21 shlokas
- 1
कर्ण उवाच
सर्वान् आयुष्मतो भीतान्संत्रस्तान् इव लक्षये
अयुद्धमनसश्चैव सर्वांश्चैवानवस्थितान्
karṇa uvāca
sarvān āyuṣmato bhītānsaṃtrastān iva lakṣaye
ayuddhamanasaścaiva sarvāṃścaivānavasthitān
- 2
यद्येष राजा मत्स्यानां यदि बीभत्सुर् आगतः
अहम् आवारयिष्यामि वेलेव मकरालयम्
yadyeṣa rājā matsyānāṃ yadi bībhatsur āgataḥ
aham āvārayiṣyāmi veleva makarālayam
- 3
मम चापप्रमुक्तानां शराणां नतपर्वणाम्
नावृत्तिर्गच्छताम् अस्ति सर्पाणाम् इव सर्पताम्
mama cāpapramuktānāṃ śarāṇāṃ nataparvaṇām
nāvṛttirgacchatām asti sarpāṇām iva sarpatām
- 4
रुक्मपुङ्खाः सुतीक्ष्णाग्रा मुक्ता हस्तवता मया
छादयन्तु शराः पार्थं शलभा इव पादपम्
rukmapuṅkhāḥ sutīkṣṇāgrā muktā hastavatā mayā
chādayantu śarāḥ pārthaṃ śalabhā iva pādapam
- 5
शराणां पुङ्खसक्तानां मौर्व्याभिहतया दृढम्
श्रूयतां तलयोः शब्दो भेर्योर् आहतयोर् इव
śarāṇāṃ puṅkhasaktānāṃ maurvyābhihatayā dṛḍham
śrūyatāṃ talayoḥ śabdo bheryor āhatayor iva
- 6
समाहितो हि बीभत्सुर्वर्षाण्यष्टौ च पञ्च च
जातस्नेहश्च युद्धस्य मयि सम्प्रहरिष्यति
samāhito hi bībhatsurvarṣāṇyaṣṭau ca pañca ca
jātasnehaśca yuddhasya mayi samprahariṣyati
- 7
पात्रीभूतश्च कौन्तेयो ब्राह्मणो गुणवान् इव
शरौघान्प्रतिगृह्णातु मया मुक्तान्सहस्रशः
pātrībhūtaśca kaunteyo brāhmaṇo guṇavān iva
śaraughānpratigṛhṇātu mayā muktānsahasraśaḥ
- 8
एष चैव महेष्वासस्त्रिषु लोकेषु विश्रुतः
अहं चापि कुरुश्रेष्ठा अर्जुनान्नावरः क्वचित्
eṣa caiva maheṣvāsastriṣu lokeṣu viśrutaḥ
ahaṃ cāpi kuruśreṣṭhā arjunānnāvaraḥ kvacit
- 9
इतश्चेतश्च निर्मुक्तैः काञ्चनैर्गार्ध्रवाजितैः
दृश्यताम् अद्य वै व्योम खद्योतैर् इव संवृतम्
itaścetaśca nirmuktaiḥ kāñcanairgārdhravājitaiḥ
dṛśyatām adya vai vyoma khadyotair iva saṃvṛtam
- 10
अद्याहम् ऋणम् अक्षय्यं पुरा वाचा प्रतिश्रुतम्
धार्तराष्ट्रस्य दास्यामि निहत्य समरे ऽर्जुनम्
adyāham ṛṇam akṣayyaṃ purā vācā pratiśrutam
dhārtarāṣṭrasya dāsyāmi nihatya samare 'rjunam
- 11
अन्तरा छिद्यमानानां पुङ्खानां व्यतिशीर्यताम्
शलभानाम् इवाकाशे प्रचारः सम्प्रदृश्यताम्
antarā chidyamānānāṃ puṅkhānāṃ vyatiśīryatām
śalabhānām ivākāśe pracāraḥ sampradṛśyatām
- 12
इन्द्राशनिसमस्पर्शं महेन्द्रसमतेजसम्
अर्दयिष्याम्यहं पार्थम् उल्काभिर् इव कुञ्जरम्
indrāśanisamasparśaṃ mahendrasamatejasam
ardayiṣyāmyahaṃ pārtham ulkābhir iva kuñjaram
- 13
तम् अग्निम् इव दुर्धर्षम् असिशक्तिशरेन्धनम्
पाण्डवाग्निम् अहं दीप्तं प्रदहन्तम् इवाहितान्
tam agnim iva durdharṣam asiśaktiśarendhanam
pāṇḍavāgnim ahaṃ dīptaṃ pradahantam ivāhitān
- 14
अश्ववेगपुरोवातो रथौघस्तनयित्नुमान्
शरधारो महामेघः शमयिष्यामि पाण्डवम्
aśvavegapurovāto rathaughastanayitnumān
śaradhāro mahāmeghaḥ śamayiṣyāmi pāṇḍavam
- 15
मत्कार्मुकविनिर्मुक्ताः पार्थम् आशीविषोपमाः
शराः समभिसर्पन्तु वल्मीकम् इव पन्नगाः
matkārmukavinirmuktāḥ pārtham āśīviṣopamāḥ
śarāḥ samabhisarpantu valmīkam iva pannagāḥ
- 16
जामदग्न्यान्मया ह्यस्त्रं यत्प्राप्तम् ऋषिसत्तमात्
तद् उपाश्रित्य वीर्यं च युध्येयम् अपि वासवम्
jāmadagnyānmayā hyastraṃ yatprāptam ṛṣisattamāt
tad upāśritya vīryaṃ ca yudhyeyam api vāsavam
- 17
ध्वजाग्रे वानरस्तिष्ठन्भल्लेन निहतो मया
अद्यैव पततां भूमौ विनदन्भैरवान्रवान्
dhvajāgre vānarastiṣṭhanbhallena nihato mayā
adyaiva patatāṃ bhūmau vinadanbhairavānravān
- 18
शत्रोर्मयाभिपन्नानां भूतानां ध्वजवासिनाम्
दिशः प्रतिष्ठमानानाम् अस्तु शब्दो दिवं गतः
śatrormayābhipannānāṃ bhūtānāṃ dhvajavāsinām
diśaḥ pratiṣṭhamānānām astu śabdo divaṃ gataḥ
- 19
अद्य दुर्योधनस्याहं शल्यं हृदि चिरस्थितम्
समूलम् उद्धरिष्यामि बीभत्सुं पातयन्रथात्
adya duryodhanasyāhaṃ śalyaṃ hṛdi cirasthitam
samūlam uddhariṣyāmi bībhatsuṃ pātayanrathāt
- 20
हताश्वं विरथं पार्थं पौरुषे पर्यवस्थितम्
निःश्वसन्तं यथा नागम् अद्य पश्यन्तु कौरवाः
hatāśvaṃ virathaṃ pārthaṃ pauruṣe paryavasthitam
niḥśvasantaṃ yathā nāgam adya paśyantu kauravāḥ
- 21
कामं गच्छन्तु कुरवो धनम् आदाय केवलम्
रथेषु वापि तिष्ठन्तो युद्धं पश्यन्तु मामकम्
kāmaṃ gacchantu kuravo dhanam ādāya kevalam
ratheṣu vāpi tiṣṭhanto yuddhaṃ paśyantu māmakam

