15 shlokas
- 1
वैशंपायन उवाच
एवम् उक्त्वा ततो भीष्मो विरराम महायशाः
व्याजहारोत्तरं तत्र सहदेवो ऽर्थवद्वचः
vaiśaṃpāyana uvāca
evam uktvā tato bhīṣmo virarāma mahāyaśāḥ
vyājahārottaraṃ tatra sahadevo 'rthavadvacaḥ
- 2
केशवं केशिहन्तारम् अप्रमेयपराक्रमम्
पूज्यमानं मया यो वः कृष्णं न सहते नृपाः
keśavaṃ keśihantāram aprameyaparākramam
pūjyamānaṃ mayā yo vaḥ kṛṣṇaṃ na sahate nṛpāḥ
- 3
सर्वेषां बलिनां मूर्ध्नि मयेदं निहितं पदम्
एवम् उक्ते मया सम्यग् उत्तरं प्रब्रवीतु सः
sarveṣāṃ balināṃ mūrdhni mayedaṃ nihitaṃ padam
evam ukte mayā samyag uttaraṃ prabravītu saḥ
- 4
मतिमन्तस्तु ये केचिद् आचार्यं पितरं गुरुम्
अर्च्यम् अर्चितम् अर्चार्हम् अनुजानन्तु ते नृपाः
matimantastu ye kecid ācāryaṃ pitaraṃ gurum
arcyam arcitam arcārham anujānantu te nṛpāḥ
- 5
ततो न व्याजहारैषां कश्चिद्बुद्धिमतां सताम्
मानिनां बलिनां राज्ञां मध्ये संदर्शिते पदे
tato na vyājahāraiṣāṃ kaścidbuddhimatāṃ satām
mānināṃ balināṃ rājñāṃ madhye saṃdarśite pade
- 6
ततो ऽपतत्पुष्पवृष्टिः सहदेवस्य मूर्धनि
अदृश्यरूपा वाचश्चाप्यब्रुवन्साधु साध्विति
tato 'patatpuṣpavṛṣṭiḥ sahadevasya mūrdhani
adṛśyarūpā vācaścāpyabruvansādhu sādhviti
- 7
आविध्यद् अजिनं कृष्णं भविष्यद्भूतजल्पकः
सर्वसंशयनिर्मोक्ता नारदः सर्वलोकवित्
āvidhyad ajinaṃ kṛṣṇaṃ bhaviṣyadbhūtajalpakaḥ
sarvasaṃśayanirmoktā nāradaḥ sarvalokavit
- 8
तत्राहूतागताः सर्वे सुनीथप्रमुखा गणाः
सम्प्रादृश्यन्त संक्रुद्धा विवर्णवदनास्तथा
tatrāhūtāgatāḥ sarve sunīthapramukhā gaṇāḥ
samprādṛśyanta saṃkruddhā vivarṇavadanāstathā
- 9
युधिष्ठिराभिषेकं च वासुदेवस्य चार्हणम्
अब्रुवंस्तत्र राजानो निर्वेदाद् आत्मनिश्चयात्
yudhiṣṭhirābhiṣekaṃ ca vāsudevasya cārhaṇam
abruvaṃstatra rājāno nirvedād ātmaniścayāt
- 10
सुहृद्भिर्वार्यमाणानां तेषां हि वपुर् आबभौ
आमिषाद् अपकृष्टानां सिंहानाम् इव गर्जताम्
suhṛdbhirvāryamāṇānāṃ teṣāṃ hi vapur ābabhau
āmiṣād apakṛṣṭānāṃ siṃhānām iva garjatām
- 11
तं बलौघम् अपर्यन्तं राजसागरम् अक्षयम्
कुर्वाणं समयं कृष्णो युद्धाय बुबुधे तदा
taṃ balaugham aparyantaṃ rājasāgaram akṣayam
kurvāṇaṃ samayaṃ kṛṣṇo yuddhāya bubudhe tadā
- 12
पूजयित्वा तु पूजार्हं ब्रह्मक्षत्रं विशेषतः
सहदेवो नृणां देवः समापयत कर्म तत्
pūjayitvā tu pūjārhaṃ brahmakṣatraṃ viśeṣataḥ
sahadevo nṛṇāṃ devaḥ samāpayata karma tat
- 13
तस्मिन्न् अभ्यर्चिते कृष्णे सुनीथः शत्रुकर्षणः
अतिताम्रेक्षणः कोपाद् उवाच मनुजाधिपान्
tasminn abhyarcite kṛṣṇe sunīthaḥ śatrukarṣaṇaḥ
atitāmrekṣaṇaḥ kopād uvāca manujādhipān
- 14
स्थितः सेनापतिर्वो ऽहं मन्यध्वं किं नु सांप्रतम्
युधि तिष्ठाम संनह्य समेतान्वृष्णिपाण्डवान्
sthitaḥ senāpatirvo 'haṃ manyadhvaṃ kiṃ nu sāṃpratam
yudhi tiṣṭhāma saṃnahya sametānvṛṣṇipāṇḍavān
- 15
इति सर्वान्समुत्साह्य राज्ञस्तांश्चेदिपुंगवः
यज्ञोपघाताय ततः सो ऽमन्त्रयत राजभिः
iti sarvānsamutsāhya rājñastāṃścedipuṃgavaḥ
yajñopaghātāya tataḥ so 'mantrayata rājabhiḥ

