28 shlokas
- 1
वैशंपायन उवाच
ततो वैकर्तनं जित्वा पार्थो वैराटिम् अब्रवीत्
एतन्मां प्रापयानीकं यत्र तालो हिरण्मयः
vaiśaṃpāyana uvāca
tato vaikartanaṃ jitvā pārtho vairāṭim abravīt
etanmāṃ prāpayānīkaṃ yatra tālo hiraṇmayaḥ
- 2
अत्र शांतनवो भीष्मो रथे ऽस्माकं पितामहः
काङ्क्षमाणो मया युद्धं तिष्ठत्यमरदर्शनः
आदास्याम्यहम् एतस्य धनुर्ज्याम् अपि चाहवे
atra śāṃtanavo bhīṣmo rathe 'smākaṃ pitāmahaḥ
kāṅkṣamāṇo mayā yuddhaṃ tiṣṭhatyamaradarśanaḥ
ādāsyāmyaham etasya dhanurjyām api cāhave
- 3
अस्यन्तं दिव्यम् अस्त्रं मां चित्रम् अद्य निशामय
शतह्रदाम् इवायान्तीं स्तनयित्नोर् इवाम्बरे
asyantaṃ divyam astraṃ māṃ citram adya niśāmaya
śatahradām ivāyāntīṃ stanayitnor ivāmbare
- 4
सुवर्णपृष्ठं गाण्डीवं द्रक्ष्यन्ति कुरवो मम
दक्षिणेनाथ वामेन कतरेण स्विद् अस्यति
इति मां संगताः सर्वे तर्कयिष्यन्ति शत्रवः
suvarṇapṛṣṭhaṃ gāṇḍīvaṃ drakṣyanti kuravo mama
dakṣiṇenātha vāmena katareṇa svid asyati
iti māṃ saṃgatāḥ sarve tarkayiṣyanti śatravaḥ
- 5
शोणितोदां रथावर्तां नागनक्रां दुरत्ययाम्
नदीं प्रस्यन्दयिष्यामि परलोकप्रवाहिनीम्
śoṇitodāṃ rathāvartāṃ nāganakrāṃ duratyayām
nadīṃ prasyandayiṣyāmi paralokapravāhinīm
- 6
पाणिपादशिरःपृष्ठबाहुशाखानिरन्तरम्
वनं कुरूणां छेत्स्यामि भल्लैः संनतपर्वभिः
pāṇipādaśiraḥpṛṣṭhabāhuśākhānirantaram
vanaṃ kurūṇāṃ chetsyāmi bhallaiḥ saṃnataparvabhiḥ
- 7
जयतः कौरवीं सेनाम् एकस्य मम धन्विनः
शतं मार्गा भविष्यन्ति पावकस्येव कानने
मया चक्रम् इवाविद्धं सैन्यं द्रक्ष्यसि केवलम्
jayataḥ kauravīṃ senām ekasya mama dhanvinaḥ
śataṃ mārgā bhaviṣyanti pāvakasyeva kānane
mayā cakram ivāviddhaṃ sainyaṃ drakṣyasi kevalam
- 8
असंभ्रान्तो रथे तिष्ठ समेषु विषमेषु च
दिवम् आवृत्य तिष्ठन्तं गिरिं भेत्स्यामि धारिभिः
asaṃbhrānto rathe tiṣṭha sameṣu viṣameṣu ca
divam āvṛtya tiṣṭhantaṃ giriṃ bhetsyāmi dhāribhiḥ
- 9
अहम् इन्द्रस्य वचनात्संग्रामे ऽभ्यहनं पुरा
पौलोमान्कालखञ्जांश्च सहस्राणि शतानि च
aham indrasya vacanātsaṃgrāme 'bhyahanaṃ purā
paulomānkālakhañjāṃśca sahasrāṇi śatāni ca
- 10
अहम् इन्द्राद्दृढां मुष्टिं ब्रह्मणः कृतहस्तताम्
प्रगाढं तुमुलं चित्रम् अतिविद्धं प्रजापतेः
aham indrāddṛḍhāṃ muṣṭiṃ brahmaṇaḥ kṛtahastatām
pragāḍhaṃ tumulaṃ citram atividdhaṃ prajāpateḥ
- 11
अहं पारे समुद्रस्य हिरण्यपुरम् आरुजम्
जित्वा षष्टिसहस्राणि रथिनाम् उग्रधन्विनाम्
ahaṃ pāre samudrasya hiraṇyapuram ārujam
jitvā ṣaṣṭisahasrāṇi rathinām ugradhanvinām
- 12
ध्वजवृक्षं पत्तितृणं रथसिंहगणायुतम्
वनम् आदीपयिष्यामि कुरूणाम् अस्त्रतेजसा
dhvajavṛkṣaṃ pattitṛṇaṃ rathasiṃhagaṇāyutam
vanam ādīpayiṣyāmi kurūṇām astratejasā
- 13
तान् अहं रथनीडेभ्यः शरैः संनतपर्वभिः
एकः संकालयिष्यामि वज्रपाणिर् इवासुरान्
tān ahaṃ rathanīḍebhyaḥ śaraiḥ saṃnataparvabhiḥ
ekaḥ saṃkālayiṣyāmi vajrapāṇir ivāsurān
- 14
रौद्रं रुद्राद् अहं ह्यस्त्रं वारुणं वरुणाद् अपि
अस्त्रम् आग्नेयम् अग्नेश्च वायव्यं मातरिश्वनः
