10 shlokas
- 1
विदुर उवाच
द्यूतं मूलं कलहस्यानुपाति मिथोभेदाय महते वा रणाय
यद् आस्थितो ऽयं धृतराष्ट्रस्य पुत्रो दुर्योधनः सृजते वैरम् उग्रम्
vidura uvāca
dyūtaṃ mūlaṃ kalahasyānupāti mithobhedāya mahate vā raṇāya
yad āsthito 'yaṃ dhṛtarāṣṭrasya putro duryodhanaḥ sṛjate vairam ugram
- 2
प्रातिपीयाः शांतनवा भैमसेनाः सबाह्लिकाः
दुर्योधनापराधेन कृच्छ्रं प्राप्स्यन्ति सर्वशः
prātipīyāḥ śāṃtanavā bhaimasenāḥ sabāhlikāḥ
duryodhanāparādhena kṛcchraṃ prāpsyanti sarvaśaḥ
- 3
दुर्योधनो मदेनैव क्षेमं राष्ट्राद् अपोहति
विषाणं गौर् इव मदात्स्वयम् आरुजते बलात्
duryodhano madenaiva kṣemaṃ rāṣṭrād apohati
viṣāṇaṃ gaur iva madātsvayam ārujate balāt
- 4
यश्चित्तम् अन्वेति परस्य राजन्वीरः कविः स्वाम् अतिपत्य दृष्टिम्
नावं समुद्र इव बालनेत्राम् आरुह्य घोरे व्यसने निमज्जेत्
yaścittam anveti parasya rājanvīraḥ kaviḥ svām atipatya dṛṣṭim
nāvaṃ samudra iva bālanetrām āruhya ghore vyasane nimajjet
- 5
दुर्योधनो ग्लहते पाण्डवेन प्रियायसे त्वं जयतीति तच्च
अतिनर्माज्जायते संप्रहारो यतो विनाशः समुपैति पुंसाम्
duryodhano glahate pāṇḍavena priyāyase tvaṃ jayatīti tacca
atinarmājjāyate saṃprahāro yato vināśaḥ samupaiti puṃsām
- 6
आकर्षस्ते ऽवाक्फलः कुप्रणीतो हृदि प्रौढो मन्त्रपदः समाधिः
युधिष्ठिरेण सफलः संस्तवो ऽस्तु साम्नः सुरिक्तो ऽरिमतेः सुधन्वा
ākarṣaste 'vākphalaḥ kupraṇīto hṛdi prauḍho mantrapadaḥ samādhiḥ
yudhiṣṭhireṇa saphalaḥ saṃstavo 'stu sāmnaḥ surikto 'rimateḥ sudhanvā
- 7
प्रातिपीयाः शांतनवाश्च राजन्काव्यां वाचं शृणुत मात्यगाद्वः
वैश्वानरं प्रज्वलितं सुघोरम् अयुद्धेन प्रशमयतोत्पतन्तम्
prātipīyāḥ śāṃtanavāśca rājankāvyāṃ vācaṃ śṛṇuta mātyagādvaḥ
vaiśvānaraṃ prajvalitaṃ sughoram ayuddhena praśamayatotpatantam
- 8
यदा मन्युं पाण्डवो ऽजातशत्रुर्न संयच्छेद् अक्षमयाभिभूतः
वृकोदरः सव्यसाची यमौ च को ऽत्र द्वीपः स्यात्तुमुले वस्तदानीम्
yadā manyuṃ pāṇḍavo 'jātaśatrurna saṃyacched akṣamayābhibhūtaḥ
vṛkodaraḥ savyasācī yamau ca ko 'tra dvīpaḥ syāttumule vastadānīm
- 9
महाराज प्रभवस्त्वं धनानां पुरा द्यूतान्मनसा यावद् इच्छेः
बहु वित्तं पाण्डवांश्चेज्जयेस्त्वं किं तेन स्याद्वसु विन्देह पार्थान्
mahārāja prabhavastvaṃ dhanānāṃ purā dyūtānmanasā yāvad iccheḥ
bahu vittaṃ pāṇḍavāṃścejjayestvaṃ kiṃ tena syādvasu vindeha pārthān
- 10
जानीमहे देवितं सौबलस्य वेद द्यूते निकृतिं पार्वतीयः
यतः प्राप्तः शकुनिस्तत्र यातु मायायोधी भारत पार्वतीयः
jānīmahe devitaṃ saubalasya veda dyūte nikṛtiṃ pārvatīyaḥ
yataḥ prāptaḥ śakunistatra yātu māyāyodhī bhārata pārvatīyaḥ

