16 shlokas
- 1
वैशंपायन उवाच
तं दृष्ट्वा क्लीबवेषेण रथस्थं नरपुंगवम्
शमीम् अभिमुखं यान्तं रथम् आरोप्य चोत्तरम्
vaiśaṃpāyana uvāca
taṃ dṛṣṭvā klībaveṣeṇa rathasthaṃ narapuṃgavam
śamīm abhimukhaṃ yāntaṃ ratham āropya cottaram
- 2
भीष्मद्रोणमुखास्तत्र कुरूणां रथसत्तमाः
वित्रस्तमनसः सर्वे धनंजयकृताद्भयात्
bhīṣmadroṇamukhāstatra kurūṇāṃ rathasattamāḥ
vitrastamanasaḥ sarve dhanaṃjayakṛtādbhayāt
- 3
तान् अवेक्ष्य हतोत्साहान् उत्पातान् अपि चाद्भुतान्
गुरुः शस्त्रभृतां श्रेष्ठो भारद्वाजो ऽभ्यभाषत
tān avekṣya hatotsāhān utpātān api cādbhutān
guruḥ śastrabhṛtāṃ śreṣṭho bhāradvājo 'bhyabhāṣata
- 4
चलाश्च वाताः संवान्ति रूक्षाः परुषनिःस्वनाः
भस्मवर्णप्रकाशेन तमसा संवृतं नभः
calāśca vātāḥ saṃvānti rūkṣāḥ paruṣaniḥsvanāḥ
bhasmavarṇaprakāśena tamasā saṃvṛtaṃ nabhaḥ
- 5
रूक्षवर्णाश्च जलदा दृश्यन्ते ऽद्भुतदर्शनाः
निःसरन्ति च कोशेभ्यः शस्त्राणि विविधानि च
rūkṣavarṇāśca jaladā dṛśyante 'dbhutadarśanāḥ
niḥsaranti ca kośebhyaḥ śastrāṇi vividhāni ca
- 6
शिवाश्च विनदन्त्येता दीप्तायां दिशि दारुणाः
हयाश्चाश्रूणि मुञ्चन्ति ध्वजाः कम्पन्त्यकम्पिताः
śivāśca vinadantyetā dīptāyāṃ diśi dāruṇāḥ
hayāścāśrūṇi muñcanti dhvajāḥ kampantyakampitāḥ
- 7
यादृशान्यत्र रूपाणि संदृश्यन्ते बहून्यपि
यत्ता भवन्तस्तिष्ठन्तु स्याद्युद्धं समुपस्थितम्
yādṛśānyatra rūpāṇi saṃdṛśyante bahūnyapi
yattā bhavantastiṣṭhantu syādyuddhaṃ samupasthitam
- 8
रक्षध्वम् अपि चात्मानं व्यूहध्वं वाहिनीम् अपि
वैशसं च प्रतीक्षध्वं रक्षध्वं चापि गोधनम्
rakṣadhvam api cātmānaṃ vyūhadhvaṃ vāhinīm api
vaiśasaṃ ca pratīkṣadhvaṃ rakṣadhvaṃ cāpi godhanam
- 9
एष वीरो महेष्वासः सर्वशस्त्रभृतां वरः
आगतः क्लीबवेषेण पार्थो नास्त्यत्र संशयः
eṣa vīro maheṣvāsaḥ sarvaśastrabhṛtāṃ varaḥ
āgataḥ klībaveṣeṇa pārtho nāstyatra saṃśayaḥ
- 10
स एष पार्थो विक्रान्तः सव्यसाची परंतपः
नायुद्धेन निवर्तेत सर्वैर् अपि मरुद्गणैः
sa eṣa pārtho vikrāntaḥ savyasācī paraṃtapaḥ
nāyuddhena nivarteta sarvair api marudgaṇaiḥ
- 11
क्लेशितश्च वने शूरो वासवेन च शिक्षितः
अमर्षवशम् आपन्नो योत्स्यते नात्र संशयः
kleśitaśca vane śūro vāsavena ca śikṣitaḥ
amarṣavaśam āpanno yotsyate nātra saṃśayaḥ
- 12
नेहास्य प्रतियोद्धारम् अहं पश्यामि कौरवाः
महादेवो ऽपि पार्थेन श्रूयते युधि तोषितः
nehāsya pratiyoddhāram ahaṃ paśyāmi kauravāḥ
mahādevo 'pi pārthena śrūyate yudhi toṣitaḥ
- 13
कर्ण उवाच
सदा भवान्फल्गुनस्य गुणैर् अस्मान्विकत्थसे
न चार्जुनः कला पूर्णा मम दुर्योधनस्य वा
karṇa uvāca
sadā bhavānphalgunasya guṇair asmānvikatthase
na cārjunaḥ kalā pūrṇā mama duryodhanasya vā
- 14
दुर्योधन उवाच
यद्येष पार्थो राधेय कृतं कार्यं भवेन्मम
ज्ञाताः पुनश्चरिष्यन्ति द्वादशान्यान्हि वत्सरान्
duryodhana uvāca
yadyeṣa pārtho rādheya kṛtaṃ kāryaṃ bhavenmama
jñātāḥ punaścariṣyanti dvādaśānyānhi vatsarān
- 15
अथैष कश्चिद् एवान्यः क्लीबवेषेण मानवः
शरैर् एनं सुनिशितैः पातयिष्यामि भूतले
athaiṣa kaścid evānyaḥ klībaveṣeṇa mānavaḥ
śarair enaṃ suniśitaiḥ pātayiṣyāmi bhūtale
- 16
वैशंपायन उवाच
तस्मिन्ब्रुवति तद्वाक्यं धार्तराष्ट्रे परंतपे
भीष्मो द्रोणः कृपो द्रौणिः पौरुषं तद् अपूजयन्
vaiśaṃpāyana uvāca
tasminbruvati tadvākyaṃ dhārtarāṣṭre paraṃtape
bhīṣmo droṇaḥ kṛpo drauṇiḥ pauruṣaṃ tad apūjayan

