16 shlokas
- 1
उपसृजाग्निहोत्रीम् इत्य् आह
upasṛjāgnihotrīm ity āha
- 2
उपसृष्टे द्यावापृथिवी रुद्रा उपगृह्णन्ति वसूनां दुग्धं भूतकृतः स्थ निरूढं जन्यं भयम् इत्य् अङ्गारान्निरूहति
upasṛṣṭe dyāvāpṛthivī rudrā upagṛhṇanti vasūnāṃ dugdhaṃ bhūtakṛtaḥ stha nirūḍhaṃ janyaṃ bhayam ity aṅgārānnirūhati
- 3
अथाधिश्रयति वैश्वानरस्याधिश्रितम् अस्य् अग्निस्ते तेजो मा प्रतिधाक्षीत्सत्याय त्वेति
athādhiśrayati vaiśvānarasyādhiśritam asy agniste tejo mā pratidhākṣītsatyāya tveti
- 4
अथावद्योतयति सं ज्योतिषा ज्योतिर् इति
athāvadyotayati saṃ jyotiṣā jyotir iti
- 5
अथापः प्रत्यानयति यस्ते अप्सु रसः प्रविष्टस्तेन संपृच्यस्वेति
athāpaḥ pratyānayati yaste apsu rasaḥ praviṣṭastena saṃpṛcyasveti
- 6
स यद् एवास्य तत्र दिशो ग्रसन्ते तद् एवास्य तत्समन्वानयत्य् अन्तरितं रक्षो ऽन्तरिता अरातय इति
sa yad evāsya tatra diśo grasante tad evāsya tatsamanvānayaty antaritaṃ rakṣo 'ntaritā arātaya iti
- 7
त्रिः पर्यग्नि करोति
triḥ paryagni karoti
- 8
अथोद्वासयति दिवं दृंहान्तरिक्षं दृंह पृथिवीं दृंह प्रजां पशूञ्जुह्वतो मे दृंहेति
athodvāsayati divaṃ dṛṃhāntarikṣaṃ dṛṃha pṛthivīṃ dṛṃha prajāṃ paśūñjuhvato me dṛṃheti
- 9
भूतकृतः स्थ प्रत्यूढं जन्यं भयम् इत्य् अङ्गारान्प्रत्यूहति
bhūtakṛtaḥ stha pratyūḍhaṃ janyaṃ bhayam ity aṅgārānpratyūhati
- 10
अथ स्रुवं च स्रुचं चादाय निष्टपति प्रत्युष्टं रक्षः प्रत्युष्टा अरातय इति
atha sruvaṃ ca srucaṃ cādāya niṣṭapati pratyuṣṭaṃ rakṣaḥ pratyuṣṭā arātaya iti
- 11
अथ स्रुचं संमार्ष्टि सजूर्देवेभ्यः सायंयावभ्य इति सायम्
atha srucaṃ saṃmārṣṭi sajūrdevebhyaḥ sāyaṃyāvabhya iti sāyam
- 12
सजूर्देवेभ्यः प्रातर्यावभ्य इति प्रातः
sajūrdevebhyaḥ prātaryāvabhya iti prātaḥ
- 13
सुवर्णां त्वा सुवर्णमयीं हिरण्ययष्टिर् अस्य् अमृतपलाशा स्रोतो यज्ञानाम् इति
suvarṇāṃ tvā suvarṇamayīṃ hiraṇyayaṣṭir asy amṛtapalāśā sroto yajñānām iti
- 14
स्रोतो हैव स यज्ञानां भवति
sroto haiva sa yajñānāṃ bhavati
- 15
अथाहोन्नेष्यामीति
athāhonneṣyāmīti
- 16
ॐ माम् अहं स्वर्गं लोकम् अभीति ब्रूयात्
oṃ mām ahaṃ svargaṃ lokam abhīti brūyāt

