18 shlokas
- 1
संजय उवाच
तस्मिन्युद्धे महाराज सम्प्रवृत्ते सुदारुणे
उपविष्टेषु सर्वेषु पाण्डवेषु महात्मसु
saṃjaya uvāca
tasminyuddhe mahārāja sampravṛtte sudāruṇe
upaviṣṭeṣu sarveṣu pāṇḍaveṣu mahātmasu
- 2
ततस्तालध्वजो रामस्तयोर्युद्ध उपस्थिते
श्रुत्वा तच्छिष्ययो राजन्न् आजगाम हलायुधः
tatastāladhvajo rāmastayoryuddha upasthite
śrutvā tacchiṣyayo rājann ājagāma halāyudhaḥ
- 3
तं दृष्ट्वा परमप्रीताः पूजयित्वा नराधिपाः
शिष्ययोः कौशलं युद्धे पश्य रामेति चाब्रुवन्
taṃ dṛṣṭvā paramaprītāḥ pūjayitvā narādhipāḥ
śiṣyayoḥ kauśalaṃ yuddhe paśya rāmeti cābruvan
- 4
अब्रवीच्च तदा रामो दृष्ट्वा कृष्णं च पाण्डवम्
दुर्योधनं च कौरव्यं गदापाणिम् अवस्थितम्
abravīcca tadā rāmo dṛṣṭvā kṛṣṇaṃ ca pāṇḍavam
duryodhanaṃ ca kauravyaṃ gadāpāṇim avasthitam
- 5
चत्वारिंशद् अहान्यद्य द्वे च मे निःसृतस्य वै
पुष्येण सम्प्रयातो ऽस्मि श्रवणे पुनरागतः
शिष्ययोर्वै गदायुद्धं द्रष्टुकामो ऽस्मि माधव
catvāriṃśad ahānyadya dve ca me niḥsṛtasya vai
puṣyeṇa samprayāto 'smi śravaṇe punarāgataḥ
śiṣyayorvai gadāyuddhaṃ draṣṭukāmo 'smi mādhava
- 6
ततो युधिष्ठिरो राजा परिष्वज्य हलायुधम्
स्वागतं कुशलं चास्मै पर्यपृच्छद्यथातथम्
tato yudhiṣṭhiro rājā pariṣvajya halāyudham
svāgataṃ kuśalaṃ cāsmai paryapṛcchadyathātatham
- 7
कृष्णौ चापि महेष्वासावभिवाद्य हलायुधम्
सस्वजाते परिप्रीतौ प्रियमाणौ यशस्विनौ
kṛṣṇau cāpi maheṣvāsāvabhivādya halāyudham
sasvajāte pariprītau priyamāṇau yaśasvinau
- 8
माद्रीपुत्रौ तथा शूरौ द्रौपद्याः पञ्च चात्मजाः
अभिवाद्य स्थिता राजन्रौहिणेयं महाबलम्
mādrīputrau tathā śūrau draupadyāḥ pañca cātmajāḥ
abhivādya sthitā rājanrauhiṇeyaṃ mahābalam
- 9
भीमसेनो ऽथ बलवान्पुत्रस्तव जनाधिप
तथैव चोद्यतगदौ पूजयामासतुर्बलम्
bhīmaseno 'tha balavānputrastava janādhipa
tathaiva codyatagadau pūjayāmāsaturbalam
- 10
स्वागतेन च ते तत्र प्रतिपूज्य पुनः पुनः
पश्य युद्धं महाबाहो इति ते रामम् अब्रुवन्
एवम् ऊचुर्महात्मानं रौहिणेयं नराधिपाः
svāgatena ca te tatra pratipūjya punaḥ punaḥ
paśya yuddhaṃ mahābāho iti te rāmam abruvan
evam ūcurmahātmānaṃ rauhiṇeyaṃ narādhipāḥ
- 11
परिष्वज्य तदा रामः पाण्डवान्सृञ्जयान् अपि
अपृच्छत्कुशलं सर्वान्पाण्डवांश्चामितौजसः
तथैव ते समासाद्य पप्रच्छुस्तम् अनामयम्
pariṣvajya tadā rāmaḥ pāṇḍavānsṛñjayān api
apṛcchatkuśalaṃ sarvānpāṇḍavāṃścāmitaujasaḥ
tathaiva te samāsādya papracchustam anāmayam
- 12
प्रत्यभ्यर्च्य हली सर्वान्क्षत्रियांश्च महामनाः
कृत्वा कुशलसंयुक्तां संविदं च यथावयः
pratyabhyarcya halī sarvānkṣatriyāṃśca mahāmanāḥ
kṛtvā kuśalasaṃyuktāṃ saṃvidaṃ ca yathāvayaḥ
- 13
जनार्दनं सात्यकिं च प्रेम्णा स परिषस्वजे
मूर्ध्नि चैतावुपाघ्राय कुशलं पर्यपृच्छत
janārdanaṃ sātyakiṃ ca premṇā sa pariṣasvaje
mūrdhni caitāvupāghrāya kuśalaṃ paryapṛcchata
- 14
तौ चैनं विधिवद्राजन्पूजयामासतुर्गुरुम्
ब्रह्माणम् इव देवेशम् इन्द्रोपेन्द्रौ मुदा युतौ
tau cainaṃ vidhivadrājanpūjayāmāsaturgurum
brahmāṇam iva deveśam indropendrau mudā yutau
- 15
ततो ऽब्रवीद्धर्मसुतो रौहिणेयम् अरिंदमम्
इदं भ्रात्रोर्महायुद्धं पश्य रामेति भारत
tato 'bravīddharmasuto rauhiṇeyam ariṃdamam
idaṃ bhrātrormahāyuddhaṃ paśya rāmeti bhārata
- 16
तेषां मध्ये महाबाहुः श्रीमान्केशवपूर्वजः
न्यविशत्परमप्रीतः पूज्यमानो महारथैः
teṣāṃ madhye mahābāhuḥ śrīmānkeśavapūrvajaḥ
nyaviśatparamaprītaḥ pūjyamāno mahārathaiḥ
- 17
स बभौ राजमध्यस्थो नीलवासाः सितप्रभः
दिवीव नक्षत्रगणैः परिकीर्णो निशाकरः
sa babhau rājamadhyastho nīlavāsāḥ sitaprabhaḥ
divīva nakṣatragaṇaiḥ parikīrṇo niśākaraḥ
- 18
ततस्तयोः संनिपातस्तुमुलो रोमहर्षणः
आसीद् अन्तकरो राजन्वैरस्य तव पुत्रयोः
tatastayoḥ saṃnipātastumulo romaharṣaṇaḥ
āsīd antakaro rājanvairasya tava putrayoḥ

