25 shlokas
- 1
वैशंपायन उवाच
स गत्वा हास्तिनपुरं नकुलः समितिंजयः
भीष्मम् आमन्त्रयामास धृतराष्ट्रं च पाण्डवः
vaiśaṃpāyana uvāca
sa gatvā hāstinapuraṃ nakulaḥ samitiṃjayaḥ
bhīṣmam āmantrayāmāsa dhṛtarāṣṭraṃ ca pāṇḍavaḥ
- 2
प्रययुः प्रीतमनसो यज्ञं ब्रह्मपुरःसराः
संश्रुत्य धर्मराजस्य यज्ञं यज्ञविदस्तदा
prayayuḥ prītamanaso yajñaṃ brahmapuraḥsarāḥ
saṃśrutya dharmarājasya yajñaṃ yajñavidastadā
- 3
अन्ये च शतशस्तुष्टैर्मनोभिर्मनुजर्षभ
द्रष्टुकामाः सभां चैव धर्मराजं च पाण्डवम्
anye ca śataśastuṣṭairmanobhirmanujarṣabha
draṣṭukāmāḥ sabhāṃ caiva dharmarājaṃ ca pāṇḍavam
- 4
दिग्भ्यः सर्वे समापेतुः पार्थिवास्तत्र भारत
समुपादाय रत्नानि विविधानि महान्ति च
digbhyaḥ sarve samāpetuḥ pārthivāstatra bhārata
samupādāya ratnāni vividhāni mahānti ca
- 5
धृतराष्ट्रश्च भीष्मश्च विदुरश्च महामतिः
दुर्योधनपुरोगाश्च भ्रातरः सर्व एव ते
dhṛtarāṣṭraśca bhīṣmaśca viduraśca mahāmatiḥ
duryodhanapurogāśca bhrātaraḥ sarva eva te
- 6
सत्कृत्यामन्त्रिताः सर्वे आचार्यप्रमुखा नृपाः
गान्धारराजः सुबलः शकुनिश्च महाबलः
satkṛtyāmantritāḥ sarve ācāryapramukhā nṛpāḥ
gāndhārarājaḥ subalaḥ śakuniśca mahābalaḥ
- 7
अचलो वृषकश्चैव कर्णश्च रथिनां वरः
ऋतः शल्यो मद्रराजो बाह्लिकश्च महारथः
acalo vṛṣakaścaiva karṇaśca rathināṃ varaḥ
ṛtaḥ śalyo madrarājo bāhlikaśca mahārathaḥ
- 8
सोमदत्तो ऽथ कौरव्यो भूरिर्भूरिश्रवाः शलः
अश्वत्थामा कृपो द्रोणः सैन्धवश्च जयद्रथः
somadatto 'tha kauravyo bhūrirbhūriśravāḥ śalaḥ
aśvatthāmā kṛpo droṇaḥ saindhavaśca jayadrathaḥ
- 9
यज्ञसेनः सपुत्रश्च शाल्वश्च वसुधाधिपः
प्राग्ज्योतिषश्च नृपतिर्भगदत्तो महायशाः
yajñasenaḥ saputraśca śālvaśca vasudhādhipaḥ
prāgjyotiṣaśca nṛpatirbhagadatto mahāyaśāḥ
- 10
सह सर्वैस्तथा म्लेच्छैः सागरानूपवासिभिः
पार्वतीयाश्च राजानो राजा चैव बृहद्बलः
saha sarvaistathā mlecchaiḥ sāgarānūpavāsibhiḥ
pārvatīyāśca rājāno rājā caiva bṛhadbalaḥ
- 11
पौण्ड्रको वासुदेवश्च वङ्गः कालिङ्गकस्तथा
आकर्षः कुन्तलश्चैव वानवास्यान्ध्रकास्तथा
pauṇḍrako vāsudevaśca vaṅgaḥ kāliṅgakastathā
ākarṣaḥ kuntalaścaiva vānavāsyāndhrakāstathā
- 12
द्रविडाः सिंहलाश्चैव राजा काश्मीरकस्तथा
कुन्तिभोजो महातेजाः सुह्मश्च सुमहाबलः
draviḍāḥ siṃhalāścaiva rājā kāśmīrakastathā
kuntibhojo mahātejāḥ suhmaśca sumahābalaḥ
- 13
बाह्लिकाश्चापरे शूरा राजानः सर्व एव ते
विराटः सह पुत्रैश्च माचेल्लश्च महारथः
राजानो राजपुत्राश्च नानाजनपदेश्वराः
