17 shlokas
- 1
पुरश्चक्रं पथो बिले तं चक्रम् अभिवर्तते यो ऽसम्पन्नेन यजते ऽपाको यज्ञेन देवैर्यद्ददाति तद् एवास्य न लोकम् अभिगच्छतीति
puraścakraṃ patho bile taṃ cakram abhivartate yo 'sampannena yajate 'pāko yajñena devairyaddadāti tad evāsya na lokam abhigacchatīti
- 2
पाकाः सन्तो ऽविजानन्तो ऽदेवायत इति हैनांस्तद् उवाच ये विराजम् अत्ययजध्वम् इति
pākāḥ santo 'vijānanto 'devāyata iti haināṃstad uvāca ye virājam atyayajadhvam iti
- 3
तद् आहुः कुतो यज्ञम् अतथाः क्वैनं प्रत्यतिष्ठिप इति
tad āhuḥ kuto yajñam atathāḥ kvainaṃ pratyatiṣṭhipa iti
- 4
यत एवैनम् अतसीति ब्रूयात्तद् एवैनं प्रत्यतिष्ठिपम् इति
yata evainam atasīti brūyāttad evainaṃ pratyatiṣṭhipam iti
- 5
पुरुषाद्ध वै यज्ञस्तायते पुरुषे प्रतितिष्ठति
puruṣāddha vai yajñastāyate puruṣe pratitiṣṭhati
- 6
अथ ह हृत्स्वाशया आल्लकेयो माहावृषो राजा पुत्रं दीक्षयांचकार
atha ha hṛtsvāśayā āllakeyo māhāvṛṣo rājā putraṃ dīkṣayāṃcakāra
- 7
तस्य ह सोमशुष्मः सात्ययज्ञिर् उद्गीथायोढ आस
tasya ha somaśuṣmaḥ sātyayajñir udgīthāyoḍha āsa
- 8
तम् उ ह महावृषाणां दूता आसस्रुर् आगच्छ समितिर्वा इयम् इति
tam u ha mahāvṛṣāṇāṃ dūtā āsasrur āgaccha samitirvā iyam iti
- 9
तद्ध प्रधावयन्न् उवाचोद्गातर् एतं ते पुत्रं परिददानीति
taddha pradhāvayann uvācodgātar etaṃ te putraṃ paridadānīti
- 10
स हेष्टं पुनर् आजगाम
sa heṣṭaṃ punar ājagāma
- 11
स होवाचोद्गातः क्व यज्ञं प्रत्यतिष्ठिपः क्व यजमानं क्वास्य पशून् इति
sa hovācodgātaḥ kva yajñaṃ pratyatiṣṭhipaḥ kva yajamānaṃ kvāsya paśūn iti
- 12
तद्ध न प्रत्युवाच
taddha na pratyuvāca
- 13
स होवाच पुनर्मे पुत्रं दीक्षयत
sa hovāca punarme putraṃ dīkṣayata
- 14
न वै विद्म यत्र मे पुत्रम् अकृद् इति
na vai vidma yatra me putram akṛd iti
- 15
तम् उ ह पुनर्दीक्षयांचक्रुः
tam u ha punardīkṣayāṃcakruḥ
- 16
तस्य ह स्वयम् एवोज्जगौ
tasya ha svayam evojjagau
- 17
स यत्प्रत्यवक्ष्यद्यजमान एव यज्ञं प्रत्यतिष्ठिपं यजमानं वामदेव्ये रथन्तरे ऽस्य पशून् इति
sa yatpratyavakṣyadyajamāna eva yajñaṃ pratyatiṣṭhipaṃ yajamānaṃ vāmadevye rathantare 'sya paśūn iti

