23 shlokas
- 1
उत्तर उवाच
सुवर्णविकृतानीमान्यायुधानि महात्मनाम्
रुचिराणि प्रकाशन्ते पार्थानाम् आशुकारिणाम्
uttara uvāca
suvarṇavikṛtānīmānyāyudhāni mahātmanām
rucirāṇi prakāśante pārthānām āśukāriṇām
- 2
क्व नु स्विद् अर्जुनः पार्थः कौरव्यो वा युधिष्ठिरः
नकुलः सहदेवश्च भीमसेनश्च पाण्डवः
kva nu svid arjunaḥ pārthaḥ kauravyo vā yudhiṣṭhiraḥ
nakulaḥ sahadevaśca bhīmasenaśca pāṇḍavaḥ
- 3
सर्व एव महात्मानः सर्वामित्रविनाशनाः
राज्यम् अक्षैः पराकीर्य न श्रूयन्ते कदाचन
sarva eva mahātmānaḥ sarvāmitravināśanāḥ
rājyam akṣaiḥ parākīrya na śrūyante kadācana
- 4
द्रौपदी क्व च पाञ्चाली स्त्रीरत्नम् इति विश्रुता
जितान् अक्षैस्तदा कृष्णा तान् एवान्वगमद्वनम्
draupadī kva ca pāñcālī strīratnam iti viśrutā
jitān akṣaistadā kṛṣṇā tān evānvagamadvanam
- 5
अर्जुन उवाच
अहम् अस्म्यर्जुनः पार्थः सभास्तारो युधिष्ठिरः
बल्लवो भीमसेनस्तु पितुस्ते रसपाचकः
arjuna uvāca
aham asmyarjunaḥ pārthaḥ sabhāstāro yudhiṣṭhiraḥ
ballavo bhīmasenastu pituste rasapācakaḥ
- 6
अश्वबन्धो ऽथ नकुलः सहदेवस्तु गोकुले
सैरन्ध्रीं द्रौपदीं विद्धि यत्कृते कीचका हताः
aśvabandho 'tha nakulaḥ sahadevastu gokule
sairandhrīṃ draupadīṃ viddhi yatkṛte kīcakā hatāḥ
- 7
उत्तर उवाच
दश पार्थस्य नामानि यानि पूर्वं श्रुतानि मे
प्रब्रूयास्तानि यदि मे श्रद्दध्यां सर्वम् एव ते
uttara uvāca
daśa pārthasya nāmāni yāni pūrvaṃ śrutāni me
prabrūyāstāni yadi me śraddadhyāṃ sarvam eva te
- 8
अर्जुन उवाच
हन्त ते ऽहं समाचक्षे दश नामानि यानि मे
अर्जुनः फल्गुनो जिष्णुः किरीटी श्वेतवाहनः
बीभत्सुर्विजयः कृष्णः सव्यसाची धनंजयः
arjuna uvāca
hanta te 'haṃ samācakṣe daśa nāmāni yāni me
arjunaḥ phalguno jiṣṇuḥ kirīṭī śvetavāhanaḥ
bībhatsurvijayaḥ kṛṣṇaḥ savyasācī dhanaṃjayaḥ
- 9
उत्तर उवाच
केनासि विजयो नाम केनासि श्वेतवाहनः
किरीटी नाम केनासि सव्यसाची कथं भवान्
uttara uvāca
kenāsi vijayo nāma kenāsi śvetavāhanaḥ
kirīṭī nāma kenāsi savyasācī kathaṃ bhavān
- 10
अर्जुनः फल्गुनो जिष्णुः कृष्णो बीभत्सुर् एव च
धनंजयश्च केनासि प्रब्रूहि मम तत्त्वतः
श्रुता मे तस्य वीरस्य केवला नामहेतवः
arjunaḥ phalguno jiṣṇuḥ kṛṣṇo bībhatsur eva ca
dhanaṃjayaśca kenāsi prabrūhi mama tattvataḥ
śrutā me tasya vīrasya kevalā nāmahetavaḥ
- 11
अर्जुन उवाच
सर्वाञ्जनपदाञ्जित्वा वित्तम् आच्छिद्य केवलम्
मध्ये धनस्य तिष्ठामि तेनाहुर्मां धनंजयम्
arjuna uvāca
sarvāñjanapadāñjitvā vittam ācchidya kevalam
madhye dhanasya tiṣṭhāmi tenāhurmāṃ dhanaṃjayam
