20 shlokas
- 1
तद् उ ह स्माहोपजीवः खाडायनो ऽहम् एवैतं त्रिवृतं वज्रं प्रत्यक्षं वेद
tad u ha smāhopajīvaḥ khāḍāyano 'ham evaitaṃ trivṛtaṃ vajraṃ pratyakṣaṃ veda
- 2
तस्माद्यम् अहं द्वेष्मि यो मां द्वेष्टि ताव् उभौ श्वश्श्व एव पापीयांसौ भवत इति
tasmādyam ahaṃ dveṣmi yo māṃ dveṣṭi tāv ubhau śvaśśva eva pāpīyāṃsau bhavata iti
- 3
अग्निर्वा अस्य लोकस्य वज्रो वायुर् अन्तरिक्षस्यादित्यो दिवः
agnirvā asya lokasya vajro vāyur antarikṣasyādityo divaḥ
- 4
तद् इदम् अध्यात्मम्
tad idam adhyātmam
- 5
यो ऽग्निर्वाग् एव सा
yo 'gnirvāg eva sā
- 6
यो वायुः प्राण एव स
yo vāyuḥ prāṇa eva sa
- 7
य आदित्यश्चक्षुर् एव तत्
ya ādityaścakṣur eva tat
- 8
तस्माद्यद् अहं द्विषन्तम् अभिवदामि यद् अभिप्राणिमि यद् अभिवीक्षे वज्रम् एवाहं तस्मै तं प्रहरामि
tasmādyad ahaṃ dviṣantam abhivadāmi yad abhiprāṇimi yad abhivīkṣe vajram evāhaṃ tasmai taṃ praharāmi
- 9
तस्य न श्रेम्णो ऽल्पिकेव चनाशास्ति
tasya na śremṇo 'lpikeva canāśāsti
- 10
एता उ एवैनं देवता धूर्वन्ति य एवं विद्वांसं धूर्वतीति
etā u evainaṃ devatā dhūrvanti ya evaṃ vidvāṃsaṃ dhūrvatīti
- 11
अथ ह स्माह श्वेतकेतुर् आरुणेयो यथाश्वस्य श्वेतस्य कृष्णकर्णस्येत्थादानीतस्य रूपं स्याद् एवम् एवाहम् एतस्य स्तोमस्य रूपं वेद तावद्दृशेन्यं तावद्वपुषेण्यम्
atha ha smāha śvetaketur āruṇeyo yathāśvasya śvetasya kṛṣṇakarṇasyetthādānītasya rūpaṃ syād evam evāham etasya stomasya rūpaṃ veda tāvaddṛśenyaṃ tāvadvapuṣeṇyam
- 12
तस्मान्मां य एव पूर्वाह्णे दिदृक्षन्ते ते ऽपराह्णे दिदृक्षन्ते
tasmānmāṃ ya eva pūrvāhṇe didṛkṣante te 'parāhṇe didṛkṣante
- 13
नैव सुदृशेन्यम् इव सन्तं नाह कदाचन चक्षुष्मन्तं पर्येमीति
naiva sudṛśenyam iva santaṃ nāha kadācana cakṣuṣmantaṃ paryemīti
- 14
तद् उ होवाच शाट्यायनिः को ऽश्वश्श्वेतः किम् एकम् इति
tad u hovāca śāṭyāyaniḥ ko 'śvaśśvetaḥ kim ekam iti
- 15
यथैवास्याग्ने रूपं यथा त्विषिर्यथास्य वायोर्यथामुष्यादित्यस्यैवम् एवैतस्य स्तोमस्य रूपम् एवं त्विषिः
yathaivāsyāgne rūpaṃ yathā tviṣiryathāsya vāyoryathāmuṣyādityasyaivam evaitasya stomasya rūpam evaṃ tviṣiḥ
- 16
तद् एवैतत्प्रजा अभिपरिवार्य दिदृक्षमाणास्तिष्ठन्ति
tad evaitatprajā abhiparivārya didṛkṣamāṇāstiṣṭhanti
- 17
तस्माद्बहिष्पवमाने ये च विजानन्ति ये च न ते सर्वे ऽनीशाना अभिपरिवार्य दिदृक्षमाणास्तिष्ठन्तीति
tasmādbahiṣpavamāne ye ca vijānanti ye ca na te sarve 'nīśānā abhiparivārya didṛkṣamāṇāstiṣṭhantīti
- 18
अथो हैता यश एवाप्य् अन्यासां देवतानाम्
atho haitā yaśa evāpy anyāsāṃ devatānām
- 19
तासाम् एतद् इन्द्रियं वीर्यं रसस्तेजः संभृतं यद् एता बहिष्पवमान्यः
tāsām etad indriyaṃ vīryaṃ rasastejaḥ saṃbhṛtaṃ yad etā bahiṣpavamānyaḥ
- 20
स य एवम् एतद्देवतानाम् इन्द्रियं वीर्यं रसं तेजः संभृतं वेदेन्द्रियावान् एव वीर्यवान्यशस्वी त्विषिमान्भवति
sa ya evam etaddevatānām indriyaṃ vīryaṃ rasaṃ tejaḥ saṃbhṛtaṃ vedendriyāvān eva vīryavānyaśasvī tviṣimānbhavati

