25 shlokas
- 1
अर्जुन उवाच
कर्ण यत्ते सभामध्ये बहु वाचा विकत्थितम्
न मे युधि समो ऽस्तीति तद् इदं प्रत्युपस्थितम्
arjuna uvāca
karṇa yatte sabhāmadhye bahu vācā vikatthitam
na me yudhi samo 'stīti tad idaṃ pratyupasthitam
- 2
अवोचः परुषा वाचो धर्मम् उत्सृज्य केवलम्
इदं तु दुष्करं मन्ये यद् इदं ते चिकीर्षितम्
avocaḥ paruṣā vāco dharmam utsṛjya kevalam
idaṃ tu duṣkaraṃ manye yad idaṃ te cikīrṣitam
- 3
यत्त्वया कथितं पूर्वं माम् अनासाद्य किंचन
तद् अद्य कुरु राधेय कुरुमध्ये मया सह
yattvayā kathitaṃ pūrvaṃ mām anāsādya kiṃcana
tad adya kuru rādheya kurumadhye mayā saha
- 4
यत्सभायां स्म पाञ्चालीं क्लिश्यमानां दुरात्मभिः
दृष्टवान् असि तस्याद्य फलम् आप्नुहि केवलम्
yatsabhāyāṃ sma pāñcālīṃ kliśyamānāṃ durātmabhiḥ
dṛṣṭavān asi tasyādya phalam āpnuhi kevalam
- 5
धर्मपाशनिबद्धेन यन्मया मर्षितं पुरा
तस्य राधेय कोपस्य विजयं पश्य मे मृधे
dharmapāśanibaddhena yanmayā marṣitaṃ purā
tasya rādheya kopasya vijayaṃ paśya me mṛdhe
- 6
एहि कर्ण मया सार्धं प्रतिपद्यस्व संगरम्
प्रेक्षकाः कुरवः सर्वे भवन्तु सहसैनिकाः
ehi karṇa mayā sārdhaṃ pratipadyasva saṃgaram
prekṣakāḥ kuravaḥ sarve bhavantu sahasainikāḥ
- 7
कर्ण उवाच
ब्रवीषि वाचा यत्पार्थ कर्मणा तत्समाचर
अतिशेते हि वै वाचं कर्मेति प्रथितं भुवि
karṇa uvāca
bravīṣi vācā yatpārtha karmaṇā tatsamācara
atiśete hi vai vācaṃ karmeti prathitaṃ bhuvi
- 8
यत्त्वया मर्षितं पूर्वं तद् अशक्तेन मर्षितम्
इति गृह्णामि तत्पार्थ तव दृष्ट्वा पराक्रमम्
yattvayā marṣitaṃ pūrvaṃ tad aśaktena marṣitam
iti gṛhṇāmi tatpārtha tava dṛṣṭvā parākramam
- 9
धर्मपाशनिबद्धेन यदि ते मर्षितं पुरा
तथैव बद्धम् आत्मानम् अबद्धम् इव मन्यसे
dharmapāśanibaddhena yadi te marṣitaṃ purā
tathaiva baddham ātmānam abaddham iva manyase
- 10
यदि तावद्वने वासो यथोक्तश्चरितस्त्वया
तत्त्वं धर्मार्थवित्क्लिष्टः समयं भेत्तुम् इच्छसि
yadi tāvadvane vāso yathoktaścaritastvayā
tattvaṃ dharmārthavitkliṣṭaḥ samayaṃ bhettum icchasi
- 11
यदि शक्रः स्वयं पार्थ युध्यते तव कारणात्
तथापि न व्यथा काचिन्मम स्याद्विक्रमिष्यतः
yadi śakraḥ svayaṃ pārtha yudhyate tava kāraṇāt
tathāpi na vyathā kācinmama syādvikramiṣyataḥ
- 12
अयं कौन्तेय कामस्ते नचिरात्समुपस्थितः
योत्स्यसे त्वं मया सार्धम् अद्य द्रक्ष्यसि मे बलम्
ayaṃ kaunteya kāmaste nacirātsamupasthitaḥ
yotsyase tvaṃ mayā sārdham adya drakṣyasi me balam
- 13
अर्जुन उवाच
इदानीम् एव तावत्त्वम् अपयातो रणान्मम