- 12
अभिप्रयामि संग्रामे यद् अहं युद्धदुर्मदान्
नाजित्वा विनिवर्तामि तेन मां विजयं विदुः
abhiprayāmi saṃgrāme yad ahaṃ yuddhadurmadān
nājitvā vinivartāmi tena māṃ vijayaṃ viduḥ
- 13
श्वेताः काञ्चनसंनाहा रथे युज्यन्ति मे हयाः
संग्रामे युध्यमानस्य तेनाहं श्वेतवाहनः
śvetāḥ kāñcanasaṃnāhā rathe yujyanti me hayāḥ
saṃgrāme yudhyamānasya tenāhaṃ śvetavāhanaḥ
- 14
उत्तराभ्यां च पूर्वाभ्यां फल्गुनीभ्याम् अहं दिवा
जातो हिमवतः पृष्ठे तेन मां फल्गुनं विदुः
uttarābhyāṃ ca pūrvābhyāṃ phalgunībhyām ahaṃ divā
jāto himavataḥ pṛṣṭhe tena māṃ phalgunaṃ viduḥ
- 15
पुरा शक्रेण मे दत्तं युध्यतो दानवर्षभैः
किरीटं मूर्ध्नि सूर्याभं तेन माहुः किरीटिनम्
purā śakreṇa me dattaṃ yudhyato dānavarṣabhaiḥ
kirīṭaṃ mūrdhni sūryābhaṃ tena māhuḥ kirīṭinam
- 16
न कुर्यां कर्म बीभत्सं युध्यमानः कथंचन
तेन देवमनुष्येषु बीभत्सुर् इति मां विदुः
na kuryāṃ karma bībhatsaṃ yudhyamānaḥ kathaṃcana
tena devamanuṣyeṣu bībhatsur iti māṃ viduḥ
- 17
उभौ मे दक्षिणौ पाणी गाण्डीवस्य विकर्षणे
तेन देवमनुष्येषु सव्यसाचीति मां विदुः
ubhau me dakṣiṇau pāṇī gāṇḍīvasya vikarṣaṇe
tena devamanuṣyeṣu savyasācīti māṃ viduḥ
- 18
पृथिव्यां चतुरन्तायां वर्णो मे दुर्लभः समः
करोमि कर्म शुक्लं च तेन माम् अर्जुनं विदुः
pṛthivyāṃ caturantāyāṃ varṇo me durlabhaḥ samaḥ
karomi karma śuklaṃ ca tena mām arjunaṃ viduḥ
- 19
अहं दुरापो दुर्धर्षो दमनः पाकशासनिः
तेन देवमनुष्येषु जिष्णुनामास्मि विश्रुतः
ahaṃ durāpo durdharṣo damanaḥ pākaśāsaniḥ
tena devamanuṣyeṣu jiṣṇunāmāsmi viśrutaḥ
- 20
कृष्ण इत्येव दशमं नाम चक्रे पिता मम
कृष्णावदातस्य सतः प्रियत्वाद्बालकस्य वै
kṛṣṇa ityeva daśamaṃ nāma cakre pitā mama
kṛṣṇāvadātasya sataḥ priyatvādbālakasya vai
- 21
वैशंपायन उवाच
ततः पार्थं स वैराटिर् अभ्यवादयद् अन्तिकात्
अहं भूमिंजयो नाम नाम्नाहम् अपि चोत्तरः
vaiśaṃpāyana uvāca
tataḥ pārthaṃ sa vairāṭir abhyavādayad antikāt
ahaṃ bhūmiṃjayo nāma nāmnāham api cottaraḥ
- 22
दिष्ट्या त्वां पार्थ पश्यामि स्वागतं ते धनंजय
लोहिताक्ष महाबाहो नागराजकरोपम
यद् अज्ञानाद् अवोचं त्वां क्षन्तुम् अर्हसि तन्मम
diṣṭyā tvāṃ pārtha paśyāmi svāgataṃ te dhanaṃjaya
lohitākṣa mahābāho nāgarājakaropama
yad ajñānād avocaṃ tvāṃ kṣantum arhasi tanmama
- 23
यतस्त्वया कृतं पूर्वं विचित्रं कर्म दुष्करम्
अतो भयं व्यतीतं मे प्रीतिश्च परमा त्वयि
yatastvayā kṛtaṃ pūrvaṃ vicitraṃ karma duṣkaram
ato bhayaṃ vyatītaṃ me prītiśca paramā tvayi

