11 shlokas
- 1
दुर्योधन उवाच
एवं स भगवान्देवः सर्वलोकपितामहः
सारथ्यम् अकरोत्तत्र यत्र रुद्रो ऽभवद्रथी
duryodhana uvāca
evaṃ sa bhagavāndevaḥ sarvalokapitāmahaḥ
sārathyam akarottatra yatra rudro 'bhavadrathī
- 2
रथिनाभ्यधिको वीरः कर्तव्यो रथसारथिः
तस्मात्त्वं पुरुषव्याघ्र नियच्छ तुरगान्युधि
rathinābhyadhiko vīraḥ kartavyo rathasārathiḥ
tasmāttvaṃ puruṣavyāghra niyaccha turagānyudhi
- 3
संजय उवाच
ततः शल्यः परिष्वज्य सुतं ते वाक्यम् अब्रवीत्
दुर्योधनम् अमित्रघ्नः प्रीतो मद्राधिपस्तदा
saṃjaya uvāca
tataḥ śalyaḥ pariṣvajya sutaṃ te vākyam abravīt
duryodhanam amitraghnaḥ prīto madrādhipastadā
- 4
एवं चेन्मन्यसे राजन्गान्धारे प्रियदर्शन
तस्मात्ते यत्प्रियं किंचित्तत्सर्वं करवाण्य् अहम्
evaṃ cenmanyase rājangāndhāre priyadarśana
tasmātte yatpriyaṃ kiṃcittatsarvaṃ karavāṇy aham
- 5
यत्रास्मि भरतश्रेष्ठ योग्यः कर्मणि कर्हिचित्
तत्र सर्वात्मना युक्तो वक्ष्ये कार्यधुरं तव
yatrāsmi bharataśreṣṭha yogyaḥ karmaṇi karhicit
tatra sarvātmanā yukto vakṣye kāryadhuraṃ tava
- 6
यत्तु कर्णम् अहं ब्रूयां हितकामः प्रियाप्रियम्
मम तत्क्षमतां सर्वं भवान्कर्णश्च सर्वशः
yattu karṇam ahaṃ brūyāṃ hitakāmaḥ priyāpriyam
mama tatkṣamatāṃ sarvaṃ bhavānkarṇaśca sarvaśaḥ
- 7
कर्ण उवाच
ईशानस्य यथा ब्रह्मा यथा पार्थस्य केशवः
तथा नित्यं हिते युक्तो मद्रराज भजस्व नः
karṇa uvāca
īśānasya yathā brahmā yathā pārthasya keśavaḥ
tathā nityaṃ hite yukto madrarāja bhajasva naḥ
- 8
शल्य उवाच
आत्मनिन्दात्मपूजा च परनिन्दा परस्तवः
अनाचरितम् आर्याणां वृत्तम् एतच्चतुर्विधम्
śalya uvāca
ātmanindātmapūjā ca paranindā parastavaḥ
anācaritam āryāṇāṃ vṛttam etaccaturvidham
- 9
यत्तु विद्वन्प्रवक्ष्यामि प्रत्ययार्थम् अहं तव
आत्मनः स्तवसंयुक्तं तन्निबोध यथातथम्
yattu vidvanpravakṣyāmi pratyayārtham ahaṃ tava
ātmanaḥ stavasaṃyuktaṃ tannibodha yathātatham
- 10
अहं शक्रस्य सारथ्ये योग्यो मातलिवत्प्रभो
अप्रमादप्रयोगाच्च ज्ञानविद्याचिकित्सितैः
ahaṃ śakrasya sārathye yogyo mātalivatprabho
apramādaprayogācca jñānavidyācikitsitaiḥ
- 11
ततः पार्थेन संग्रामे युध्यमानस्य ते ऽनघ
वाहयिष्यामि तुरगान्विज्वरो भव सूतज
tataḥ pārthena saṃgrāme yudhyamānasya te 'nagha
vāhayiṣyāmi turagānvijvaro bhava sūtaja

