17 shlokas
- 1
शैलादिरुवाच
गते महेश्वरे देवे तमुद्दिश्य जनार्दनः
प्रणम्य भगवान्प्राह पद्मयोनिमजोद्भवः
śailādiruvāca
gate maheśvare deve tamuddiśya janārdanaḥ
praṇamya bhagavānprāha padmayonimajodbhavaḥ
- 2
श्रीविष्णुरुवाच
परमेशो जगन्नाथः शङ्करस्त्वेष सर्वगः
आवयोरखिलस्येशः शरणं च महेश्वरः
śrīviṣṇuruvāca
parameśo jagannāthaḥ śaṅkarastveṣa sarvagaḥ
āvayorakhilasyeśaḥ śaraṇaṃ ca maheśvaraḥ
- 3
अहं वामाङ्गजो ब्रह्मन्शङ्करस्य महात्मनः
भवान्भवस्य देवस्य दक्षिणाङ्गभवः स्वयम्
ahaṃ vāmāṅgajo brahmanśaṅkarasya mahātmanaḥ
bhavānbhavasya devasya dakṣiṇāṅgabhavaḥ svayam
- 4
मामाहुर् ऋषयः प्रेक्ष्य प्रधानं प्रकृतिं तथा
अव्यक्तमजमित्येवं भवन्तं पुरुषस्त्विति
māmāhur ṛṣayaḥ prekṣya pradhānaṃ prakṛtiṃ tathā
avyaktamajamityevaṃ bhavantaṃ puruṣastviti
- 5
एवमाहुर्महादेवमावयोरपि कारणम्
ईशं सर्वस्य जगतः प्रभुमव्ययमीश्वरम्
evamāhurmahādevamāvayorapi kāraṇam
īśaṃ sarvasya jagataḥ prabhumavyayamīśvaram
- 6
सोऽपि तस्यामरेशस्य वचनाद्वारिजोद्भवः
वरेण्यं वरदं रुद्रमस्तुवत्प्रणनाम च
so'pi tasyāmareśasya vacanādvārijodbhavaḥ
vareṇyaṃ varadaṃ rudramastuvatpraṇanāma ca
- 7
अथाम्भसा प्लुतां भूमीं समाधाय जनार्दनः
पूर्ववत्स्थापयामास वाराहं रूपमास्थितः
athāmbhasā plutāṃ bhūmīṃ samādhāya janārdanaḥ
pūrvavatsthāpayāmāsa vārāhaṃ rūpamāsthitaḥ
- 8
नदीनदसमुद्रांश्च पूर्ववच्चाकरोत्प्रभुः
कृत्वा चोर्वीं प्रयत्नेन निम्नोन्नतविवर्जिताम्
nadīnadasamudrāṃśca pūrvavaccākarotprabhuḥ
kṛtvā corvīṃ prayatnena nimnonnatavivarjitām
- 9
धरायां सोऽचिनोत्सर्वान्भूधरान्भूधराकृतिः
भूराद्यांश्चतुरो लोकान्कल्पयामास पूर्ववत्
dharāyāṃ so'cinotsarvānbhūdharānbhūdharākṛtiḥ
bhūrādyāṃścaturo lokānkalpayāmāsa pūrvavat
- 10
स्रष्टुं च भगवांश्चक्रे मतिं मतिमतां वरः
मुख्यं च तैर्यग्योन्यं च दैविकं मानुषं तथा
sraṣṭuṃ ca bhagavāṃścakre matiṃ matimatāṃ varaḥ
mukhyaṃ ca tairyagyonyaṃ ca daivikaṃ mānuṣaṃ tathā
- 11
विभुश्चानुग्रहं तत्र कौमारकम् अदीनधीः
पुरस्तादसृजद्देवः सनन्दं सनकं तथा
vibhuścānugrahaṃ tatra kaumārakam adīnadhīḥ
purastādasṛjaddevaḥ sanandaṃ sanakaṃ tathā
- 12
सनातनं सतां श्रेष्ठं नैष्कर्म्येण गताः परम्
मरीचिभृग्वङ्गिरसं पुलस्त्यं पुलहं क्रतुम्
sanātanaṃ satāṃ śreṣṭhaṃ naiṣkarmyeṇa gatāḥ param
marīcibhṛgvaṅgirasaṃ pulastyaṃ pulahaṃ kratum
- 13
दक्षमत्रिं वसिष्ठं च सोऽसृजद्योगविद्यया
संकल्पं चैव धर्मं च ह्यधर्मं भगवान्प्रभुः
dakṣamatriṃ vasiṣṭhaṃ ca so'sṛjadyogavidyayā
saṃkalpaṃ caiva dharmaṃ ca hyadharmaṃ bhagavānprabhuḥ
- 14
द्वादशैव प्रजास्त्वेता ब्रह्मणो ऽव्यक्तजन्मनः
ऋभुं सनत्कुमारं च ससर्जादौ सनातनः
dvādaśaiva prajāstvetā brahmaṇo 'vyaktajanmanaḥ
ṛbhuṃ sanatkumāraṃ ca sasarjādau sanātanaḥ
- 15
तौ चोर्ध्वरेतसौ दिव्यौ चाग्रजौ ब्रह्मवादिनौ
कुमारौ ब्रह्मणस्तुल्यौ सर्वज्ञौ सर्वभाविनौ
tau cordhvaretasau divyau cāgrajau brahmavādinau
kumārau brahmaṇastulyau sarvajñau sarvabhāvinau
- 16
एवं मुख्यादिकान्सृष्ट्वा पद्मयोनिः शिलाशन
युगधर्मानशेषांश्च कल्पयामास विश्वसृक्
evaṃ mukhyādikānsṛṣṭvā padmayoniḥ śilāśana
yugadharmānaśeṣāṃśca kalpayāmāsa viśvasṛk
- 17
इति श्रीलिङ्गमहापुराणे पूर्वभागे वैष्णवकथनं नामाष्टत्रिंशो ऽध्यायः
iti śrīliṅgamahāpurāṇe pūrvabhāge vaiṣṇavakathanaṃ nāmāṣṭatriṃśo 'dhyāyaḥ

