11 shlokas
- 1
अथातो भेद्यरोगप्रतिषेधं व्याख्यास्यामः
athāto bhedyarogapratiṣedhaṃ vyākhyāsyāmaḥ
- 2
यथोवाच भगवान्धन्वन्तरिः
yathovāca bhagavāndhanvantariḥ
- 3
स्वेदयित्वा बिसग्रन्थिं छिद्राण्यस्य निराशयम्
पक्वं भित्त्वा तु शस्त्रेण सैन्धवेनावचूर्णयेत्
svedayitvā bisagranthiṃ chidrāṇyasya nirāśayam
pakvaṃ bhittvā tu śastreṇa saindhavenāvacūrṇayet
- 4
कासीसमागधीपुष्पनेपाल्येलायुतेन तु
ततः क्षौद्रघृतं दत्त्वा सम्यग्बन्धमथाचरेत्
kāsīsamāgadhīpuṣpanepālyelāyutena tu
tataḥ kṣaudraghṛtaṃ dattvā samyagbandhamathācaret
- 5
रोचनाक्षारतुत्थानि पिप्पल्यः क्षौद्रम् एव च
प्रतिसारणमेकैकं भिन्ने लगण इष्यते
rocanākṣāratutthāni pippalyaḥ kṣaudram eva ca
pratisāraṇamekaikaṃ bhinne lagaṇa iṣyate
- 6
महत्यपि च युञ्जीत क्षाराग्नी विधिकोविदः
स्विन्नां भिन्नां विनिष्पीड्य भिषगञ्जननामिकाम्
mahatyapi ca yuñjīta kṣārāgnī vidhikovidaḥ
svinnāṃ bhinnāṃ viniṣpīḍya bhiṣagañjananāmikām
- 7
शिलैलानतसिन्धूत्थैः सक्षौद्रैः प्रतिसारयेत्
रसाञ्जनमधुभ्यां तु भित्त्वा वा शस्त्रकर्मवित्
śilailānatasindhūtthaiḥ sakṣaudraiḥ pratisārayet
rasāñjanamadhubhyāṃ tu bhittvā vā śastrakarmavit
- 8
प्रतिसार्याञ्जनैर्युञ्ज्यादुष्णैर्दीपशिखोद्भवैः
सम्यक्स्विन्ने कृमिग्रन्थौ भिन्ने स्यात्प्रतिसारणम्
pratisāryāñjanairyuñjyāduṣṇairdīpaśikhodbhavaiḥ
samyaksvinne kṛmigranthau bhinne syātpratisāraṇam
- 9
त्रिफलातुत्थकासीससैन्धवैश्च रसक्रिया
भित्त्वोपनाहं कफजं पिप्पलीमधुसैन्धवैः
triphalātutthakāsīsasaindhavaiśca rasakriyā
bhittvopanāhaṃ kaphajaṃ pippalīmadhusaindhavaiḥ
- 10
लेखयेन्मण्डलाग्रेण समन्तात्प्रच्छयेद् अपि
संस्नेह्य पत्त्रभङ्गैश्च स्वेदयित्वा यथासुखम्
lekhayenmaṇḍalāgreṇa samantātpracchayed api
saṃsnehya pattrabhaṅgaiśca svedayitvā yathāsukham
- 11
सर्वेष्वेतेषु विहितं विधानं स्नेहपूर्वकम्
संपक्वे प्रयतो भूत्वा कुर्वीत व्रणरोपणम्
sarveṣveteṣu vihitaṃ vidhānaṃ snehapūrvakam
saṃpakve prayato bhūtvā kurvīta vraṇaropaṇam

