10 shlokas
- 1
वैशंपायन उवाच
अथाब्रवीन्महावीर्यो द्रोणस्तत्त्वार्थदर्शिवान्
न तादृशा विनश्यन्ति नापि यान्ति पराभवम्
vaiśaṃpāyana uvāca
athābravīnmahāvīryo droṇastattvārthadarśivān
na tādṛśā vinaśyanti nāpi yānti parābhavam
- 2
शूराश्च कृतविद्याश्च बुद्धिमन्तो जितेन्द्रियाः
धर्मज्ञाश्च कृतज्ञाश्च धर्मराजम् अनुव्रताः
śūrāśca kṛtavidyāśca buddhimanto jitendriyāḥ
dharmajñāśca kṛtajñāśca dharmarājam anuvratāḥ
- 3
नीतिधर्मार्थतत्त्वज्ञं पितृवच्च समाहितम्
धर्मे स्थितं सत्यधृतिं ज्येष्ठं ज्येष्ठापचायिनम्
nītidharmārthatattvajñaṃ pitṛvacca samāhitam
dharme sthitaṃ satyadhṛtiṃ jyeṣṭhaṃ jyeṣṭhāpacāyinam
- 4
अनुव्रता महात्मानं भ्रातरं भ्रातरो नृप
अजातशत्रुं ह्रीमन्तं तं च भ्रातॄन् अनुव्रतम्
anuvratā mahātmānaṃ bhrātaraṃ bhrātaro nṛpa
ajātaśatruṃ hrīmantaṃ taṃ ca bhrātṝn anuvratam
- 5
तेषां तथा विधेयानां निभृतानां महात्मनाम्
किमर्थं नीतिमान्पार्थः श्रेयो नैषां करिष्यति
teṣāṃ tathā vidheyānāṃ nibhṛtānāṃ mahātmanām
kimarthaṃ nītimānpārthaḥ śreyo naiṣāṃ kariṣyati
- 6
तस्माद्यत्नात्प्रतीक्षन्ते कालस्योदयम् आगतम्
न हि ते नाशम् ऋच्छेयुर् इति पश्याम्य् अहं धिया
tasmādyatnātpratīkṣante kālasyodayam āgatam
na hi te nāśam ṛccheyur iti paśyāmy ahaṃ dhiyā
- 7
सांप्रतं चैव यत्कार्यं तच्च क्षिप्रम् अकालिकम्
क्रियतां साधु संचिन्त्य वासश्चैषां प्रचिन्त्यताम्
sāṃprataṃ caiva yatkāryaṃ tacca kṣipram akālikam
kriyatāṃ sādhu saṃcintya vāsaścaiṣāṃ pracintyatām
- 8
यथावत्पाण्डुपुत्राणां सर्वार्थेषु धृतात्मनाम्
दुर्ज्ञेयाः खलु शूरास्ते अपापास्तपसा वृताः
yathāvatpāṇḍuputrāṇāṃ sarvārtheṣu dhṛtātmanām
durjñeyāḥ khalu śūrāste apāpāstapasā vṛtāḥ
- 9
शुद्धात्मा गुणवान्पार्थः सत्यवान्नीतिमाञ्शुचिः
तेजोराशिर् असंख्येयो गृह्णीयाद् अपि चक्षुषी
śuddhātmā guṇavānpārthaḥ satyavānnītimāñśuciḥ
tejorāśir asaṃkhyeyo gṛhṇīyād api cakṣuṣī
- 10
विज्ञाय क्रियतां तस्माद्भूयश्च मृगयामहे
ब्राह्मणैश्चारकैः सिद्धैर्ये चान्ये तद्विदो जनाः
vijñāya kriyatāṃ tasmādbhūyaśca mṛgayāmahe
brāhmaṇaiścārakaiḥ siddhairye cānye tadvido janāḥ

