19 shlokas
- 1
उत्तर उवाच
अद्याहम् अनुगच्छेयं दृढधन्वा गवां पदम्
यदि मे सारथिः कश्चिद्भवेद् अश्वेषु कोविदः
uttara uvāca
adyāham anugaccheyaṃ dṛḍhadhanvā gavāṃ padam
yadi me sārathiḥ kaścidbhaved aśveṣu kovidaḥ
- 2
तम् एव नाधिगच्छामि यो मे यन्ता भवेन्नरः
पश्यध्वं सारथिं क्षिप्रं मम युक्तं प्रयास्यतः
tam eva nādhigacchāmi yo me yantā bhavennaraḥ
paśyadhvaṃ sārathiṃ kṣipraṃ mama yuktaṃ prayāsyataḥ
- 3
अष्टाविंशतिरात्रं वा मासं वा नूनम् अन्ततः
यत्तद् आसीन्महद्युद्धं तत्र मे सारथिर्हतः
aṣṭāviṃśatirātraṃ vā māsaṃ vā nūnam antataḥ
yattad āsīnmahadyuddhaṃ tatra me sārathirhataḥ
- 4
स लभेयं यदि त्वन्यं हययानविदं नरम्
त्वरावान् अद्य यात्वाहं समुच्छ्रितमहाध्वजम्
sa labheyaṃ yadi tvanyaṃ hayayānavidaṃ naram
tvarāvān adya yātvāhaṃ samucchritamahādhvajam
- 5
विगाह्य तत्परानीकं गजवाजिरथाकुलम्
शस्त्रप्रतापनिर्वीर्यान्कुरूञ्जित्वानये पशून्
vigāhya tatparānīkaṃ gajavājirathākulam
śastrapratāpanirvīryānkurūñjitvānaye paśūn
- 6
दुर्योधनं शांतनवं कर्णं वैकर्तनं कृपम्
द्रोणं च सह पुत्रेण महेष्वासान्समागतान्
duryodhanaṃ śāṃtanavaṃ karṇaṃ vaikartanaṃ kṛpam
droṇaṃ ca saha putreṇa maheṣvāsānsamāgatān
- 7
वित्रासयित्वा संग्रामे दानवान् इव वज्रभृत्
अनेनैव मुहूर्तेन पुनः प्रत्यानये पशून्
vitrāsayitvā saṃgrāme dānavān iva vajrabhṛt
anenaiva muhūrtena punaḥ pratyānaye paśūn
- 8
शून्यम् आसाद्य कुरवः प्रयान्त्यादाय गोधनम्
किं नु शक्यं मया कर्तुं यद् अहं तत्र नाभवम्
śūnyam āsādya kuravaḥ prayāntyādāya godhanam
kiṃ nu śakyaṃ mayā kartuṃ yad ahaṃ tatra nābhavam
- 9
पश्येयुर् अद्य मे वीर्यं कुरवस्ते समागताः
किं नु पार्थो ऽर्जुनः साक्षाद् अयम् अस्मान्प्रबाधते
paśyeyur adya me vīryaṃ kuravaste samāgatāḥ
kiṃ nu pārtho 'rjunaḥ sākṣād ayam asmānprabādhate
- 10
वैशंपायन उवाच
तस्य तद्वचनं स्त्रीषु भाषतः स्म पुनः पुनः
नामर्षयत पाञ्चाली बीभत्सोः परिकीर्तनम्
vaiśaṃpāyana uvāca
tasya tadvacanaṃ strīṣu bhāṣataḥ sma punaḥ punaḥ
nāmarṣayata pāñcālī bībhatsoḥ parikīrtanam
- 11
अथैनम् उपसंगम्य स्त्रीमध्यात्सा तपस्विनी
व्रीडमानेव शनकैर् इदं वचनम् अब्रवीत्
athainam upasaṃgamya strīmadhyātsā tapasvinī
vrīḍamāneva śanakair idaṃ vacanam abravīt
- 12
यो ऽसौ बृहद्वारणाभो युवा सुप्रियदर्शनः
बृहन्नडेति विख्यातः पार्थस्यासीत्स सारथिः
yo 'sau bṛhadvāraṇābho yuvā supriyadarśanaḥ
bṛhannaḍeti vikhyātaḥ pārthasyāsītsa sārathiḥ
- 13
धनुष्य् अनवरश्चासीत्तस्य शिष्यो महात्मनः
दृष्टपूर्वो मया वीर चरन्त्या पाण्डवान्प्रति
dhanuṣy anavaraścāsīttasya śiṣyo mahātmanaḥ
dṛṣṭapūrvo mayā vīra carantyā pāṇḍavānprati
- 14
यदा तत्पावको दावम् अदहत्खाण्डवं महत्
अर्जुनस्य तदानेन संगृहीता हयोत्तमाः
yadā tatpāvako dāvam adahatkhāṇḍavaṃ mahat
arjunasya tadānena saṃgṛhītā hayottamāḥ
- 15
तेन सारथिना पार्थः सर्वभूतानि सर्वशः
अजयत्खाण्डवप्रस्थे न हि यन्तास्ति तादृशः
tena sārathinā pārthaḥ sarvabhūtāni sarvaśaḥ
ajayatkhāṇḍavaprasthe na hi yantāsti tādṛśaḥ
- 16
येयं कुमारी सुश्रोणी भगिनी ते यवीयसी
अस्याः स वचनं वीर करिष्यति न संशयः
yeyaṃ kumārī suśroṇī bhaginī te yavīyasī
asyāḥ sa vacanaṃ vīra kariṣyati na saṃśayaḥ
- 17
यदि वै सारथिः स स्यात्कुरून्सर्वान् असंशयम्
जित्वा गाश्च समादाय ध्रुवम् आगमनं भवेत्
yadi vai sārathiḥ sa syātkurūnsarvān asaṃśayam
jitvā gāśca samādāya dhruvam āgamanaṃ bhavet
- 18
एवम् उक्तः स सैरन्ध्र्या भगिनीं प्रत्यभाषत
गच्छ त्वम् अनवद्याङ्गि ताम् आनय बृहन्नडाम्
evam uktaḥ sa sairandhryā bhaginīṃ pratyabhāṣata
gaccha tvam anavadyāṅgi tām ānaya bṛhannaḍām
- 19
सा भ्रात्रा प्रेषिता शीघ्रम् अगच्छन्नर्तनागृहम्
यत्रास्ते स महाबाहुश्छन्नः सत्रेण पाण्डवः
sā bhrātrā preṣitā śīghram agacchannartanāgṛham
yatrāste sa mahābāhuśchannaḥ satreṇa pāṇḍavaḥ

