18 shlokas
- 1
देवासुराः संयत्ता ज्योङ्न व्यजयन्त
devāsurāḥ saṃyattā jyoṅna vyajayanta
- 2
तेष्व् असुरेष्व् इदं सर्वम् आसीत्
teṣv asureṣv idaṃ sarvam āsīt
- 3
अथैकम् एवाक्षरं देवेष्व् आसीद्वाग् एव
athaikam evākṣaraṃ deveṣv āsīdvāg eva
- 4
सो ऽग्निर् अब्रवीद् अहं वा इदम् अदर्शं यथेदं जेष्यामीति
so 'gnir abravīd ahaṃ vā idam adarśaṃ yathedaṃ jeṣyāmīti
- 5
तद्वै ब्रूहीत्य् अब्रुवन्
tadvai brūhīty abruvan
- 6
सो ऽब्रवीद् अक्षरेणैवेदं सर्वं संनिधाय धुराधुरम् आसजामेति
so 'bravīd akṣareṇaivedaṃ sarvaṃ saṃnidhāya dhurādhuram āsajāmeti
- 7
यद् अब्रवीद् अक्षरेणैवेदं सर्वं संनिधाय धुराधुरम् आसजामेति तद् आज्यधुराम् आज्यधूस्त्वम्
yad abravīd akṣareṇaivedaṃ sarvaṃ saṃnidhāya dhurādhuram āsajāmeti tad ājyadhurām ājyadhūstvam
- 8
ते ऽक्षरेणैवेदं सर्वं संनिधाय धुराधुरम् आसजन्
te 'kṣareṇaivedaṃ sarvaṃ saṃnidhāya dhurādhuram āsajan
- 9
तान् अजयन्
tān ajayan
- 10
जयति स्पर्धां द्विषन्तं भ्रातृव्यं य एवं वेद
jayati spardhāṃ dviṣantaṃ bhrātṛvyaṃ ya evaṃ veda
- 11
स यदीतरा धुरो विगायेद्व्य् एवाज्यधुरो गायेत्
sa yadītarā dhuro vigāyedvy evājyadhuro gāyet
- 12
स यो हैवं विद्वान्संग्रामयोः संनिहितयोर्ब्रूयाद् अक्षरेण त्वा संनिदधामीति परं ग्रामं स हैव तं ग्रामं जयति
sa yo haivaṃ vidvānsaṃgrāmayoḥ saṃnihitayorbrūyād akṣareṇa tvā saṃnidadhāmīti paraṃ grāmaṃ sa haiva taṃ grāmaṃ jayati
- 13
अथो यस्मिन्न् एवंविद्ग्रामे भवति स उ हैव तं ग्रामं जयति
atho yasminn evaṃvidgrāme bhavati sa u haiva taṃ grāmaṃ jayati
- 14
ते देवा अब्रुवन्वीमानि भजामहा इति
te devā abruvanvīmāni bhajāmahā iti
- 15
तेषां विभागे न समपादयन्
teṣāṃ vibhāge na samapādayan
- 16
ते ऽब्रुवन्न् आजिम् एषाम् अयाम गिरिं काष्ठां कृत्वेति
te 'bruvann ājim eṣām ayāma giriṃ kāṣṭhāṃ kṛtveti
- 17
यद् अब्रुवन्न् आजिम् एषाम् अयामेति तद् एषां द्वितीयम् आज्यत्वम्
yad abruvann ājim eṣām ayāmeti tad eṣāṃ dvitīyam ājyatvam
- 18
यद् उ गिरिं काष्ठाम् अकुर्वंस्तस्माद् असौ गिरिः काष्ठो नाम
yad u giriṃ kāṣṭhām akurvaṃstasmād asau giriḥ kāṣṭho nāma

