्तुवते तस्मात्पराञ्चो देवाः
tadyatpavamānaiḥ parācīnair eva stuvate tasmātparāñco devāḥ
- 18
पराङ् आदित्य एति पराङ्चन्द्रमाः पराञ्चि नक्षत्राणि पराङ् अग्निर्दहन्न् एति
parāṅ āditya eti parāṅcandramāḥ parāñci nakṣatrāṇi parāṅ agnirdahann eti
- 19
अथ यस्मात्पृष्ठोक्थैः पराचीनैश्चार्वाचीनैश्च स्तुवते तस्माद् उ पराचीश्चार्वाचीश्च प्रजाः
atha yasmātpṛṣṭhokthaiḥ parācīnaiścārvācīnaiśca stuvate tasmād u parācīścārvācīśca prajāḥ
- 20
पराञ्चः प्रातः प्रेरते ते सायं समावर्तन्ते
parāñcaḥ prātaḥ prerate te sāyaṃ samāvartante
- 21
पराग्रेतः सिक्तं तद् अर्वाक्प्रजायते
parāgretaḥ siktaṃ tad arvākprajāyate