वज्रादीनि तथास्त्राणि शक्राद् अहम् अवाप्तवान्
raudraṃ rudrād ahaṃ hyastraṃ vāruṇaṃ varuṇād api
astram āgneyam agneśca vāyavyaṃ mātariśvanaḥ
vajrādīni tathāstrāṇi śakrād aham avāptavān
- 15
धार्तराष्ट्रवनं घोरं नरसिंहाभिरक्षितम्
अहम् उत्पाटयिष्यामि वैराटे व्येतु ते भयम्
dhārtarāṣṭravanaṃ ghoraṃ narasiṃhābhirakṣitam
aham utpāṭayiṣyāmi vairāṭe vyetu te bhayam
- 16
एवम् आश्वासितस्तेन वैराटिः सव्यसाचिना
व्यगाहत रथानीकं भीमं भीष्मस्य धीमतः
evam āśvāsitastena vairāṭiḥ savyasācinā
vyagāhata rathānīkaṃ bhīmaṃ bhīṣmasya dhīmataḥ
- 17
तम् आयान्तं महाबाहुं जिगीषन्तं रणे परान्
अभ्यवारयद् अव्यग्रः क्रूरकर्मा धनंजयम्
tam āyāntaṃ mahābāhuṃ jigīṣantaṃ raṇe parān
abhyavārayad avyagraḥ krūrakarmā dhanaṃjayam
- 18
तं चित्रमाल्याभरणाः कृतविद्या मनस्विनः
आगच्छन्भीमधन्वानं मौर्वीं पर्यस्य बाहुभिः
taṃ citramālyābharaṇāḥ kṛtavidyā manasvinaḥ
āgacchanbhīmadhanvānaṃ maurvīṃ paryasya bāhubhiḥ
- 19
दुःशासनो विकर्णश्च दुःसहो ऽथ विविंशतिः
आगत्य भीमधन्वानं बीभत्सुं पर्यवारयन्
duḥśāsano vikarṇaśca duḥsaho 'tha viviṃśatiḥ
āgatya bhīmadhanvānaṃ bībhatsuṃ paryavārayan
- 20
दुःशासनस्तु भल्लेन विद्ध्वा वैराटिम् उत्तरम्
द्वितीयेनार्जुनं वीरः प्रत्यविध्यत्स्तनान्तरे
duḥśāsanastu bhallena viddhvā vairāṭim uttaram
dvitīyenārjunaṃ vīraḥ pratyavidhyatstanāntare
- 21
तस्य जिष्णुर् उपावृत्य पृथुधारेण कार्मुकम्
चकर्त गार्ध्रपत्रेण जातरूपपरिष्कृतम्
tasya jiṣṇur upāvṛtya pṛthudhāreṇa kārmukam
cakarta gārdhrapatreṇa jātarūpapariṣkṛtam
- 22
अथैनं पञ्चभिः पश्चात्प्रत्यविध्यत्स्तनान्तरे
सो ऽपयातो रणं हित्वा पार्थबाणप्रपीडितः
athainaṃ pañcabhiḥ paścātpratyavidhyatstanāntare
so 'payāto raṇaṃ hitvā pārthabāṇaprapīḍitaḥ
- 23
तं विकर्णः शरैस्तीक्ष्णैर्गार्ध्रपत्रैर् अजिह्मगैः
विव्याध परवीरघ्नम् अर्जुनं धृतराष्ट्रजः
taṃ vikarṇaḥ śaraistīkṣṇairgārdhrapatrair ajihmagaiḥ
vivyādha paravīraghnam arjunaṃ dhṛtarāṣṭrajaḥ
- 24
ततस्तम् अपि कौन्तेयः शरेणानतपर्वणा
ललाटे ऽभ्यहनत्तूर्णं स विद्धः प्रापतद्रथात्
tatastam api kaunteyaḥ śareṇānataparvaṇā
lalāṭe 'bhyahanattūrṇaṃ sa viddhaḥ prāpatadrathāt
- 25
ततः पार्थम् अभिद्रुत्य दुःसहः सविविंशतिः
अवाकिरच्छरैस्तीक्ष्णैः परीप्सन्भ्रातरं रणे
tataḥ pārtham abhidrutya duḥsahaḥ saviviṃśatiḥ
avākiraccharaistīkṣṇaiḥ parīpsanbhrātaraṃ raṇe
- 26
तावुभौ गार्ध्रपत्राभ्यां निशिताभ्यां धनंजयः
विद्ध्वा युगपद् अव्यग्रस्तयोर्वाहान् असूदयत्
tāvubhau gārdhrapatrābhyāṃ niśitābhyāṃ dhanaṃjayaḥ
viddhvā yugapad avyagrastayorvāhān asūdayat
- 27
तौ हताश्वौ विविद्धाङ्गौ धृतराष्ट्रात्मजावुभौ
अभिपत्य रथैर् अन्यैर् अपनीतौ पदानुगैः
tau hatāśvau vividdhāṅgau dhṛtarāṣṭrātmajāvubhau
abhipatya rathair anyair apanītau padānugaiḥ
- 28
सर्वा दिशश्चाभ्यपतद्बीभत्सुर् अपराजितः
किरीटमाली कौन्तेयो लब्धलक्षो महाबलः
sarvā diśaścābhyapatadbībhatsur aparājitaḥ
kirīṭamālī kaunteyo labdhalakṣo mahābalaḥ

