26 shlokas
- 1
नारद उवाच
शक्रस्य तु सभा दिव्या भास्वरा कर्मभिर्जिता
स्वयं शक्रेण कौरव्य निर्मितार्कसमप्रभा
nārada uvāca
śakrasya tu sabhā divyā bhāsvarā karmabhirjitā
svayaṃ śakreṇa kauravya nirmitārkasamaprabhā
- 2
विस्तीर्णा योजनशतं शतम् अध्यर्धम् आयता
वैहायसी कामगमा पञ्चयोजनम् उच्छ्रिता
vistīrṇā yojanaśataṃ śatam adhyardham āyatā
vaihāyasī kāmagamā pañcayojanam ucchritā
- 3
जराशोकक्लमापेता निरातङ्का शिवा शुभा
वेश्मासनवती रम्या दिव्यपादपशोभिता
jarāśokaklamāpetā nirātaṅkā śivā śubhā
veśmāsanavatī ramyā divyapādapaśobhitā
- 4
तस्यां देवेश्वरः पार्थ सभायां परमासने
आस्ते शच्या महेन्द्राण्या श्रिया लक्ष्म्या च भारत
tasyāṃ deveśvaraḥ pārtha sabhāyāṃ paramāsane
āste śacyā mahendrāṇyā śriyā lakṣmyā ca bhārata
- 5
बिभ्रद्वपुर् अनिर्देश्यं किरीटी लोहिताङ्गदः
विरजोऽम्बरश्चित्रमाल्यो ह्रीकीर्तिद्युतिभिः सह
bibhradvapur anirdeśyaṃ kirīṭī lohitāṅgadaḥ
virajo'mbaraścitramālyo hrīkīrtidyutibhiḥ saha
- 6
तस्याम् उपासते नित्यं महात्मानं शतक्रतुम्
मरुतः सर्वतो राजन्सर्वे च गृहमेधिनः
सिद्धा देवर्षयश्चैव साध्या देवगणास्तथा
मरुत्वन्तश्च सहिता भास्वन्तो हेममालिनः
tasyām upāsate nityaṃ mahātmānaṃ śatakratum
marutaḥ sarvato rājansarve ca gṛhamedhinaḥ
siddhā devarṣayaścaiva sādhyā devagaṇāstathā
marutvantaśca sahitā bhāsvanto hemamālinaḥ
- 7
एते सानुचराः सर्वे दिव्यरूपाः स्वलंकृताः
उपासते महात्मानं देवराजम् अरिंदमम्
ete sānucarāḥ sarve divyarūpāḥ svalaṃkṛtāḥ
upāsate mahātmānaṃ devarājam ariṃdamam
- 8
तथा देवर्षयः सर्वे पार्थ शक्रम् उपासते
अमला धूतपाप्मानो दीप्यमाना इवाग्नयः
तेजस्विनः सोमयुजो विपापा विगतक्लमाः
tathā devarṣayaḥ sarve pārtha śakram upāsate
amalā dhūtapāpmāno dīpyamānā ivāgnayaḥ
tejasvinaḥ somayujo vipāpā vigataklamāḥ
- 9
पराशरः पर्वतश्च तथा सावर्णिगालवौ
एकतश्च द्वितश्चैव त्रितश्चैव महामुनिः
शङ्खश्च लिखितश्चैव तथा गौरशिरा मुनिः
parāśaraḥ parvataśca tathā sāvarṇigālavau
ekataśca dvitaścaiva tritaścaiva mahāmuniḥ
śaṅkhaśca likhitaścaiva tathā gauraśirā muniḥ
- 10
दुर्वासाश्च दीर्घतपा याज्ञवल्क्यो ऽथ भालुकिः
तथा दीर्घतमा मुनिः
पवित्रपाणिः सावर्णिः
उद्दालकः श्वेतकेतुस्तथा शाट्यायनः प्रभुः
