11 shlokas
- 1
वैशंपायन उवाच
ततो विजित्य संग्रामे कुरून्गोवृषभेक्षणः
समानयामास तदा विराटस्य धनं महत्
vaiśaṃpāyana uvāca
tato vijitya saṃgrāme kurūngovṛṣabhekṣaṇaḥ
samānayāmāsa tadā virāṭasya dhanaṃ mahat
- 2
गतेषु च प्रभग्नेषु धार्तराष्ट्रेषु सर्वशः
वनान्निष्क्रम्य गहनाद्बहवः कुरुसैनिकाः
gateṣu ca prabhagneṣu dhārtarāṣṭreṣu sarvaśaḥ
vanānniṣkramya gahanādbahavaḥ kurusainikāḥ
- 3
भयात्संत्रस्तमनसः समाजग्मुस्ततस्ततः
मुक्तकेशा व्यदृश्यन्त स्थिताः प्राञ्जलयस्तदा
bhayātsaṃtrastamanasaḥ samājagmustatastataḥ
muktakeśā vyadṛśyanta sthitāḥ prāñjalayastadā
- 4
क्षुत्पिपासापरिश्रान्ता विदेशस्था विचेतसः
ऊचुः प्रणम्य संभ्रान्ताः पार्थ किं करवाम ते
kṣutpipāsāpariśrāntā videśasthā vicetasaḥ
ūcuḥ praṇamya saṃbhrāntāḥ pārtha kiṃ karavāma te
- 5
अर्जुन उवाच
स्वस्ति व्रजत भद्रं वो न भेतव्यं कथंचन
नाहम् आर्ताञ्जिघांसामि भृशम् आश्वासयामि वः
arjuna uvāca
svasti vrajata bhadraṃ vo na bhetavyaṃ kathaṃcana
nāham ārtāñjighāṃsāmi bhṛśam āśvāsayāmi vaḥ
- 6
वैशंपायन उवाच
तस्य ताम् अभयां वाचं श्रुत्वा योधाः समागताः
आयुःकीर्तियशोदाभिस्तम् आशिर्भिर् अनन्दयन्
vaiśaṃpāyana uvāca
tasya tām abhayāṃ vācaṃ śrutvā yodhāḥ samāgatāḥ
āyuḥkīrtiyaśodābhistam āśirbhir anandayan
- 7
ततो निवृत्ताः कुरवः प्रभग्ना वशम् आस्थिताः
पन्थानम् उपसंगम्य फल्गुनो वाक्यम् अब्रवीत्
tato nivṛttāḥ kuravaḥ prabhagnā vaśam āsthitāḥ
panthānam upasaṃgamya phalguno vākyam abravīt
- 8
राजपुत्र प्रत्यवेक्ष समानीतानि सर्वशः
गोकुलानि महाबाहो वीर गोपालकैः सह
rājaputra pratyavekṣa samānītāni sarvaśaḥ
gokulāni mahābāho vīra gopālakaiḥ saha
- 9
ततो ऽपराह्णे यास्यामो विराटनगरं प्रति
आश्वास्य पाययित्वा च परिप्लाव्य च वाजिनः
tato 'parāhṇe yāsyāmo virāṭanagaraṃ prati
āśvāsya pāyayitvā ca pariplāvya ca vājinaḥ
- 10
गच्छन्तु त्वरिताश्चैव गोपालाः प्रेषितास्त्वया
नगरे प्रियम् आख्यातुं घोषयन्तु च ते जयम्
gacchantu tvaritāścaiva gopālāḥ preṣitāstvayā
nagare priyam ākhyātuṃ ghoṣayantu ca te jayam
- 11
वैशंपायन उवाच
उत्तरस्त्वरमाणो ऽथ दूतान् आज्ञापयत्ततः
वचनाद् अर्जुनस्यैव आचक्षध्वं जयं मम
vaiśaṃpāyana uvāca
uttarastvaramāṇo 'tha dūtān ājñāpayattataḥ
vacanād arjunasyaiva ācakṣadhvaṃ jayaṃ mama

