18 shlokas
- 1
अथैतानि कपालानि संचित्य यत्राहवनीयस्य भस्मोद्धृतं स्यात्तद् उपनिकिरेत्
athaitāni kapālāni saṃcitya yatrāhavanīyasya bhasmoddhṛtaṃ syāttad upanikiret
- 2
एतद् एवात्र कर्म
etad evātra karma
- 3
अथो खल्व् आहुर्यत्प्राच उद्द्रुतस्य स्कन्देत्किं तत्र कर्म का प्रायश्चित्तिर् इति
atho khalv āhuryatprāca uddrutasya skandetkiṃ tatra karma kā prāyaścittir iti
- 4
यद् एव तत्र स्रुचि परिशिष्टं स्यात्तेन जुहुयात्
yad eva tatra sruci pariśiṣṭaṃ syāttena juhuyāt
- 5
यद्य् उ नीची स्रुक्स्याद् अपि वा भिद्येत किं तत्र कर्म का प्रायश्चित्तिर् इति
yady u nīcī sruksyād api vā bhidyeta kiṃ tatra karma kā prāyaścittir iti
- 6
तस्योक्तः प्रत्यभिमर्शः
tasyoktaḥ pratyabhimarśaḥ
- 7
तद् उ हैके तत एव प्रत्येत्योन्नयन्ति
tad u haike tata eva pratyetyonnayanti
- 8
तद् उ तथा न कुर्यात्
tad u tathā na kuryāt
- 9
यो ह तत्र ब्रूयाद्यद् अनेनाग्निहोत्रेणाचिकीर्षीन्न्यवृतत्तस्मान्नास्येदं स्वर्ग्यम् इव भविष्यतीति तथा हैव स्यात्
yo ha tatra brūyādyad anenāgnihotreṇācikīrṣīnnyavṛtattasmānnāsyedaṃ svargyam iva bhaviṣyatīti tathā haiva syāt
- 10
इत्थम् एव कुर्यात्
ittham eva kuryāt
- 11
यत्रैव स्कन्देत्तद् उपविशेत्
yatraiva skandettad upaviśet
- 12
अथास्मिन्स्थालीम् आहरेयुः स्रुवं च स्रुचं च निर्णिज्य
athāsminsthālīm āhareyuḥ sruvaṃ ca srucaṃ ca nirṇijya
- 13
तद् अद एवास्योन्नेष्यामीत्य् उक्तं भवति
tad ada evāsyonneṣyāmīty uktaṃ bhavati
- 14
अथ यथोन्नीतम् उन्नीय समिधम् आदाय प्राक्प्रेयात्
atha yathonnītam unnīya samidham ādāya prākpreyāt
- 15
तद्यथा प्रत्युत्थायामित्रान्पचेद् एवम् एवैतद् अवृत्तिं पाप्मानम् अपहत्याहुतिं प्राप्नोति
tadyathā pratyutthāyāmitrānpaced evam evaitad avṛttiṃ pāpmānam apahatyāhutiṃ prāpnoti
- 16
तद् उ हैक उपेव लभन्ते ऽहुतं तस्य यस्याग्निहोत्रोच्छिष्टेन जुह्वति यातयामं ह्य् एतद् इति वदन्तः
tad u haika upeva labhante 'hutaṃ tasya yasyāgnihotrocchiṣṭena juhvati yātayāmaṃ hy etad iti vadantaḥ
- 17
तद् उ तथा न विद्यात्
tad u tathā na vidyāt
- 18
यदा वा एतद् अयातयामं भवत्य् अथैतस्यापि हविरातञ्चनं कुर्वन्ति
yadā vā etad ayātayāmaṃ bhavaty athaitasyāpi havirātañcanaṃ kurvanti