durvāsāśca dīrghatapā yājñavalkyo 'tha bhālukiḥ
tathā dīrghatamā muniḥ
pavitrapāṇiḥ sāvarṇiḥ
uddālakaḥ śvetaketustathā śāṭyāyanaḥ prabhuḥ
- 11
हविष्मांश्च गविष्ठश्च हरिश्चन्द्रश्च पार्थिवः
हृद्यश्चोदरशाण्डिल्यः पाराशर्यः कृषीवलः
जाबालिर्वामदेवश्च शक्तिर्गार्ग्यसुवामनौ
haviṣmāṃśca gaviṣṭhaśca hariścandraśca pārthivaḥ
hṛdyaścodaraśāṇḍilyaḥ pārāśaryaḥ kṛṣīvalaḥ
jābālirvāmadevaśca śaktirgārgyasuvāmanau
- 12
वातस्कन्धो विशाखश्च विधाता काल एव च
अनन्तदन्तस्त्वष्टा च विश्वकर्मा च तुम्बुरुः
vātaskandho viśākhaśca vidhātā kāla eva ca
anantadantastvaṣṭā ca viśvakarmā ca tumburuḥ
- 13
अयोनिजा योनिजाश्च वायुभक्षा हुताशिनः
ईशानं सर्वलोकस्य वज्रिणं समुपासते
ayonijā yonijāśca vāyubhakṣā hutāśinaḥ
īśānaṃ sarvalokasya vajriṇaṃ samupāsate
- 14
सहदेवः सुनीथश्च वाल्मीकिश्च महातपाः
समीकः सत्यवांश्चैव प्रचेताः सत्यसंगरः
sahadevaḥ sunīthaśca vālmīkiśca mahātapāḥ
samīkaḥ satyavāṃścaiva pracetāḥ satyasaṃgaraḥ
- 15
मेधातिथिर्वामदेवः पुलस्त्यः पुलहः क्रतुः
मरुत्तश्च मरीचिश्च स्थाणुश्चात्रिर्महातपाः
medhātithirvāmadevaḥ pulastyaḥ pulahaḥ kratuḥ
maruttaśca marīciśca sthāṇuścātrirmahātapāḥ
- 16
कक्षीवान्गौतमस्तार्क्ष्यस्तथा वैश्वानरो मुनिः
षडर्तुः कवषो धूम्रो रैभ्यो नलपरावसू
स्वस्त्यात्रेयो जरत्कारुः कहोᄆअः काश्यपस्तथा
विभण्डको ऋष्यशृङ्ग उन्मुखो विमुखस्तथा
मुनिः कालकवृक्षीय आश्राव्यो ऽथ हिरण्यदः
संवर्तो देवहव्यश्च विष्वक्सेनश्च वीर्यवान्
कण्वः कात्यायनो राजन्गार्ग्यः कौशिक एव तु
kakṣīvāngautamastārkṣyastathā vaiśvānaro muniḥ
ṣaḍartuḥ kavaṣo dhūmro raibhyo nalaparāvasū
svastyātreyo jaratkāruḥ kahoᄆaḥ kāśyapastathā
vibhaṇḍako ṛṣyaśṛṅga unmukho vimukhastathā
muniḥ kālakavṛkṣīya āśrāvyo 'tha hiraṇyadaḥ
saṃvarto devahavyaśca viṣvaksenaśca vīryavān
kaṇvaḥ kātyāyano rājangārgyaḥ kauśika eva tu
- 17
दिव्या आपस्तथौषध्यः श्रद्धा मेधा सरस्वती
अर्थो धर्मश्च कामश्च विद्युतश्चापि पाण्डव
divyā āpastathauṣadhyaḥ śraddhā medhā sarasvatī
artho dharmaśca kāmaśca vidyutaścāpi pāṇḍava
- 18
जलवाहास्तथा मेघा वायवः स्तनयित्नवः
प्राची दिग्यज्ञवाहाश्च पावकाः सप्तविंशतिः
jalavāhāstathā meghā vāyavaḥ stanayitnavaḥ
prācī digyajñavāhāśca pāvakāḥ saptaviṃśatiḥ
