16 shlokas
- 1
क्रूरम् इव वा एतद्यज्ञस्य कुर्वन्ति यद्धविर्धाने ग्रावभिः सोमं राजानं हत्वा बहिष्पवमानं सर्पन्ति
krūram iva vā etadyajñasya kurvanti yaddhavirdhāne grāvabhiḥ somaṃ rājānaṃ hatvā bahiṣpavamānaṃ sarpanti
- 2
का तस्य प्रायश्चित्तिर् इत्य् आहुः
kā tasya prāyaścittir ity āhuḥ
- 3
अप उपस्पृशेयुः
apa upaspṛśeyuḥ
- 4
आपो वै सर्वस्य शान्तिः
āpo vai sarvasya śāntiḥ
- 5
अद्भिर् एवैनं तच्छमयन्ति
adbhir evainaṃ tacchamayanti
- 6
वाग्वा एतस्मा अग्रे ऽध्वने ऽतन्द्रायत यद्बहिष्पवमानं सर्पन्ति
vāgvā etasmā agre 'dhvane 'tandrāyata yadbahiṣpavamānaṃ sarpanti
- 7
तां प्रजापतिर् अब्रवीद्भागधेयं ते करोम्य् अथ सर्पेति
tāṃ prajāpatir abravīdbhāgadheyaṃ te karomy atha sarpeti
- 8
बहिष्पवमानं सर्प्स्यन्होमं जुहुयाज्जुष्टो वाचो भूयासं जुष्टो वाचस्पत्युर्देवि वाग्यत्ते वाचो मधुमत्तस्मिन्मा धाः स्वाहा सरस्वत्या इति
bahiṣpavamānaṃ sarpsyanhomaṃ juhuyājjuṣṭo vāco bhūyāsaṃ juṣṭo vācaspatyurdevi vāgyatte vāco madhumattasminmā dhāḥ svāhā sarasvatyā iti
- 9
यत्सरस्वत्यै स्वाहेति जुहुयाद्वाचं सरस्वतीं स्वाहाकारेण परिगृह्णीयात्
yatsarasvatyai svāheti juhuyādvācaṃ sarasvatīṃ svāhākāreṇa parigṛhṇīyāt
- 10
अथ यत्स्वाहा सरस्वत्या इति जुहोति वाचं तद् उत्तरां स्वाहाकाराद्दधाति
atha yatsvāhā sarasvatyā iti juhoti vācaṃ tad uttarāṃ svāhākārāddadhāti
- 11
तयापरिगृहीतया यज्ञं तनुते
tayāparigṛhītayā yajñaṃ tanute
- 12
वाचा ह्य् ऊर्ध्वो यज्ञस्तायते
vācā hy ūrdhvo yajñastāyate
- 13
वेकुरा नामासि प्रेषिता दिव्याय कर्मणे शिवा नः सुयमा भव सत्याशीर्यजमानाय स्वाहेति वा जुहुयात्
vekurā nāmāsi preṣitā divyāya karmaṇe śivā naḥ suyamā bhava satyāśīryajamānāya svāheti vā juhuyāt
- 14
वाग्वै वेकुरा
vāgvai vekurā
- 15
ब्रह्म वाक्
brahma vāk
- 16
ब्रह्मण एव तद्वाचे होमं हुत्वा सर्पति नार्तिम् आर्च्छति
brahmaṇa eva tadvāce homaṃ hutvā sarpati nārtim ārcchati

