32 shlokas
- 1
अथातो योनिव्यापत्प्रतिषेधं व्याख्यास्यामः
athāto yonivyāpatpratiṣedhaṃ vyākhyāsyāmaḥ
- 2
यथोवाच भगवान्धन्वन्तरिः
yathovāca bhagavāndhanvantariḥ
- 3
प्रवृद्धलिङ्गं पुरुषं यात्यर्थम् उपसेवते
रूक्षदुर्बलबाला या तस्या वायुः प्रकुप्यति
pravṛddhaliṅgaṃ puruṣaṃ yātyartham upasevate
rūkṣadurbalabālā yā tasyā vāyuḥ prakupyati
- 4
स दुष्टो योनिमासाद्य योनिरोगाय कल्पते
त्रयाणाम् अपि दोषाणां यथास्वं लक्षणेन तु
sa duṣṭo yonimāsādya yonirogāya kalpate
trayāṇām api doṣāṇāṃ yathāsvaṃ lakṣaṇena tu
- 5
विंशतिर्व्यापदो योनेर्निर्दिष्टा रोगसंग्रहे
मिथ्याचारेण याः स्त्रीणां प्रदुष्टेनार्तवेन च
viṃśatirvyāpado yonernirdiṣṭā rogasaṃgrahe
mithyācāreṇa yāḥ strīṇāṃ praduṣṭenārtavena ca
- 6
जायन्ते बीजदोषाच्च दैवाच्च शृणु ताः पृथक्
उदावर्ता तथा वन्ध्या विप्लुता च परिप्लुता
jāyante bījadoṣācca daivācca śṛṇu tāḥ pṛthak
udāvartā tathā vandhyā viplutā ca pariplutā
- 7
वातला चेति वातोत्थाः पित्तोत्था रुधिरक्षरा
वामिनी स्रंसिनी चापि पुत्रघ्नी पित्तला च या
vātalā ceti vātotthāḥ pittotthā rudhirakṣarā
vāminī sraṃsinī cāpi putraghnī pittalā ca yā
- 8
अत्यानन्दा च या योनिः कर्णिनी चरणाद्वयम्
श्लेष्मला च कफाज्ज्ञेया षण्डाख्या फलिनी तथा
atyānandā ca yā yoniḥ karṇinī caraṇādvayam
śleṣmalā ca kaphājjñeyā ṣaṇḍākhyā phalinī tathā
- 9
महती सूचिवक्त्रा च सर्वजेति त्रिदोषजा
सफेनिलमुदावर्ता रजः कृच्छ्रेण मुञ्चति
mahatī sūcivaktrā ca sarvajeti tridoṣajā
saphenilamudāvartā rajaḥ kṛcchreṇa muñcati
- 10
वन्ध्यां नष्टार्तवां विद्याद्विप्लुतां नित्यवेदनाम्
परिप्लुतायां भवति ग्राम्यधर्मे रुजा भृशम्
vandhyāṃ naṣṭārtavāṃ vidyādviplutāṃ nityavedanām
pariplutāyāṃ bhavati grāmyadharme rujā bhṛśam
- 11
वातला कर्कशा स्तब्धा शूलनिस्तोदपीडिता
चतसृष्वपि चाद्यासु भवन्त्यनिलवेदनाः
vātalā karkaśā stabdhā śūlanistodapīḍitā
catasṛṣvapi cādyāsu bhavantyanilavedanāḥ
- 12
सदाहं प्रक्षरत्यस्रं यस्यां सा लोहितक्षरा
सवातमुद्गिरेद्बीजं वामिनी रजसा युतम्
sadāhaṃ prakṣaratyasraṃ yasyāṃ sā lohitakṣarā
savātamudgiredbījaṃ vāminī rajasā yutam
- 13
प्रस्रंसिनी स्यन्दते तु क्षोभिता दुःप्रसूश्च या
स्थितं स्थितं हन्ति गर्भं पुत्रघ्नी रक्तसंस्रवात्
prasraṃsinī syandate tu kṣobhitā duḥprasūśca yā
sthitaṃ sthitaṃ hanti garbhaṃ putraghnī raktasaṃsravāt
- 14
अत्यर्थं पित्तला योनिर्दाहपाकज्वरान्विता
चतसृष्वपि चाद्यासु पित्तलिङ्गोच्छ्रयो भवेत्
atyarthaṃ pittalā yonirdāhapākajvarānvitā
catasṛṣvapi cādyāsu pittaliṅgocchrayo bhavet
- 15
अत्यानन्दा न संतोषं ग्राम्यधर्मेण गच्छति
कर्णिन्यां कर्णिका योनौ श्लेष्मासृग्भ्यां प्रजायते
atyānandā na saṃtoṣaṃ grāmyadharmeṇa gacchati
karṇinyāṃ karṇikā yonau śleṣmāsṛgbhyāṃ prajāyate
- 16
मैथुने ऽचरणा पूर्वं पुरुषादतिरिच्यते