bāhlikāścāpare śūrā rājānaḥ sarva eva te
virāṭaḥ saha putraiśca mācellaśca mahārathaḥ
rājāno rājaputrāśca nānājanapadeśvarāḥ
- 14
शिशुपालो महावीर्यः सह पुत्रेण भारत
आगच्छत्पाण्डवेयस्य यज्ञं संग्रामदुर्मदः
śiśupālo mahāvīryaḥ saha putreṇa bhārata
āgacchatpāṇḍaveyasya yajñaṃ saṃgrāmadurmadaḥ
- 15
रामश्चैवानिरुद्धश्च बभ्रुश्च सहसारणः
गदप्रद्युम्नसाम्बाश्च चारुदेष्णश्च वीर्यवान्
rāmaścaivāniruddhaśca babhruśca sahasāraṇaḥ
gadapradyumnasāmbāśca cārudeṣṇaśca vīryavān
- 16
उल्मुको निशठश्चैव वीरः प्राद्युम्निर् एव च
वृष्णयो निखिलेनान्ये समाजग्मुर्महारथाः
ulmuko niśaṭhaścaiva vīraḥ prādyumnir eva ca
vṛṣṇayo nikhilenānye samājagmurmahārathāḥ
- 17
एते चान्ये च बहवो राजानो मध्यदेशजाः
आजग्मुः पाण्डुपुत्रस्य राजसूयं महाक्रतुम्
ete cānye ca bahavo rājāno madhyadeśajāḥ
ājagmuḥ pāṇḍuputrasya rājasūyaṃ mahākratum
- 18
ददुस्तेषाम् आवसथान्धर्मराजस्य शासनात्
बहुकक्ष्यान्वितान्राजन्दीर्घिकावृक्षशोभितान्
dadusteṣām āvasathāndharmarājasya śāsanāt
bahukakṣyānvitānrājandīrghikāvṛkṣaśobhitān
- 19
तथा धर्मात्मजस्तेषां चक्रे पूजाम् अनुत्तमाम्
सत्कृताश्च यथोद्दिष्टाञ्जग्मुर् आवसथान्नृपाः
tathā dharmātmajasteṣāṃ cakre pūjām anuttamām
satkṛtāśca yathoddiṣṭāñjagmur āvasathānnṛpāḥ
- 20
कैलासशिखरप्रख्यान्मनोज्ञान्द्रव्यभूषितान्
सर्वतः संवृतान् उच्चैः प्राकारैः सुकृतैः सितैः
kailāsaśikharaprakhyānmanojñāndravyabhūṣitān
sarvataḥ saṃvṛtān uccaiḥ prākāraiḥ sukṛtaiḥ sitaiḥ
- 21
सुवर्णजालसंवीतान्मणिकुट्टिमशोभितान्
सुखारोहणसोपानान्महासनपरिच्छदान्
suvarṇajālasaṃvītānmaṇikuṭṭimaśobhitān
sukhārohaṇasopānānmahāsanaparicchadān
- 22
स्रग्दामसमवच्छन्नान् उत्तमागुरुगन्धिनः
हंसांशुवर्णसदृशान् आयोजनसुदर्शनान्
sragdāmasamavacchannān uttamāgurugandhinaḥ
haṃsāṃśuvarṇasadṛśān āyojanasudarśanān
- 23
असंबाधान्समद्वारान्युतान् उच्चावचैर्गुणैः
बहुधातुपिनद्धाङ्गान्हिमवच्छिखरान् इव
asaṃbādhānsamadvārānyutān uccāvacairguṇaiḥ
bahudhātupinaddhāṅgānhimavacchikharān iva
- 24
विश्रान्तास्ते ततो ऽपश्यन्भूमिपा भूरिदक्षिणम्
वृतं सदस्यैर्बहुभिर्धर्मराजं युधिष्ठिरम्
viśrāntāste tato 'paśyanbhūmipā bhūridakṣiṇam
vṛtaṃ sadasyairbahubhirdharmarājaṃ yudhiṣṭhiram
- 25
तत्सदः पार्थिवैः कीर्णं ब्राह्मणैश्च महात्मभिः
भ्राजते स्म तदा राजन्नाकपृष्ठम् इवामरैः
tatsadaḥ pārthivaiḥ kīrṇaṃ brāhmaṇaiśca mahātmabhiḥ
bhrājate sma tadā rājannākapṛṣṭham ivāmaraiḥ

