19 shlokas
- 1
तं प्रतिब्रूयात्
taṃ pratibrūyāt
- 2
विचक्षणाद् ऋतवो रेत आभृतम् अर्धमास्यं प्रसुतात्पित्र्यावत इति
vicakṣaṇād ṛtavo reta ābhṛtam ardhamāsyaṃ prasutātpitryāvata iti
- 3
यद् अदो विचक्षणं सोमं राजानं जुह्वति तत्तत्
yad ado vicakṣaṇaṃ somaṃ rājānaṃ juhvati tattat
- 4
तं मा पुंसि कर्तर्य् एरयध्वम् इति
taṃ mā puṃsi kartary erayadhvam iti
- 5
पुंसि ह्य् एनम् एतत्कर्तर्य् एरयन्ते
puṃsi hy enam etatkartary erayante
- 6
पुंसः कर्तुर्मातर्य् आसिषिक्तेति
puṃsaḥ karturmātary āsiṣikteti
- 7
मातरि ह्य् एनम् आसिञ्चति
mātari hy enam āsiñcati
- 8
स उपजायोपजायमानस्त्रयोदशेन द्वादशोपमास इति
sa upajāyopajāyamānastrayodaśena dvādaśopamāsa iti
- 9
एष त्रयोदशो य एष तपति
eṣa trayodaśo ya eṣa tapati
- 10
सं तद्विदे प्रति तद्विदे ऽहं तं मर्तवो ऽमृत आनयध्वं द्वादशत्रयोदशेन पित्रा तया मात्रा तया श्रद्धया तेनान्नाद्येन तेन सत्येन अहर्मे पिता रात्रिर्माता सत्यम् अस्मि तं मर्तवो ऽमृत आनयध्वम् इति
saṃ tadvide prati tadvide 'haṃ taṃ martavo 'mṛta ānayadhvaṃ dvādaśatrayodaśena pitrā tayā mātrā tayā śraddhayā tenānnādyena tena satyena aharme pitā rātrirmātā satyam asmi taṃ martavo 'mṛta ānayadhvam iti
- 11
तं हर्तव आनयन्ते
taṃ hartava ānayante
- 12
यथा विद्वान्विद्वांसं यथा जानञ्जानन्तम् एवं हैनम् ऋतव आनयन्ते
yathā vidvānvidvāṃsaṃ yathā jānañjānantam evaṃ hainam ṛtava ānayante
- 13
तं हात्यर्जयन्ते
taṃ hātyarjayante
- 14
स हैष न मनुष्यो य एवं वेद
sa haiṣa na manuṣyo ya evaṃ veda
- 15
देवानां ह वै स एको य एवंवित्
devānāṃ ha vai sa eko ya evaṃvit
- 16
तं ह वै मनोजवसः पितरश्च पितामहाश्च प्रत्यागच्छन्ति ततः किं न आहार्षीर् इति
taṃ ha vai manojavasaḥ pitaraśca pitāmahāśca pratyāgacchanti tataḥ kiṃ na āhārṣīr iti
- 17
तान्प्रतिब्रूयाद्यत्किं च पुण्यम् अकरं तद्युष्माकम् इति
tānpratibrūyādyatkiṃ ca puṇyam akaraṃ tadyuṣmākam iti
- 18
तस्य पुत्रा दायम् उपयन्ति पितरः साधुकृत्यां द्विषन्तः पापकृत्याम्
tasya putrā dāyam upayanti pitaraḥ sādhukṛtyāṃ dviṣantaḥ pāpakṛtyām
- 19
स एवम् एतत्त्रेधा विभज्यैतस्य सलोकताम् अप्येति य एष तपति
sa evam etattredhā vibhajyaitasya salokatām apyeti ya eṣa tapati

