21 shlokas
- 1
युधिष्ठिर उवाच
आमन्त्रयामि भरतांस्तथा वृद्धं पितामहम्
राजानं सोमदत्तं च महाराजं च बाह्लिकम्
yudhiṣṭhira uvāca
āmantrayāmi bharatāṃstathā vṛddhaṃ pitāmaham
rājānaṃ somadattaṃ ca mahārājaṃ ca bāhlikam
- 2
द्रोणं कृपं नृपांश्चान्यान् अश्वत्थामानम् एव च
विदुरं धृतराष्ट्रं च धार्तराष्ट्रांश्च सर्वशः
droṇaṃ kṛpaṃ nṛpāṃścānyān aśvatthāmānam eva ca
viduraṃ dhṛtarāṣṭraṃ ca dhārtarāṣṭrāṃśca sarvaśaḥ
- 3
युयुत्सुं संजयं चैव तथैवान्यान्सभासदः
सर्वान् आमन्त्र्य गच्छामि द्रष्टास्मि पुनर् एत्य वः
yuyutsuṃ saṃjayaṃ caiva tathaivānyānsabhāsadaḥ
sarvān āmantrya gacchāmi draṣṭāsmi punar etya vaḥ
- 4
वैशंपायन उवाच
न च किंचित्तदोचुस्ते ह्रिया सन्तो युधिष्ठिरम्
मनोभिर् एव कल्याणं दध्युस्ते तस्य धीमतः
vaiśaṃpāyana uvāca
na ca kiṃcittadocuste hriyā santo yudhiṣṭhiram
manobhir eva kalyāṇaṃ dadhyuste tasya dhīmataḥ
- 5
विदुर उवाच
आर्या पृथा राजपुत्री नारण्यं गन्तुम् अर्हति
सुकुमारी च वृद्धा च नित्यं चैव सुखोचिता
vidura uvāca
āryā pṛthā rājaputrī nāraṇyaṃ gantum arhati
sukumārī ca vṛddhā ca nityaṃ caiva sukhocitā
- 6
इह वत्स्यति कल्याणी सत्कृता मम वेश्मनि
इति पार्था विजानीध्वम् अगदं वो ऽस्तु सर्वशः
iha vatsyati kalyāṇī satkṛtā mama veśmani
iti pārthā vijānīdhvam agadaṃ vo 'stu sarvaśaḥ
- 7
युधिष्ठिर विजानीहि ममेदं भरतर्षभ
नाधर्मेण जितः कश्चिद्व्यथते वै पराजयात्
yudhiṣṭhira vijānīhi mamedaṃ bharatarṣabha
nādharmeṇa jitaḥ kaścidvyathate vai parājayāt
- 8
त्वं वै धर्मान्विजानीषे युधां वेत्ता धनंजयः
हन्तारीणां भीमसेनो नकुलस्त्वर्थसंग्रही
tvaṃ vai dharmānvijānīṣe yudhāṃ vettā dhanaṃjayaḥ
hantārīṇāṃ bhīmaseno nakulastvarthasaṃgrahī
- 9
संयन्ता सहदेवस्तु धौम्यो ब्रह्मविदुत्तमः
धर्मार्थकुशला चैव द्रौपदी धर्मचारिणी
saṃyantā sahadevastu dhaumyo brahmaviduttamaḥ
dharmārthakuśalā caiva draupadī dharmacāriṇī
- 10
अन्योन्यस्य प्रियाः सर्वे तथैव प्रियवादिनः
परैर् अभेद्याः संतुष्टाः को वो न स्पृहयेद् इह
anyonyasya priyāḥ sarve tathaiva priyavādinaḥ
parair abhedyāḥ saṃtuṣṭāḥ ko vo na spṛhayed iha
- 11
एष वै सर्वकल्याणः समाधिस्तव भारत
