20 shlokas
- 1
संजय उवाच
हते द्रोणे महेष्वासे तव पुत्रा महारथाः
बभूवुर् आश्वस्तमुखा विषण्णा गतचेतसः
saṃjaya uvāca
hate droṇe maheṣvāse tava putrā mahārathāḥ
babhūvur āśvastamukhā viṣaṇṇā gatacetasaḥ
- 2
अवाङ्मुखाः शस्त्रभृतः सर्व एव विशां पते
अप्रेक्षमाणाः शोकार्ता नाभ्यभाषन्परस्परम्
avāṅmukhāḥ śastrabhṛtaḥ sarva eva viśāṃ pate
aprekṣamāṇāḥ śokārtā nābhyabhāṣanparasparam
- 3
तान्दृष्ट्वा व्यथिताकारान्सैन्यानि तव भारत
ऊर्ध्वम् एवाभ्यवेक्षन्त दुःखत्रस्तान्य् अनेकशः
tāndṛṣṭvā vyathitākārānsainyāni tava bhārata
ūrdhvam evābhyavekṣanta duḥkhatrastāny anekaśaḥ
- 4
शस्त्राण्य् एषां च राजेन्द्र शोणिताक्तान्य् अशेषतः
प्राभ्रश्यन्त कराग्रेभ्यो दृष्ट्वा द्रोणं निपातितम्
śastrāṇy eṣāṃ ca rājendra śoṇitāktāny aśeṣataḥ
prābhraśyanta karāgrebhyo dṛṣṭvā droṇaṃ nipātitam
- 5
तानि बद्धान्य् अनिष्टानि लम्बमानानि भारत
अदृश्यन्त महाराज नक्षत्राणि यथा दिवि
tāni baddhāny aniṣṭāni lambamānāni bhārata
adṛśyanta mahārāja nakṣatrāṇi yathā divi
- 6
तथार्तं स्तिमितं दृष्ट्वा गतसत्त्वम् इव स्थितम्
स्वं बलं तन्महाराज राजा दुर्योधनो ऽब्रवीत्
tathārtaṃ stimitaṃ dṛṣṭvā gatasattvam iva sthitam
svaṃ balaṃ tanmahārāja rājā duryodhano 'bravīt
- 7
भवतां बाहुवीर्यं हि समाश्रित्य मया युधि
पाण्डवेयाः समाहूता युद्धं चेदं प्रवर्तितम्
bhavatāṃ bāhuvīryaṃ hi samāśritya mayā yudhi
pāṇḍaveyāḥ samāhūtā yuddhaṃ cedaṃ pravartitam
- 8
तद् इदं निहते द्रोणे विषण्णम् इव लक्ष्यते
युध्यमानाश्च समरे योधा वध्यन्ति सर्वतः
tad idaṃ nihate droṇe viṣaṇṇam iva lakṣyate
yudhyamānāśca samare yodhā vadhyanti sarvataḥ
- 9
जयो वापि वधो वापि युध्यमानस्य संयुगे
भवेत्किम् अत्र चित्रं वै युध्यध्वं सर्वतोमुखाः
jayo vāpi vadho vāpi yudhyamānasya saṃyuge
bhavetkim atra citraṃ vai yudhyadhvaṃ sarvatomukhāḥ
- 10
पश्यध्वं च महात्मानं कर्णं वैकर्तनं युधि
प्रचरन्तं महेष्वासं दिव्यैर् अस्त्रैर्महाबलम्
paśyadhvaṃ ca mahātmānaṃ karṇaṃ vaikartanaṃ yudhi
pracarantaṃ maheṣvāsaṃ divyair astrairmahābalam
- 11
यस्य वै युधि संत्रासात्कुन्तीपुत्रो धनंजयः
निवर्तते सदामर्षात्सिंहात्क्षुद्रमृगो यथा
yasya vai yudhi saṃtrāsātkuntīputro dhanaṃjayaḥ
nivartate sadāmarṣātsiṃhātkṣudramṛgo yathā
- 12
येन नागायुतप्राणो भीमसेनो महाबलः
मानुषेणैव युद्धेन ताम् अवस्थां प्रवेशितः
yena nāgāyutaprāṇo bhīmaseno mahābalaḥ
mānuṣeṇaiva yuddhena tām avasthāṃ praveśitaḥ
- 13
येन दिव्यास्त्रविच्छूरो मायावी स घटोत्कचः
अमोघया रणे शक्त्या निहतो भैरवं नदन्
yena divyāstravicchūro māyāvī sa ghaṭotkacaḥ
amoghayā raṇe śaktyā nihato bhairavaṃ nadan
- 14
तस्य दुष्पारवीर्यस्य सत्यसंधस्य धीमतः
बाह्वोर्द्रविणम् अक्षय्यम् अद्य द्रक्ष्यथ संयुगे
tasya duṣpāravīryasya satyasaṃdhasya dhīmataḥ
bāhvordraviṇam akṣayyam adya drakṣyatha saṃyuge
- 15
द्रोणपुत्रस्य विक्रान्तं राधेयस्यैव चोभयोः
पाण्डुपाञ्चालसैन्येषु द्रक्ष्यथापि महात्मनोः
droṇaputrasya vikrāntaṃ rādheyasyaiva cobhayoḥ
pāṇḍupāñcālasainyeṣu drakṣyathāpi mahātmanoḥ
- 16
सर्व एव भवन्तश्च शूराः प्राज्ञाः कुलोद्गताः
शीलवन्तः कृतास्त्राश्च द्रक्ष्यथाद्य परस्परम्
sarva eva bhavantaśca śūrāḥ prājñāḥ kulodgatāḥ
śīlavantaḥ kṛtāstrāśca drakṣyathādya parasparam
- 17
एवम् उक्ते महाराज कर्णो वैकर्तनो नृपः
सिंहनादं विनद्योच्चैः प्रायुध्यत महाबलः
evam ukte mahārāja karṇo vaikartano nṛpaḥ
siṃhanādaṃ vinadyoccaiḥ prāyudhyata mahābalaḥ
- 18
स सृञ्जयानां सर्वेषां पाञ्चालानां च पश्यताम्
केकयानां विदेहानाम् अकरोत्कदनं महत्
sa sṛñjayānāṃ sarveṣāṃ pāñcālānāṃ ca paśyatām
kekayānāṃ videhānām akarotkadanaṃ mahat
- 19
तस्येषुधाराः शतशः प्रादुरासञ्शरासनात्
अग्रे पुङ्खे च संसक्ता यथा भ्रमरपङ्क्तयः
tasyeṣudhārāḥ śataśaḥ prādurāsañśarāsanāt
agre puṅkhe ca saṃsaktā yathā bhramarapaṅktayaḥ
- 20
स पीडयित्वा पाञ्चालान्पाण्डवांश्च तरस्विनः
हत्वा सहस्रशो योधान् अर्जुनेन निपातितः
sa pīḍayitvā pāñcālānpāṇḍavāṃśca tarasvinaḥ
hatvā sahasraśo yodhān arjunena nipātitaḥ

