18 shlokas
- 1
वैशंपायन उवाच
पितामहं गुरुं चैव प्रत्युद्गम्य युधिष्ठिरः
अभिवाद्य ततो राजन्न् इदं वचनम् अब्रवीत्
भीष्मं द्रोणं कृपं द्रौणिं दुर्योधनविविंशती
vaiśaṃpāyana uvāca
pitāmahaṃ guruṃ caiva pratyudgamya yudhiṣṭhiraḥ
abhivādya tato rājann idaṃ vacanam abravīt
bhīṣmaṃ droṇaṃ kṛpaṃ drauṇiṃ duryodhanaviviṃśatī
- 2
अस्मिन्यज्ञे भवन्तो माम् अनुगृह्णन्तु सर्वशः
इदं वः स्वम् अहं चैव यद् इहास्ति धनं मम
प्रीणयन्तु भवन्तो मां यथेष्टम् अनियन्त्रिताः
asminyajñe bhavanto mām anugṛhṇantu sarvaśaḥ
idaṃ vaḥ svam ahaṃ caiva yad ihāsti dhanaṃ mama
prīṇayantu bhavanto māṃ yatheṣṭam aniyantritāḥ
- 3
एवम् उक्त्वा स तान्सर्वान्दीक्षितः पाण्डवाग्रजः
युयोज ह यथायोगम् अधिकारेष्वनन्तरम्
evam uktvā sa tānsarvāndīkṣitaḥ pāṇḍavāgrajaḥ
yuyoja ha yathāyogam adhikāreṣvanantaram
- 4
भक्ष्यभोज्याधिकारेषु दुःशासनम् अयोजयत्
परिग्रहे ब्राह्मणानाम् अश्वत्थामानम् उक्तवान्
bhakṣyabhojyādhikāreṣu duḥśāsanam ayojayat
parigrahe brāhmaṇānām aśvatthāmānam uktavān
- 5
राज्ञां तु प्रतिपूजार्थं संजयं संन्ययोजयत्
कृताकृतपरिज्ञाने भीष्मद्रोणौ महामती
rājñāṃ tu pratipūjārthaṃ saṃjayaṃ saṃnyayojayat
kṛtākṛtaparijñāne bhīṣmadroṇau mahāmatī
- 6
हिरण्यस्य सुवर्णस्य रत्नानां चान्ववेक्षणे
दक्षिणानां च वै दाने कृपं राजा न्ययोजयत्
तथान्यान्पुरुषव्याघ्रांस्तस्मिंस्तस्मिन्न्ययोजयत्
hiraṇyasya suvarṇasya ratnānāṃ cānvavekṣaṇe
dakṣiṇānāṃ ca vai dāne kṛpaṃ rājā nyayojayat
tathānyānpuruṣavyāghrāṃstasmiṃstasminnyayojayat
- 7
बाह्लिको धृतराष्ट्रश्च सोमदत्तो जयद्रथः
नकुलेन समानीताः स्वामिवत्तत्र रेमिरे
bāhliko dhṛtarāṣṭraśca somadatto jayadrathaḥ
nakulena samānītāḥ svāmivattatra remire
- 8
क्षत्ता व्ययकरस्त्वासीद्विदुरः सर्वधर्मवित्
दुर्योधनस्त्वर्हणानि प्रतिजग्राह सर्वशः
kṣattā vyayakarastvāsīdviduraḥ sarvadharmavit
duryodhanastvarhaṇāni pratijagrāha sarvaśaḥ
- 9
सर्वलोकः समावृत्तः पिप्रीषुः फलम् उत्तमम्
द्रष्टुकामः सभां चैव धर्मराजं च पाण्डवम्
sarvalokaḥ samāvṛttaḥ piprīṣuḥ phalam uttamam
draṣṭukāmaḥ sabhāṃ caiva dharmarājaṃ ca pāṇḍavam
- 10
न कश्चिद् आहरत्तत्र सहस्रावरम् अर्हणम्
रत्नैश्च बहुभिस्तत्र धर्मराजम् अवर्धयन्
na kaścid āharattatra sahasrāvaram arhaṇam
ratnaiśca bahubhistatra dharmarājam avardhayan
- 11
कथं नु मम कौरव्यो रत्नदानैः समाप्नुयात्
यज्ञम् इत्येव राजानः स्पर्धमाना ददुर्धनम्
kathaṃ nu mama kauravyo ratnadānaiḥ samāpnuyāt
yajñam ityeva rājānaḥ spardhamānā dadurdhanam
- 12
भवनैः सविमानाग्रैः सोदर्कैर्बलसंवृतैः
लोकराजविमानैश्च ब्राह्मणावसथैः सह
bhavanaiḥ savimānāgraiḥ sodarkairbalasaṃvṛtaiḥ
lokarājavimānaiśca brāhmaṇāvasathaiḥ saha
- 13
कृतैर् आवसथैर्दिव्यैर्विमानप्रतिमैस्तथा
विचित्रै रत्नवद्भिश्च ऋद्ध्या परमया युतैः
kṛtair āvasathairdivyairvimānapratimaistathā
vicitrai ratnavadbhiśca ṛddhyā paramayā yutaiḥ
- 14
राजभिश्च समावृत्तैर् अतीवश्रीसमृद्धिभिः
अशोभत सदो राजन्कौन्तेयस्य महात्मनः
rājabhiśca samāvṛttair atīvaśrīsamṛddhibhiḥ
aśobhata sado rājankaunteyasya mahātmanaḥ
- 15
ऋद्ध्या च वरुणं देवं स्पर्धमानो युधिष्ठिरः
षडग्निनाथ यज्ञेन सो ऽयजद्दक्षिणावता
सर्वाञ्जनान्सर्वकामैः समृद्धैः समतर्पयत्
ṛddhyā ca varuṇaṃ devaṃ spardhamāno yudhiṣṭhiraḥ
ṣaḍagninātha yajñena so 'yajaddakṣiṇāvatā
sarvāñjanānsarvakāmaiḥ samṛddhaiḥ samatarpayat
- 16
अन्नवान्बहुभक्ष्यश्च भुक्तवज्जनसंवृतः
रत्नोपहारकर्मण्यो बभूव स समागमः
annavānbahubhakṣyaśca bhuktavajjanasaṃvṛtaḥ
ratnopahārakarmaṇyo babhūva sa samāgamaḥ
- 17
इडाज्यहोमाहुतिभिर्मन्त्रशिक्षासमन्वितैः
तस्मिन्हि ततृपुर्देवास्तते यज्ञे महर्षिभिः
iḍājyahomāhutibhirmantraśikṣāsamanvitaiḥ
tasminhi tatṛpurdevāstate yajñe maharṣibhiḥ
- 18
यथा देवास्तथा विप्रा दक्षिणान्नमहाधनैः
ततृपुः सर्ववर्णाश्च तस्मिन्यज्ञे मुदान्विताः
yathā devāstathā viprā dakṣiṇānnamahādhanaiḥ
tatṛpuḥ sarvavarṇāśca tasminyajñe mudānvitāḥ

