15 shlokas
- 1
प्रजापतिः प्रजाभ्य ऊर्जं व्यभजत्
prajāpatiḥ prajābhya ūrjaṃ vyabhajat
- 2
तद् उदुम्बरः समभवत्
tad udumbaraḥ samabhavat
- 3
प्रजापतिर् उद्गाता
prajāpatir udgātā
- 4
प्राजापत्य उदुम्बरः
prājāpatya udumbaraḥ
- 5
वृणते ऽन्यान् ऋत्विजो नोद्गातारम्
vṛṇate 'nyān ṛtvijo nodgātāram
- 6
यद् उद्गाता प्रथमेन कर्मणौदुम्बरीम् अन्वारभते स्वयैव तद्देवतयात्मानम् आर्त्विज्याय वृणीते
yad udgātā prathamena karmaṇaudumbarīm anvārabhate svayaiva taddevatayātmānam ārtvijyāya vṛṇīte
- 7
ताम् अन्वारभत आयोष्ट्वा सदने सादयाम्य् अवतश्छायायां समुद्रस्य हृदये नमः समुद्राय नमः समुद्रस्य चक्षसे मा मा योनोर्वां हासीर् इति
tām anvārabhata āyoṣṭvā sadane sādayāmy avataśchāyāyāṃ samudrasya hṛdaye namaḥ samudrāya namaḥ samudrasya cakṣase mā mā yonorvāṃ hāsīr iti
- 8
यद् आह आयोष्ट्वा सदने सादयामीति यज्ञो वा आयुस्तस्यैतत्सदनं क्रियते
yad āha āyoṣṭvā sadane sādayāmīti yajño vā āyustasyaitatsadanaṃ kriyate
- 9
अवतश्छायायाम् इति यज्ञो वा अवतिस्तस्यैषा छाया क्रियते यत्सदः
avataśchāyāyām iti yajño vā avatistasyaiṣā chāyā kriyate yatsadaḥ
- 10
समुद्रस्य हृदय इति मध्यतो वा आत्मनो हृदयं तस्मान्मध्यतः सदस औदुम्बरी मीयते
samudrasya hṛdaya iti madhyato vā ātmano hṛdayaṃ tasmānmadhyataḥ sadasa audumbarī mīyate
- 11
नमः समुद्राय नमः समुद्रस्य चक्षस इति वाग्वै समुद्रो मनः समुद्रस्य चक्ष एताभ्याम् एवैतद्देवताभ्यां नमस्करोत्य् आर्त्विज्यं करिष्यन्
namaḥ samudrāya namaḥ samudrasya cakṣasa iti vāgvai samudro manaḥ samudrasya cakṣa etābhyām evaitaddevatābhyāṃ namaskaroty ārtvijyaṃ kariṣyan
- 12
मा मा योनोर्वां हासीर् इति साम वै योनोर्वां साम्न एवैतन्नमस्करोत्य् आर्त्विज्यं करिष्यन्
mā mā yonorvāṃ hāsīr iti sāma vai yonorvāṃ sāmna evaitannamaskaroty ārtvijyaṃ kariṣyan
- 13
नैनं सामावहते
nainaṃ sāmāvahate
- 14
न सामन्याम् आर्तिम् आर्च्छति न साम्नो हीयते य एवं विद्वान्साम्ने नमस्करोति
na sāmanyām ārtim ārcchati na sāmno hīyate ya evaṃ vidvānsāmne namaskaroti
- 15
य एवैनम् उपवदति स आर्तिम् आर्च्छति
ya evainam upavadati sa ārtim ārcchati

