21 shlokas
- 1
इदं ह्य् अन्व् ओजसेति घृतश्चुन्निधनम्
idaṃ hy anv ojaseti ghṛtaścunnidhanam
- 2
घृतश्चुता च वै मधुश्चुता च देवा यत्र यत्रैषां यज्ञस्योपादस्यत्तत्तद् आप्याययन्त
ghṛtaścutā ca vai madhuścutā ca devā yatra yatraiṣāṃ yajñasyopādasyattattad āpyāyayanta
- 3
तत्तस्माद् आहुः सोमस्येवांशुर् आप्यायस्वेति
tattasmād āhuḥ somasyevāṃśur āpyāyasveti
- 4
उपदस्तेवैषा यद्रात्रिः
upadastevaiṣā yadrātriḥ
- 5
तद्यद्घृतश्चुन्निधनं भवत्य् ऐवैनम् एतेन प्याययन्ति
tadyadghṛtaścunnidhanaṃ bhavaty aivainam etena pyāyayanti
- 6
घृतश्चुच्च वै मधुश्चुच्चाङ्गिरसाव् अङ्गिरसां स्वर्गं लोकं यताम् अहीयेताम्
ghṛtaścucca vai madhuścuccāṅgirasāv aṅgirasāṃ svargaṃ lokaṃ yatām ahīyetām
- 7
ताव् अकामयेताम् अनूत्पतेव स्वर्गं लोकम् इति
tāv akāmayetām anūtpateva svargaṃ lokam iti
- 8
तौ तपो ऽतप्येताम्
tau tapo 'tapyetām
- 9
ताव् एते सामनी अपश्यताम्
tāv ete sāmanī apaśyatām
- 10
ताभ्याम् अस्तुवाताम्
tābhyām astuvātām
- 11
तौ स्तुत्वैव घृतश्चुते मधुश्चुत इत्य् एव स्वर्गं लोकम् अनूदपतताम्
tau stutvaiva ghṛtaścute madhuścuta ity eva svargaṃ lokam anūdapatatām
- 12
अन्तो वै पयसां घृतम् अन्तः स्वर्गो लोकानाम्
anto vai payasāṃ ghṛtam antaḥ svargo lokānām
- 13
अन्तो वै रसानां मध्व् अन्तः स्वर्गो लोकानाम्
anto vai rasānāṃ madhv antaḥ svargo lokānām
- 14
अन्त्याभ्यां वाव तौ तत्सामभ्याम् अन्त्यं स्वर्गं लोकम् आश्नुवाताम्
antyābhyāṃ vāva tau tatsāmabhyām antyaṃ svargaṃ lokam āśnuvātām
- 15
अन्त्याभ्याम् एवैतत्सामभ्याम् अन्त्यं स्वर्गं लोकम् अश्नुते य एवं वेद
antyābhyām evaitatsāmabhyām antyaṃ svargaṃ lokam aśnute ya evaṃ veda
- 16
पशवो ह खलु वै घृतश्चुतः
paśavo ha khalu vai ghṛtaścutaḥ
- 17
पशवो मधुश्चुतः
paśavo madhuścutaḥ
- 18
पशून्वाव तौ तद् एताभ्याम् अवारुन्धाताम्
paśūnvāva tau tad etābhyām avārundhātām
- 19
तैर् उ पशुभिर् इष्ट्वा स्वर्गम् एव लोकम् अगच्छताम्
tair u paśubhir iṣṭvā svargam eva lokam agacchatām
- 20
ते एते पशव्ये स्वर्ग्ये सामनी
te ete paśavye svargye sāmanī
- 21
अव पशून्रुन्द्धे गच्छति स्वर्गं लोकं य एवं वेद
ava paśūnrunddhe gacchati svargaṃ lokaṃ ya evaṃ veda