तेन जीवसि राधेय निहतस्त्वनुजस्तव
arjuna uvāca
idānīm eva tāvattvam apayāto raṇānmama
tena jīvasi rādheya nihatastvanujastava
- 14
भ्रातरं घातयित्वा च त्यक्त्वा रणशिरश्च कः
त्वद् अन्यः पुरुषः सत्सु ब्रूयाद् एवं व्यवस्थितः
bhrātaraṃ ghātayitvā ca tyaktvā raṇaśiraśca kaḥ
tvad anyaḥ puruṣaḥ satsu brūyād evaṃ vyavasthitaḥ
- 15
वैशंपायन उवाच
इति कर्णं ब्रुवन्न् एव बीभत्सुर् अपराजितः
अभ्ययाद्विसृजन्बाणान्कायावरणभेदिनः
vaiśaṃpāyana uvāca
iti karṇaṃ bruvann eva bībhatsur aparājitaḥ
abhyayādvisṛjanbāṇānkāyāvaraṇabhedinaḥ
- 16
प्रतिजग्राह तान्कर्णः शरान् अग्निशिखोपमान्
शरवर्षेण महता वर्षमाण इवाम्बुदः
pratijagrāha tānkarṇaḥ śarān agniśikhopamān
śaravarṣeṇa mahatā varṣamāṇa ivāmbudaḥ
- 17
उत्पेतुः शरजालानि घोररूपाणि सर्वशः
अविध्यद् अश्वान्बाह्वोश्च हस्तावापं पृथक्पृथक्
utpetuḥ śarajālāni ghorarūpāṇi sarvaśaḥ
avidhyad aśvānbāhvośca hastāvāpaṃ pṛthakpṛthak
- 18
सो ऽमृष्यमाणः कर्णस्य निषङ्गस्यावलम्बनम्
चिछेद निशिताग्रेण शरेण नतपर्वणा
so 'mṛṣyamāṇaḥ karṇasya niṣaṅgasyāvalambanam
cicheda niśitāgreṇa śareṇa nataparvaṇā
- 19
उपासङ्गाद् उपादाय कर्णो बाणान् अथापरान्
विव्याध पाण्डवं हस्ते तस्य मुष्टिर् अशीर्यत
upāsaṅgād upādāya karṇo bāṇān athāparān
vivyādha pāṇḍavaṃ haste tasya muṣṭir aśīryata
- 20
ततः पार्थो महाबाहुः कर्णस्य धनुर् अछिनत्
स शक्तिं प्राहिणोत्तस्मै तां पार्थो व्यधमच्छरैः
tataḥ pārtho mahābāhuḥ karṇasya dhanur achinat
sa śaktiṃ prāhiṇottasmai tāṃ pārtho vyadhamaccharaiḥ
- 21
ततो ऽभिपेतुर्बहवो राधेयस्य पदानुगाः
तांश्च गाण्डीवनिर्मुक्तैः प्राहिणोद्यमसादनम्
tato 'bhipeturbahavo rādheyasya padānugāḥ
tāṃśca gāṇḍīvanirmuktaiḥ prāhiṇodyamasādanam
- 22
ततो ऽस्याश्वाञ्शरैस्तीक्ष्णैर्बीभत्सुर्भारसाधनैः
आकर्णमुक्तैर् अभ्यघ्नंस्ते हताः प्रापतन्भुवि
tato 'syāśvāñśaraistīkṣṇairbībhatsurbhārasādhanaiḥ
ākarṇamuktair abhyaghnaṃste hatāḥ prāpatanbhuvi
- 23
अथापरेण बाणेन ज्वलितेन महाभुजः
विव्याध कर्णं कौन्तेयस्तीक्ष्णेनोरसि वीर्यवान्
athāpareṇa bāṇena jvalitena mahābhujaḥ
vivyādha karṇaṃ kaunteyastīkṣṇenorasi vīryavān
- 24
तस्य भित्त्वा तनुत्राणं कायम् अभ्यपतच्छरः
ततः स तमसाविष्टो न स्म किंचित्प्रजज्ञिवान्
tasya bhittvā tanutrāṇaṃ kāyam abhyapataccharaḥ
tataḥ sa tamasāviṣṭo na sma kiṃcitprajajñivān
- 25
स गाढवेदनो हित्वा रणं प्रायाद् उदङ्मुखः
ततो ऽर्जुन उपाक्रोशद् उत्तरश्च महारथः
sa gāḍhavedano hitvā raṇaṃ prāyād udaṅmukhaḥ
tato 'rjuna upākrośad uttaraśca mahārathaḥ

