9 shlokas
- 1
अथातो मुखमण्डिकाप्रतिषेधं व्याख्यास्यामः
athāto mukhamaṇḍikāpratiṣedhaṃ vyākhyāsyāmaḥ
- 2
यथोवाच भगवान्धन्वन्तरिः
yathovāca bhagavāndhanvantariḥ
- 3
कपित्थबिल्वतर्कारीवांशीगन्धर्वहस्तकाः
कुबेराक्षी च योज्याः स्युर्बालानां परिषेचने
kapitthabilvatarkārīvāṃśīgandharvahastakāḥ
kuberākṣī ca yojyāḥ syurbālānāṃ pariṣecane
- 4
स्वरसैर्भृङ्गवृक्षाणां तथाजहरिगन्धयोः
तैलं वसां च संयोज्य पचेदभ्यञ्जने शिशोः
svarasairbhṛṅgavṛkṣāṇāṃ tathājaharigandhayoḥ
tailaṃ vasāṃ ca saṃyojya pacedabhyañjane śiśoḥ
- 5
मधूलिकायां पयसि तुगाक्षीर्यां गणे तथा
मधुरे पञ्चमूले च कनीयसि घृतं पचेत्
madhūlikāyāṃ payasi tugākṣīryāṃ gaṇe tathā
madhure pañcamūle ca kanīyasi ghṛtaṃ pacet
- 6
वचा सर्जरसः कुष्ठं सर्पिश्चोद्धूपनं हितम्
धारयेद् अपि जिह्वाश्च चाषचीरल्लिसर्पजाः
vacā sarjarasaḥ kuṣṭhaṃ sarpiścoddhūpanaṃ hitam
dhārayed api jihvāśca cāṣacīrallisarpajāḥ
- 7
वर्णकं चूर्णकं माल्यमञ्जनं पारदं तथा
मनःशिलां चोपहरेद्गोष्ठमध्ये बलिं तथा
varṇakaṃ cūrṇakaṃ mālyamañjanaṃ pāradaṃ tathā
manaḥśilāṃ copaharedgoṣṭhamadhye baliṃ tathā
- 8
पायसं सपुरोडाशं बल्यर्थम् उपसंहरेत्
मन्त्रपूताभिर् अद्भिश्च तत्रैव स्नपनं हितम्
pāyasaṃ sapuroḍāśaṃ balyartham upasaṃharet
mantrapūtābhir adbhiśca tatraiva snapanaṃ hitam
- 9
अलंकृता रूपवती सुभगा कामरूपिणी
गोष्ठमध्यालयरता पातु त्वां मुखमण्डिका
alaṃkṛtā rūpavatī subhagā kāmarūpiṇī
goṣṭhamadhyālayaratā pātu tvāṃ mukhamaṇḍikā

