13 shlokas
- 1
वैशंपायन उवाच
अथ दुर्योधनः कर्णो दुःशासनविविंशती
द्रोणश्च सह पुत्रेण कृपश्चातिरथो रणे
vaiśaṃpāyana uvāca
atha duryodhanaḥ karṇo duḥśāsanaviviṃśatī
droṇaśca saha putreṇa kṛpaścātiratho raṇe
- 2
पुनर् ईयुः सुसंरब्धा धनंजयजिघांसया
विस्फारयन्तश्चापानि बलवन्ति दृढानि च
punar īyuḥ susaṃrabdhā dhanaṃjayajighāṃsayā
visphārayantaścāpāni balavanti dṛḍhāni ca
- 3
तान्प्रकीर्णपताकेन रथेनादित्यवर्चसा
प्रत्युद्ययौ महाराज समस्तान्वानरध्वजः
tānprakīrṇapatākena rathenādityavarcasā
pratyudyayau mahārāja samastānvānaradhvajaḥ
- 4
ततः कृपश्च कर्णश्च द्रोणश्च रथिनां वरः
तं महास्त्रैर्महावीर्यं परिवार्य धनंजयम्
tataḥ kṛpaśca karṇaśca droṇaśca rathināṃ varaḥ
taṃ mahāstrairmahāvīryaṃ parivārya dhanaṃjayam
- 5
शरौघान्सम्यग् अस्यन्तो जीमूता इव वार्षिकाः
ववर्षुः शरवर्षाणि प्रपतन्तं किरीटिनम्
śaraughānsamyag asyanto jīmūtā iva vārṣikāḥ
vavarṣuḥ śaravarṣāṇi prapatantaṃ kirīṭinam
- 6
इषुभिर्बहुभिस्तूर्णं समरे लोमवाहिभिः
अदूरात्पर्यवस्थाय पूरयामासुर् आदृताः
iṣubhirbahubhistūrṇaṃ samare lomavāhibhiḥ
adūrātparyavasthāya pūrayāmāsur ādṛtāḥ
- 7
तथावकीर्णस्य हि तैर्दिव्यैर् अस्त्रैः समन्ततः
न तस्य द्व्यङ्गुलम् अपि विवृतं समदृश्यत
tathāvakīrṇasya hi tairdivyair astraiḥ samantataḥ
na tasya dvyaṅgulam api vivṛtaṃ samadṛśyata
- 8
ततः प्रहस्य बीभत्सुर्दिव्यम् ऐन्द्रं महारथः
अस्त्रम् आदित्यसंकाशं गाण्डीवे समयोजयत्
tataḥ prahasya bībhatsurdivyam aindraṃ mahārathaḥ
astram ādityasaṃkāśaṃ gāṇḍīve samayojayat
- 9
स रश्मिभिर् इवादित्यः प्रतपन्समरे बली
किरीटमाली कौन्तेयः सर्वान्प्राच्छादयत्कुरून्
sa raśmibhir ivādityaḥ pratapansamare balī
kirīṭamālī kaunteyaḥ sarvānprācchādayatkurūn
- 10
यथा बलाहके विद्युत्पावको वा शिलोच्चये
तथा गाण्डीवम् अभवद् इन्द्रायुधम् इवाततम्
yathā balāhake vidyutpāvako vā śiloccaye
tathā gāṇḍīvam abhavad indrāyudham ivātatam
- 11
यथा वर्षति पर्जन्ये विद्युद्विभ्राजते दिवि
तथा दश दिशः सर्वाः पतद्गाण्डीवम् आवृणोत्
yathā varṣati parjanye vidyudvibhrājate divi
tathā daśa diśaḥ sarvāḥ patadgāṇḍīvam āvṛṇot
- 12
त्रस्ताश्च रथिनः सर्वे बभूवुस्तत्र सर्वशः
सर्वे शान्तिपरा भूत्वा स्वचित्तानि न लेभिरे
संग्रामविमुखाः सर्वे योधास्ते हतचेतसः
trastāśca rathinaḥ sarve babhūvustatra sarvaśaḥ
sarve śāntiparā bhūtvā svacittāni na lebhire
saṃgrāmavimukhāḥ sarve yodhāste hatacetasaḥ
- 13
एवं सर्वाणि सैन्यानि भग्नानि भरतर्षभ
प्राद्रवन्त दिशः सर्वा निराशानि स्वजीविते
evaṃ sarvāṇi sainyāni bhagnāni bharatarṣabha
prādravanta diśaḥ sarvā nirāśāni svajīvite

