14 shlokas
- 1
संजय उवाच
तेषाम् अनीकानि बृहद्ध्वजानि रणे समृद्धानि समागतानि
गर्जन्ति भेरीनिनदोन्मुखानि मेघैर्यथा मेघगणास्तपान्ते
saṃjaya uvāca
teṣām anīkāni bṛhaddhvajāni raṇe samṛddhāni samāgatāni
garjanti bherīninadonmukhāni meghairyathā meghagaṇāstapānte
- 2
महागजाभ्राकुलम् अस्त्रतोयं वादित्रनेमीतलशब्दवच्च
हिरण्यचित्रायुधवैद्युतं च महारथैर् आवृतशब्दवच्च
mahāgajābhrākulam astratoyaṃ vāditranemītalaśabdavacca
hiraṇyacitrāyudhavaidyutaṃ ca mahārathair āvṛtaśabdavacca
- 3
तद्भीमवेगं रुधिरौघवाहि खड्गाकुलं क्षत्रियजीववाहि
अनार्तवं क्रूरम् अनिष्टवर्षं बभूव तत्संहरणं प्रजानाम्
tadbhīmavegaṃ rudhiraughavāhi khaḍgākulaṃ kṣatriyajīvavāhi
anārtavaṃ krūram aniṣṭavarṣaṃ babhūva tatsaṃharaṇaṃ prajānām
- 4
रथान्ससूतान्सहयान्गजांश्च सर्वान् अरीन्मृत्युवशं शरौघैः
निन्ये हयांश्चैव तथा ससादीन्पदातिसंघांश्च तथैव पार्थः
rathānsasūtānsahayāngajāṃśca sarvān arīnmṛtyuvaśaṃ śaraughaiḥ
ninye hayāṃścaiva tathā sasādīnpadātisaṃghāṃśca tathaiva pārthaḥ
- 5
कृपः शिखण्डी च रणे समेतौ दुर्योधनं सात्यकिर् अभ्यगच्छत
श्रुतश्रवा द्रोणसुतेन सार्धं युधामन्युश्चित्रसेनेन चापि
kṛpaḥ śikhaṇḍī ca raṇe sametau duryodhanaṃ sātyakir abhyagacchata
śrutaśravā droṇasutena sārdhaṃ yudhāmanyuścitrasenena cāpi
- 6
कर्णस्य पुत्रस्तु रथी सुषेणं समागतः सृञ्जयांश्चोत्तमौजाः
गान्धारराजं सहदेवः क्षुधार्तो महर्षभं सिंह इवाभ्यधावत्
karṇasya putrastu rathī suṣeṇaṃ samāgataḥ sṛñjayāṃścottamaujāḥ
gāndhārarājaṃ sahadevaḥ kṣudhārto maharṣabhaṃ siṃha ivābhyadhāvat
- 7
शतानीको नाकुलिः कर्णपुत्रं युवा युवानं वृषसेनं शरौघैः
समार्दयत्कर्णसुतश्च वीरः पाञ्चालेयं शरवर्षैर् अनेकैः
śatānīko nākuliḥ karṇaputraṃ yuvā yuvānaṃ vṛṣasenaṃ śaraughaiḥ
samārdayatkarṇasutaśca vīraḥ pāñcāleyaṃ śaravarṣair anekaiḥ
- 8
रथर्षभः कृतवर्माणम् आर्छन्माद्रीपुत्रो नकुलश्चित्रयोधी
पाञ्चालानाम् अधिपो याज्ञसेनिः सेनापतिं कर्णम् आर्छत्ससैन्यम्
ratharṣabhaḥ kṛtavarmāṇam ārchanmādrīputro nakulaścitrayodhī
pāñcālānām adhipo yājñaseniḥ senāpatiṃ karṇam ārchatsasainyam
- 9
दुःशासनो भारत भारती च संशप्तकानां पृतना समृद्धा
भीमं रणे शस्त्रभृतां वरिष्ठं तदा समार्छत्तम् असह्यवेगम्
duḥśāsano bhārata bhāratī ca saṃśaptakānāṃ pṛtanā samṛddhā
bhīmaṃ raṇe śastrabhṛtāṃ variṣṭhaṃ tadā samārchattam asahyavegam
- 10
कर्णात्मजं तत्र जघान शूरस्तथाछिनच्चोत्तमौजाः प्रसह्य
तस्योत्तमाङ्गं निपपात भूमौ निनादयद्गां निनदेन खं च
karṇātmajaṃ tatra jaghāna śūrastathāchinaccottamaujāḥ prasahya
tasyottamāṅgaṃ nipapāta bhūmau ninādayadgāṃ ninadena khaṃ ca
- 11
सुषेणशीर्षं पतितं पृथिव्यां विलोक्य कर्णो ऽथ तदार्तरूपः
क्रोधाद्धयांस्तस्य रथं ध्वजं च बाणैः सुधारैर्निशितैर्न्यकृन्तत्
suṣeṇaśīrṣaṃ patitaṃ pṛthivyāṃ vilokya karṇo 'tha tadārtarūpaḥ
krodhāddhayāṃstasya rathaṃ dhvajaṃ ca bāṇaiḥ sudhārairniśitairnyakṛntat
- 12
स तूत्तमौजा निशितैः पृषत्कैर्विव्याध खड्गेन च भास्वरेण
पार्ष्णिं हयांश्चैव कृपस्य हत्वा शिखण्डिवाहं स ततो ऽभ्यरोहत्
sa tūttamaujā niśitaiḥ pṛṣatkairvivyādha khaḍgena ca bhāsvareṇa
pārṣṇiṃ hayāṃścaiva kṛpasya hatvā śikhaṇḍivāhaṃ sa tato 'bhyarohat
- 13
कृपं तु दृष्ट्वा विरथं रथस्थो नैच्छच्छरैस्ताडयितुं शिखण्डी
तं द्रौणिर् आवार्य रथं कृपं स्म समुज्जह्रे पङ्कगतां यथा गाम्
kṛpaṃ tu dṛṣṭvā virathaṃ rathastho naicchaccharaistāḍayituṃ śikhaṇḍī
taṃ drauṇir āvārya rathaṃ kṛpaṃ sma samujjahre paṅkagatāṃ yathā gām
- 14
हिरण्यवर्मा निशितैः पृषत्कैस्तवात्मजानाम् अनिलात्मजो वै
अतापयत्सैन्यम् अतीव भीमः काले शुचौ मध्यगतो यथार्कः
hiraṇyavarmā niśitaiḥ pṛṣatkaistavātmajānām anilātmajo vai
atāpayatsainyam atīva bhīmaḥ kāle śucau madhyagato yathārkaḥ