नैनं शत्रुर्विषहते शक्रेणापि समो ऽच्युत
eṣa vai sarvakalyāṇaḥ samādhistava bhārata
nainaṃ śatrurviṣahate śakreṇāpi samo 'cyuta
- 12
हिमवत्यनुशिष्टो ऽसि मेरुसावर्णिना पुरा
द्वैपायनेन कृष्णेन नगरे वारणावते
himavatyanuśiṣṭo 'si merusāvarṇinā purā
dvaipāyanena kṛṣṇena nagare vāraṇāvate
- 13
भृगुतुङ्गे च रामेण दृषद्वत्यां च शंभुना
अश्रौषीर् असितस्यापि महर्षेर् अञ्जनं प्रति
bhṛgutuṅge ca rāmeṇa dṛṣadvatyāṃ ca śaṃbhunā
aśrauṣīr asitasyāpi maharṣer añjanaṃ prati
- 14
द्रष्टा सदा नारदस्य धौम्यस्ते ऽयं पुरोहितः
मा हार्षीः सांपराये त्वं बुद्धिं ताम् ऋषिपूजिताम्
draṣṭā sadā nāradasya dhaumyaste 'yaṃ purohitaḥ
mā hārṣīḥ sāṃparāye tvaṃ buddhiṃ tām ṛṣipūjitām
- 15
पुरूरवसम् ऐलं त्वं बुद्ध्या जयसि पाण्डव
शक्त्या जयसि राज्ञो ऽन्यान् ऋषीन्धर्मोपसेवया
purūravasam ailaṃ tvaṃ buddhyā jayasi pāṇḍava
śaktyā jayasi rājño 'nyān ṛṣīndharmopasevayā
- 16
ऐन्द्रे जये धृतमना याम्ये कोपविधारणे
विसर्गे चैव कौबेरे वारुणे चैव संयमे
aindre jaye dhṛtamanā yāmye kopavidhāraṇe
visarge caiva kaubere vāruṇe caiva saṃyame
- 17
आत्मप्रदानं सौम्यत्वम् अद्भ्यश्चैवोपजीवनम्
भूमेः क्षमा च तेजश्च समग्रं सूर्यमण्डलात्
ātmapradānaṃ saumyatvam adbhyaścaivopajīvanam
bhūmeḥ kṣamā ca tejaśca samagraṃ sūryamaṇḍalāt
- 18
वायोर्बलं विद्धि स त्वं भूतेभ्यश्चात्मसंभवम्
अगदं वो ऽस्तु भद्रं वो द्रक्ष्यामि पुनरागतान्
vāyorbalaṃ viddhi sa tvaṃ bhūtebhyaścātmasaṃbhavam
agadaṃ vo 'stu bhadraṃ vo drakṣyāmi punarāgatān
- 19
आपद्धर्मार्थकृच्छ्रेषु सर्वकार्येषु वा पुनः
यथावत्प्रतिपद्येथाः काले काले युधिष्ठिर
āpaddharmārthakṛcchreṣu sarvakāryeṣu vā punaḥ
yathāvatpratipadyethāḥ kāle kāle yudhiṣṭhira
- 20
आपृष्टो ऽसीह कौन्तेय स्वस्ति प्राप्नुहि भारत
कृतार्थं स्वस्तिमन्तं त्वां द्रक्ष्यामः पुनरागतम्
āpṛṣṭo 'sīha kaunteya svasti prāpnuhi bhārata
kṛtārthaṃ svastimantaṃ tvāṃ drakṣyāmaḥ punarāgatam
- 21
वैशंपायन उवाच
एवम् उक्तस्तथेत्युक्त्वा पाण्डवः सत्यविक्रमः
भीष्मद्रोणौ नमस्कृत्य प्रातिष्ठत युधिष्ठिरः
vaiśaṃpāyana uvāca
evam uktastathetyuktvā pāṇḍavaḥ satyavikramaḥ
bhīṣmadroṇau namaskṛtya prātiṣṭhata yudhiṣṭhiraḥ

