18 shlokas
- 1
तद् आहुर्यद् एकविंशम् अनु सर्वे यज्ञक्रतवः संतिष्ठन्ते ऽत्य् उ वा एकविंशान्य् उक्थानि रात्रिर् एत्य् अथ केनैषाम् एकविंशम् अनु रात्रिः संतिष्ठत इति
tad āhuryad ekaviṃśam anu sarve yajñakratavaḥ saṃtiṣṭhante 'ty u vā ekaviṃśāny ukthāni rātrir ety atha kenaiṣām ekaviṃśam anu rātriḥ saṃtiṣṭhata iti
- 2
स ब्रूयाद्यद् एवैत एकविंशतिश्च त्रिवृतो भवन्ति नव चैकविंशा इति
sa brūyādyad evaita ekaviṃśatiśca trivṛto bhavanti nava caikaviṃśā iti
- 3
अथ ह स्माह भाल्लबेयः क उ स्विद् अद्योभयतोज्योतिषा यज्ञक्रतुना यक्ष्यत इति
atha ha smāha bhāllabeyaḥ ka u svid adyobhayatojyotiṣā yajñakratunā yakṣyata iti
- 4
एष ह वा उभयतोज्योतिर्यज्ञक्रतुर्यद् अतिरात्रः
eṣa ha vā ubhayatojyotiryajñakraturyad atirātraḥ
- 5
त्रिवृत्पुरस्ताद्बहिष्पवमानं भवति त्रिवृद् उपरिष्टाद्राथन्तरः संधिः
trivṛtpurastādbahiṣpavamānaṃ bhavati trivṛd upariṣṭādrāthantaraḥ saṃdhiḥ
- 6
अग्निर्वै पूर्वस्त्रिवृद् आदित्य उत्तरः
agnirvai pūrvastrivṛd āditya uttaraḥ
- 7
अग्निना वा अयं लोको ज्योतिष्मान् आदित्येनासौ
agninā vā ayaṃ loko jyotiṣmān ādityenāsau
- 8
उभयतोज्योतिषास्य यज्ञक्रतुनेष्टं भवति ज्योतिष्मान् अस्मिंश्च लोके ऽमुष्मिंश्च भवति य एवं वेद
ubhayatojyotiṣāsya yajñakratuneṣṭaṃ bhavati jyotiṣmān asmiṃśca loke 'muṣmiṃśca bhavati ya evaṃ veda
- 9
तौ वा एतौ ब्रह्म चैव क्षत्रं च
tau vā etau brahma caiva kṣatraṃ ca
- 10
ब्रह्म वै त्रिवृत्क्षत्रं पञ्चदशः
brahma vai trivṛtkṣatraṃ pañcadaśaḥ
- 11
तद् एतद्ब्रह्म च क्षत्रं च संधाय रात्रिं वहतः
tad etadbrahma ca kṣatraṃ ca saṃdhāya rātriṃ vahataḥ
- 12
तद् एतद्ब्रह्म च क्षत्रं च संधायान्ततः पाप्मानम् अपहतः
tad etadbrahma ca kṣatraṃ ca saṃdhāyāntataḥ pāpmānam apahataḥ
- 13
तद्यद् एतौ स्तोमाव् अन्ततः क्रियेते पाप्मन एवापहत्यै
tadyad etau stomāv antataḥ kriyete pāpmana evāpahatyai
- 14
अप पाप्मानं हते य एवं वेद
apa pāpmānaṃ hate ya evaṃ veda
- 15
तौ यद्गायत्रीं सम्पद्येते तेजो वै ब्रह्मवर्चसं गायत्री तेजस्य् एव तद्ब्रह्मवर्चसे प्रतितिष्ठति
tau yadgāyatrīṃ sampadyete tejo vai brahmavarcasaṃ gāyatrī tejasy eva tadbrahmavarcase pratitiṣṭhati
- 16
अथो यजमानम् एव तद् आयुषि प्रतिष्ठापयति सर्वायुष्टायै
atho yajamānam eva tad āyuṣi pratiṣṭhāpayati sarvāyuṣṭāyai
- 17
प्राणो हि गायत्री
prāṇo hi gāyatrī
- 18
सर्वम् आयुर् एति य एवं वेद
sarvam āyur eti ya evaṃ veda

