17 shlokas
- 1
वैशंपायन उवाच
तान्यनीकान्यदृश्यन्त कुरूणाम् उग्रधन्विनाम्
संसर्पन्तो यथा मेघा घर्मान्ते मन्दमारुताः
vaiśaṃpāyana uvāca
tānyanīkānyadṛśyanta kurūṇām ugradhanvinām
saṃsarpanto yathā meghā gharmānte mandamārutāḥ
- 2
अभ्याशे वाजिनस्तस्थुः समारूढाः प्रहारिभिः
भीमरूपाश्च मातङ्गास्तोमराङ्कुशचोदिताः
abhyāśe vājinastasthuḥ samārūḍhāḥ prahāribhiḥ
bhīmarūpāśca mātaṅgāstomarāṅkuśacoditāḥ
- 3
ततः शक्रः सुरगणैः समारुह्य सुदर्शनम्
सहोपायात्तदा राजन्विश्वाश्विमरुतां गणैः
tataḥ śakraḥ suragaṇaiḥ samāruhya sudarśanam
sahopāyāttadā rājanviśvāśvimarutāṃ gaṇaiḥ
- 4
तद्देवयक्षगन्धर्वमहोरगसमाकुलम्
शुशुभे ऽभ्रविनिर्मुक्तं ग्रहैर् इव नभस्तलम्
taddevayakṣagandharvamahoragasamākulam
śuśubhe 'bhravinirmuktaṃ grahair iva nabhastalam
- 5
अस्त्राणां च बलं तेषां मानुषेषु प्रयुज्यताम्
तच्च घोरं महद्युद्धं भीष्मार्जुनसमागमे
astrāṇāṃ ca balaṃ teṣāṃ mānuṣeṣu prayujyatām
tacca ghoraṃ mahadyuddhaṃ bhīṣmārjunasamāgame
- 6
शतं शतसहस्राणां यत्र स्थूणा हिरण्मयाः
मणिरत्नमयाश्चान्याः प्रासादम् उपधारयन्
śataṃ śatasahasrāṇāṃ yatra sthūṇā hiraṇmayāḥ
maṇiratnamayāścānyāḥ prāsādam upadhārayan
- 7
तत्र कामगमं दिव्यं सर्वरत्नविभूषितम्
विमानं देवराजस्य शुशुभे खेचरं तदा
tatra kāmagamaṃ divyaṃ sarvaratnavibhūṣitam
vimānaṃ devarājasya śuśubhe khecaraṃ tadā
- 8
तत्र देवास्त्रयस्त्रिंशत्तिष्ठन्ति सहवासवाः
गन्धर्वा राक्षसाः सर्पाः पितरश्च महर्षिभिः
tatra devāstrayastriṃśattiṣṭhanti sahavāsavāḥ
gandharvā rākṣasāḥ sarpāḥ pitaraśca maharṣibhiḥ
- 9
तथा राजा वसुमना बलाक्षः सुप्रतर्दनः
अष्टकश्च शिबिश्चैव ययातिर्नहुषो गयः
tathā rājā vasumanā balākṣaḥ supratardanaḥ
aṣṭakaśca śibiścaiva yayātirnahuṣo gayaḥ
- 10
मनुः क्षुपो रघुर्भानुः कृशाश्वः सगरः शलः
विमाने देवराजस्य समदृश्यन्त सुप्रभाः
manuḥ kṣupo raghurbhānuḥ kṛśāśvaḥ sagaraḥ śalaḥ
vimāne devarājasya samadṛśyanta suprabhāḥ
- 11
अग्नेर् ईशस्य सोमस्य वरुणस्य प्रजापतेः
तथा धातुर्विधातुश्च कुबेरस्य यमस्य च
agner īśasya somasya varuṇasya prajāpateḥ
tathā dhāturvidhātuśca kuberasya yamasya ca
- 12
अलम्बुसोग्रसेनस्य गन्धर्वस्य च तुम्बुरोः
यथाभागं यथोद्देशं विमानानि चकाशिरे
alambusograsenasya gandharvasya ca tumburoḥ
yathābhāgaṃ yathoddeśaṃ vimānāni cakāśire
- 13
सर्वदेवनिकायाश्च सिद्धाश्च परमर्षयः
अर्जुनस्य कुरूणां च द्रष्टुं युद्धम् उपागताः
sarvadevanikāyāśca siddhāśca paramarṣayaḥ
arjunasya kurūṇāṃ ca draṣṭuṃ yuddham upāgatāḥ
- 14
दिव्यानां तत्र माल्यानां गन्धः पुण्यो ऽथ सर्वशः
प्रससार वसन्ताग्रे वनानाम् इव पुष्पिताम्
divyānāṃ tatra mālyānāṃ gandhaḥ puṇyo 'tha sarvaśaḥ
prasasāra vasantāgre vanānām iva puṣpitām
- 15
रक्तारक्तानि देवानां समदृश्यन्त तिष्ठताम्
आतपत्राणि वासांसि स्रजश्च व्यजनानि च
raktāraktāni devānāṃ samadṛśyanta tiṣṭhatām
ātapatrāṇi vāsāṃsi srajaśca vyajanāni ca
- 16
उपशाम्यद्रजो भौमं सर्वं व्याप्तं मरीचिभिः
दिव्यान्गन्धान् उपादाय वायुर्योधान् असेवत
upaśāmyadrajo bhaumaṃ sarvaṃ vyāptaṃ marīcibhiḥ
divyāngandhān upādāya vāyuryodhān asevata
- 17
प्रभासितम् इवाकाशं चित्ररूपम् अलंकृतम्
संपतद्भिः स्थितैश्चैव नानारत्नावभासितैः
विमानैर्विविधैश्चित्रैर् उपानीतैः सुरोत्तमैः
prabhāsitam ivākāśaṃ citrarūpam alaṃkṛtam
saṃpatadbhiḥ sthitaiścaiva nānāratnāvabhāsitaiḥ
vimānairvividhaiścitrair upānītaiḥ surottamaiḥ

