9 shlokas
- 1
अथातो ऽन्धपूतनाप्रसिषेधं व्याख्यास्यामः
athāto 'ndhapūtanāprasiṣedhaṃ vyākhyāsyāmaḥ
- 2
यथोवाच भगवान्धन्वन्तरिः
yathovāca bhagavāndhanvantariḥ
- 3
तिक्तकद्रुमपत्राणां कार्यः क्वाथो ऽवसेचने
सुरा सौवीरकं कुष्ठं हरितालं मनःशिला
tiktakadrumapatrāṇāṃ kāryaḥ kvātho 'vasecane
surā sauvīrakaṃ kuṣṭhaṃ haritālaṃ manaḥśilā
- 4
तथा सर्जरसश्चैव तैलार्थम् उपदिश्यते
पिप्पल्यः पिप्पलीमूलं वर्गो मधुरको मधु
tathā sarjarasaścaiva tailārtham upadiśyate
pippalyaḥ pippalīmūlaṃ vargo madhurako madhu
- 5
शालपर्णी बृहत्यौ च घृतार्थम् उपदिश्यते
सर्वगन्धैः प्रदेहश्च गात्रेष्व् अक्ष्णोश्च शीतलैः
śālaparṇī bṛhatyau ca ghṛtārtham upadiśyate
sarvagandhaiḥ pradehaśca gātreṣv akṣṇośca śītalaiḥ
- 6
पुरीषं कौक्कुटं केशांश्चर्म सर्पत्वचं तथा
जीर्णां च भिक्षुसंघाटीं धूमनायोपकल्पयेत्
purīṣaṃ kaukkuṭaṃ keśāṃścarma sarpatvacaṃ tathā
jīrṇāṃ ca bhikṣusaṃghāṭīṃ dhūmanāyopakalpayet
- 7
कुक्कुटीं मर्कटीं शिम्बीमनन्तां चापि धारयेत्
मांसमामं तथा पक्वं शोणितं च चतुष्पथे
kukkuṭīṃ markaṭīṃ śimbīmanantāṃ cāpi dhārayet
māṃsamāmaṃ tathā pakvaṃ śoṇitaṃ ca catuṣpathe
- 8
निवेद्यमन्तश्च गृहे शिशो रक्षानिमित्ततः
शिशोश्च स्नपनं कुर्यात्सर्वगन्धोदकैः शुभैः
nivedyamantaśca gṛhe śiśo rakṣānimittataḥ
śiśośca snapanaṃ kuryātsarvagandhodakaiḥ śubhaiḥ
- 9
कराला पिङ्गला मुण्डा कषायाम्बरवासिनी
देवी बालमिमं प्रीता संरक्षत्वन्धपूतना
karālā piṅgalā muṇḍā kaṣāyāmbaravāsinī
devī bālamimaṃ prītā saṃrakṣatvandhapūtanā