बहुशश्चातिचरणादन्या बीजं न विन्दति
maithune 'caraṇā pūrvaṃ puruṣādatiricyate
bahuśaścāticaraṇādanyā bījaṃ na vindati
- 17
श्लेष्मला पिच्छिला योनिः कण्डूयुक्तातिशीतला
चतसृष्वपि चाद्यासु श्लेष्मलिङ्गोच्छ्रितिर्भवेत्
śleṣmalā picchilā yoniḥ kaṇḍūyuktātiśītalā
catasṛṣvapi cādyāsu śleṣmaliṅgocchritirbhavet
- 18
अनार्तवस्तना षण्डी खरस्पर्शा च मैथुने
अतिकायगृहीतायास्तरुण्याः फलिनी भवेत्
anārtavastanā ṣaṇḍī kharasparśā ca maithune
atikāyagṛhītāyāstaruṇyāḥ phalinī bhavet
- 19
विवृतातिमहायोनिः सूचीवक्त्रातिसंवृता
सर्वलिङ्गसमुत्थाना सर्वदोषप्रकोपजा
vivṛtātimahāyoniḥ sūcīvaktrātisaṃvṛtā
sarvaliṅgasamutthānā sarvadoṣaprakopajā
- 20
चतसृष्वपि चाद्यासु सर्वलिङ्गोच्छ्रितिर्भवेत्
पञ्चासाध्या भवन्तीमा योनयः सर्वदोषजाः
catasṛṣvapi cādyāsu sarvaliṅgocchritirbhavet
pañcāsādhyā bhavantīmā yonayaḥ sarvadoṣajāḥ
- 21
प्रतिदोषं तु साध्यासु स्नेहादिक्रम इष्यते
दद्यादुत्तरबस्तींश्च विशेषेण यथोदितान्
pratidoṣaṃ tu sādhyāsu snehādikrama iṣyate
dadyāduttarabastīṃśca viśeṣeṇa yathoditān
- 22
कर्कशां शीतलां स्तब्धामल्पस्पर्शां च मैथुने
कुम्भीस्वेदैरुपचरेत्सानूपौदकसंयुतैः
karkaśāṃ śītalāṃ stabdhāmalpasparśāṃ ca maithune
kumbhīsvedairupacaretsānūpaudakasaṃyutaiḥ
- 23
मधुरौषधसंयुक्तान्वेसवारांश्च योनिषु
निक्षिपेद्धारयेच्चापि पिचुतैलम् अतन्द्रितः
madhurauṣadhasaṃyuktānvesavārāṃśca yoniṣu
nikṣipeddhārayeccāpi picutailam atandritaḥ
- 24
धावनानि च पथ्यानि कुर्वीतापूरणानि च
ओषचोषान्वितासूक्तं कुर्याच्छीतं विधिं भिषक्
dhāvanāni ca pathyāni kurvītāpūraṇāni ca
oṣacoṣānvitāsūktaṃ kuryācchītaṃ vidhiṃ bhiṣak
- 25
दुर्गन्धां पिच्छिलां चापि चूर्णैः पञ्चकषायजैः
पूरयेद्राजवृक्षादिकषायैश्चापि धावनम्
durgandhāṃ picchilāṃ cāpi cūrṇaiḥ pañcakaṣāyajaiḥ
pūrayedrājavṛkṣādikaṣāyaiścāpi dhāvanam
- 26
योन्यां तु पूयस्राविण्यां शोधनद्रव्यसंभृतैः
सगोमूत्रैः सलवणैः शोधनं हितमिष्यते
yonyāṃ tu pūyasrāviṇyāṃ śodhanadravyasaṃbhṛtaiḥ
sagomūtraiḥ salavaṇaiḥ śodhanaṃ hitamiṣyate
- 27
बृहतीफलकल्कस्य द्विहरिद्रायुतस्य च
कण्डूमतीमल्पस्पर्शां पूरयेद्धूपयेत्तथा
bṛhatīphalakalkasya dviharidrāyutasya ca
kaṇḍūmatīmalpasparśāṃ pūrayeddhūpayettathā
- 28
वर्तिं प्रदद्यात्कर्णिन्यां शोधनद्रव्यसंभृताम्
प्रस्रंसिनीं घृताभ्यक्तां क्षीरस्विन्नां प्रवेशयेत्
vartiṃ pradadyātkarṇinyāṃ śodhanadravyasaṃbhṛtām
prasraṃsinīṃ ghṛtābhyaktāṃ kṣīrasvinnāṃ praveśayet
- 29
पिधाय वेसवारेण ततो बन्धं समाचरेत्
प्रतिदोषं विदध्याच्च सुरारिष्टासवान्भिषक्
pidhāya vesavāreṇa tato bandhaṃ samācaret
pratidoṣaṃ vidadhyācca surāriṣṭāsavānbhiṣak
- 30
प्रातः प्रातर्निषेवेत रसोनादुद्धृतं रसम्
क्षीरमांसरसप्रायम् आहारं विदधीत च
prātaḥ prātarniṣeveta rasonāduddhṛtaṃ rasam
kṣīramāṃsarasaprāyam āhāraṃ vidadhīta ca

