14 shlokas
- 1
अयं त इन्द्र सोम इति पुनःप्रोक्तिर्ह वा एषा हविषः
ayaṃ ta indra soma iti punaḥproktirha vā eṣā haviṣaḥ
- 2
अयं नु ते ऽपरो यज्ञ इति ह वा एतद् इन्द्राय प्राहुः
ayaṃ nu te 'paro yajña iti ha vā etad indrāya prāhuḥ
- 3
द्वितीयं ह्य् एतद्धविः क्रियते यद्रात्रिः
dvitīyaṃ hy etaddhaviḥ kriyate yadrātriḥ
- 4
तास्व् और्ध्वसद्मनम्
tāsv aurdhvasadmanam
- 5
और्ध्वसद्मनेन वै देवा एषु लोकेषूर्ध्वा असीदन्
aurdhvasadmanena vai devā eṣu lokeṣūrdhvā asīdan
- 6
यद् एषु लोकेषूर्ध्वा असीदंस्तद् और्ध्वसद्मनस्यौर्ध्वसद्मनत्वम्
yad eṣu lokeṣūrdhvā asīdaṃstad aurdhvasadmanasyaurdhvasadmanatvam
- 7
तद् एतत्स्वर्ग्यं साम
tad etatsvargyaṃ sāma
- 8
ऊर्ध्व एवैतेन स्वर्गे लोके सीदति य एवं वेद
ūrdhva evaitena svarge loke sīdati ya evaṃ veda
- 9
और्ध्वसद्मनेन वै देवा असुराणां सुवृक्तिभिर् इति पशून् अवृञ्जत नृमादनम् इति वज्रं प्राहरन्भरेष्व् आ इति स्वर्गं लोकम् आरोहन्
aurdhvasadmanena vai devā asurāṇāṃ suvṛktibhir iti paśūn avṛñjata nṛmādanam iti vajraṃ prāharanbhareṣv ā iti svargaṃ lokam ārohan
- 10
और्ध्वसद्मनेनैव द्विषतो भ्रातृव्यस्य सुवृक्तिभिर् इत्य् एव पशून्वृङ्क्ते नृमादनम् इति वज्रं प्रहरति भरेष्व् आ इति स्वर्गं लोकम् आरोहति
aurdhvasadmanenaiva dviṣato bhrātṛvyasya suvṛktibhir ity eva paśūnvṛṅkte nṛmādanam iti vajraṃ praharati bhareṣv ā iti svargaṃ lokam ārohati
- 11
तान्य् आहुर्नानोपेत्यानि
tāny āhurnānopetyāni
- 12
नानेव वा इमे लोका एषां लोकानां विधृत्या इति
nāneva vā ime lokā eṣāṃ lokānāṃ vidhṛtyā iti
- 13
सुवृक्तिभिर् इति वा अयं लोको नृमादनम् इत्य् अन्तरिक्षं भरेष्व् आ इत्य् असौ
suvṛktibhir iti vā ayaṃ loko nṛmādanam ity antarikṣaṃ bhareṣv ā ity asau
- 14
तस्मान्नानोपेत्यान्य् एषां लोकानां विधृत्यै
tasmānnānopetyāny eṣāṃ lokānāṃ vidhṛtyai