- 19
अग्नीषोमौ तथेन्द्राग्नी मित्रो ऽथ सवितार्यमा
भगो विश्वे च साध्याश्च शुक्रो मन्थी च भारत
सर्वेषां मरुतां मान्या गुरुः शुक्रस्तथैव च
विश्वावसुश्चित्रसेनः सुमनस्तरुणस्तथा
agnīṣomau tathendrāgnī mitro 'tha savitāryamā
bhago viśve ca sādhyāśca śukro manthī ca bhārata
sarveṣāṃ marutāṃ mānyā guruḥ śukrastathaiva ca
viśvāvasuścitrasenaḥ sumanastaruṇastathā
- 20
यज्ञाश्च दक्षिणाश्चैव ग्रहाः स्तोभाश्च सर्वशः
यज्ञवाहाश्च ये मन्त्राः सर्वे तत्र समासते
yajñāśca dakṣiṇāścaiva grahāḥ stobhāśca sarvaśaḥ
yajñavāhāśca ye mantrāḥ sarve tatra samāsate
- 21
तथैवाप्सरसो राजन्गन्धर्वाश्च मनोरमाः
रम्भोर्वश्यथ मेनका
घृताची पञ्चचूडा च विप्रचित्तिपुरोगमाः
विश्वावसुश्चित्रसेनः पर्वतस्तुम्बुरुस्तथा
विद्याधरास्तु राजेन्द्र
नृत्यवादित्रगीतैश्च हास्यैश्च विविधैर् अपि
रमयन्ति स्म नृपते देवराजं शतक्रतुम्
tathaivāpsaraso rājangandharvāśca manoramāḥ
rambhorvaśyatha menakā
ghṛtācī pañcacūḍā ca vipracittipurogamāḥ
viśvāvasuścitrasenaḥ parvatastumburustathā
vidyādharāstu rājendra
nṛtyavāditragītaiśca hāsyaiśca vividhair api
ramayanti sma nṛpate devarājaṃ śatakratum
- 22
स्तुतिभिर्मङ्गलैश्चैव स्तुवन्तः कर्मभिस्तथा
विक्रमैश्च महात्मानं बलवृत्रनिषूदनम्
stutibhirmaṅgalaiścaiva stuvantaḥ karmabhistathā
vikramaiśca mahātmānaṃ balavṛtraniṣūdanam
- 23
ब्रह्मराजर्षयः सर्वे सर्वे देवर्षयस्तथा
विमानैर्विविधैर्दिव्यैर्भ्राजमानैर् इवाग्निभिः
brahmarājarṣayaḥ sarve sarve devarṣayastathā
vimānairvividhairdivyairbhrājamānair ivāgnibhiḥ
- 24
स्रग्विणो भूषिताश्चान्ये यान्ति चायान्ति चापरे
बृहस्पतिश्च शुक्रश्च तस्याम् आययतुः सह
sragviṇo bhūṣitāścānye yānti cāyānti cāpare
bṛhaspatiśca śukraśca tasyām āyayatuḥ saha
- 25
एते चान्ये च बहवो यतात्मानो यतव्रताः
विमानैश्चन्द्रसंकाशैः सोमवत्प्रियदर्शनाः
ब्रह्मणो वचनाद्राजन्भृगुः सप्तर्षयस्तथा
ete cānye ca bahavo yatātmāno yatavratāḥ
vimānaiścandrasaṃkāśaiḥ somavatpriyadarśanāḥ
brahmaṇo vacanādrājanbhṛguḥ saptarṣayastathā
- 26
एषा सभा मया राजन्दृष्टा पुष्करमालिनी
शतक्रतोर्महाराज याम्यां शृणु ममानघ
eṣā sabhā mayā rājandṛṣṭā puṣkaramālinī
śatakratormahārāja yāmyāṃ śṛṇu mamānagha

