14 shlokas
- 1
वैशंपायन उवाच
ततः शारद्वतो वाक्यम् इत्युवाच कृपस्तदा
युक्तं प्राप्तं च वृद्धेन पाण्डवान्प्रति भाषितम्
vaiśaṃpāyana uvāca
tataḥ śāradvato vākyam ityuvāca kṛpastadā
yuktaṃ prāptaṃ ca vṛddhena pāṇḍavānprati bhāṣitam
- 2
धर्मार्थसहितं श्लक्ष्णं तत्त्वतश्च सहेतुमत्
तत्रानुरूपं भीष्मेण ममाप्यत्र गिरं शृणु
dharmārthasahitaṃ ślakṣṇaṃ tattvataśca sahetumat
tatrānurūpaṃ bhīṣmeṇa mamāpyatra giraṃ śṛṇu
- 3
तेषां चैव गतिस्तीर्थैर्वासश्चैषां प्रचिन्त्यताम्
नीतिर्विधीयतां चापि सांप्रतं या हिता भवेत्
teṣāṃ caiva gatistīrthairvāsaścaiṣāṃ pracintyatām
nītirvidhīyatāṃ cāpi sāṃprataṃ yā hitā bhavet
- 4
नावज्ञेयो रिपुस्तात प्राकृतो ऽपि बुभूषता
किं पुनः पाण्डवास्तात सर्वास्त्रकुशला रणे
nāvajñeyo ripustāta prākṛto 'pi bubhūṣatā
kiṃ punaḥ pāṇḍavāstāta sarvāstrakuśalā raṇe
- 5
तस्मात्सत्रं प्रविष्टेषु पाण्डवेषु महात्मसु
गूढभावेषु छन्नेषु काले चोदयम् आगते
tasmātsatraṃ praviṣṭeṣu pāṇḍaveṣu mahātmasu
gūḍhabhāveṣu channeṣu kāle codayam āgate
- 6
स्वराष्ट्रपरराष्ट्रेषु ज्ञातव्यं बलम् आत्मनः
उदये पाण्डवानां च प्राप्ते काले न संशयः
svarāṣṭrapararāṣṭreṣu jñātavyaṃ balam ātmanaḥ
udaye pāṇḍavānāṃ ca prāpte kāle na saṃśayaḥ
- 7
निवृत्तसमयाः पार्था महात्मानो महाबलाः
महोत्साहा भविष्यन्ति पाण्डवा ह्यतितेजसः
nivṛttasamayāḥ pārthā mahātmāno mahābalāḥ
mahotsāhā bhaviṣyanti pāṇḍavā hyatitejasaḥ
- 8
तस्माद्बलं च कोशं च नीतिश्चापि विधीयताम्
यथा कालोदये प्राप्ते सम्यक्तैः संदधामहे
tasmādbalaṃ ca kośaṃ ca nītiścāpi vidhīyatām
yathā kālodaye prāpte samyaktaiḥ saṃdadhāmahe
- 9
तात मन्यामि तत्सर्वं बुध्यस्व बलम् आत्मनः
नियतं सर्वमित्रेषु बलवत्स्वबलेषु च
tāta manyāmi tatsarvaṃ budhyasva balam ātmanaḥ
niyataṃ sarvamitreṣu balavatsvabaleṣu ca
- 10
उच्चावचं बलं ज्ञात्वा मध्यस्थं चापि भारत
प्रहृष्टम् अप्रहृष्टं च संदधाम तथा परैः
uccāvacaṃ balaṃ jñātvā madhyasthaṃ cāpi bhārata
prahṛṣṭam aprahṛṣṭaṃ ca saṃdadhāma tathā paraiḥ
- 11
साम्ना भेदेन दानेन दण्डेन बलिकर्मणा
न्यायेनानम्य च परान्बलाच्चानम्य दुर्बलान्
sāmnā bhedena dānena daṇḍena balikarmaṇā
nyāyenānamya ca parānbalāccānamya durbalān
- 12
सान्त्वयित्वा च मित्राणि बलं चाभाष्यतां सुखम्
सकोशबलसंवृद्धः सम्यक्सिद्धिम् अवाप्स्यसि
sāntvayitvā ca mitrāṇi balaṃ cābhāṣyatāṃ sukham
sakośabalasaṃvṛddhaḥ samyaksiddhim avāpsyasi
- 13
योत्स्यसे चापि बलिभिर् अरिभिः प्रत्युपस्थितैः
अन्यैस्त्वं पाण्डवैर्वापि हीनस्वबलवाहनैः
yotsyase cāpi balibhir aribhiḥ pratyupasthitaiḥ
anyaistvaṃ pāṇḍavairvāpi hīnasvabalavāhanaiḥ
- 14
एवं सर्वं विनिश्चित्य व्यवसायं स्वधर्मतः
यथाकालं मनुष्येन्द्र चिरं सुखम् अवाप्स्यसि
evaṃ sarvaṃ viniścitya vyavasāyaṃ svadharmataḥ
yathākālaṃ manuṣyendra ciraṃ sukham avāpsyasi

