34 shlokas
- 1
ऋषय ऊचुः
किं जपान्मुच्यते जन्तुः सर्वलोकभयादिभिः
सर्वपापविनिर्मुक्तः प्राप्नोति परमां गतिम्
ṛṣaya ūcuḥ
kiṃ japānmucyate jantuḥ sarvalokabhayādibhiḥ
sarvapāpavinirmuktaḥ prāpnoti paramāṃ gatim
- 2
अलक्ष्मीं वाथ संत्यज्य गमिष्यति जपेन वै
लक्ष्मीवासो भवेन्मर्त्यः सूत वक्तुमिहार्हसि
alakṣmīṃ vātha saṃtyajya gamiṣyati japena vai
lakṣmīvāso bhavenmartyaḥ sūta vaktumihārhasi
- 3
सूत उवाच
पुरा पितामहेनोक्तं वसिष्ठाय महात्मने
वक्ष्ये संक्षेपतः सर्वं सर्वलोकहिताय वै
sūta uvāca
purā pitāmahenoktaṃ vasiṣṭhāya mahātmane
vakṣye saṃkṣepataḥ sarvaṃ sarvalokahitāya vai
- 4
शृण्वन्तु वचनं सर्वे प्रणिपत्य जनार्दनम्
देवदेवमजं विष्णुं कृष्णमच्युतमव्ययम्
śṛṇvantu vacanaṃ sarve praṇipatya janārdanam
devadevamajaṃ viṣṇuṃ kṛṣṇamacyutamavyayam
- 5
सर्वपापहरं शुद्धं मोक्षदं ब्रह्मवादिनम्
मनसा कर्मणा वाचा यो विद्वान्पुण्यकर्मकृत्
sarvapāpaharaṃ śuddhaṃ mokṣadaṃ brahmavādinam
manasā karmaṇā vācā yo vidvānpuṇyakarmakṛt
- 6
नारायणं जपेन्नित्यं प्रणम्य पुरुषोत्तमम्
स्वपन्नारायणं देवं गच्छन्नारायणं तथा
nārāyaṇaṃ japennityaṃ praṇamya puruṣottamam
svapannārāyaṇaṃ devaṃ gacchannārāyaṇaṃ tathā
- 7
भुञ्जन्नारायणं विप्रास्तिष्ठञ्जाग्रत्सनातनम्
उन्मिषन्निमिषन्वापि नमो नारायणेति वै
bhuñjannārāyaṇaṃ viprāstiṣṭhañjāgratsanātanam
unmiṣannimiṣanvāpi namo nārāyaṇeti vai
- 8
भोज्यं पेयं च लेह्यं च नमो नारायणेति च
अभिमन्त्र्य स्पृशन्भुङ्क्ते स याति परमां गतिम्
bhojyaṃ peyaṃ ca lehyaṃ ca namo nārāyaṇeti ca
abhimantrya spṛśanbhuṅkte sa yāti paramāṃ gatim
- 9
सर्वपापविनिर्मुक्तः प्राप्नोति च सतां गतिम्
अलक्ष्मीश्च मया प्रोक्ता पत्नी या दुःसहस्य च
sarvapāpavinirmuktaḥ prāpnoti ca satāṃ gatim
alakṣmīśca mayā proktā patnī yā duḥsahasya ca
- 10
नारायणपदं श्रुत्वा गच्छत्येव न संशयः
या लक्ष्मीर्देवदेवस्य हरेः कृष्णस्य वल्लभा
nārāyaṇapadaṃ śrutvā gacchatyeva na saṃśayaḥ
yā lakṣmīrdevadevasya hareḥ kṛṣṇasya vallabhā
- 11
गृहे क्षेत्रे तथावासे तनौ वसति सुव्रताः
आलोड्य सर्वशास्त्राणि विचार्य च पुनः पुनः
gṛhe kṣetre tathāvāse tanau vasati suvratāḥ
āloḍya sarvaśāstrāṇi vicārya ca punaḥ punaḥ
- 12
इदम् एकं सुनिष्पन्नं ध्येयो नारायणः सदा
किं तस्य बहुभिर्मन्त्रैः किं तस्य बहुभिर्व्रतैः
idam ekaṃ suniṣpannaṃ dhyeyo nārāyaṇaḥ sadā
kiṃ tasya bahubhirmantraiḥ kiṃ tasya bahubhirvrataiḥ
- 13
नमो नारायणायेति मन्त्रः सर्वार्थसाधकः
तस्मात्सर्वेषु कालेषु नमो नारायणेति च
namo nārāyaṇāyeti mantraḥ sarvārthasādhakaḥ
tasmātsarveṣu kāleṣu namo nārāyaṇeti ca
- 14
जपेत्स याति विप्रेन्द्रा विष्णुलोकं सबान्धवः
अन्यच्च देवदेवस्य शृण्वन्तु मुनिसत्तमाः
japetsa yāti viprendrā viṣṇulokaṃ sabāndhavaḥ
anyacca devadevasya śṛṇvantu munisattamāḥ
- 15
मन्त्रो मया पुराभ्यस्तः सर्ववेदार्थसाधकः
द्वादशाक्षरसंयुक्तो द्वादशात्मा पुरातनः
mantro mayā purābhyastaḥ sarvavedārthasādhakaḥ
dvādaśākṣarasaṃyukto dvādaśātmā purātanaḥ
- 16
तस्यैवेह च माहात्म्यं संक्षेपात्प्रवदामि वः
कश्चिद्द्विजो महाप्राज्ञस्तपस्तप्त्वा कथञ्चन
tasyaiveha ca māhātmyaṃ saṃkṣepātpravadāmi vaḥ
kaściddvijo mahāprājñastapastaptvā kathañcana
- 17
पुत्रमेकं तथोत्पाद्य संस्कारैश्च यथाक्रमम्
योजयित्वा यथाकालं कृतोपनयनं पुनः
putramekaṃ tathotpādya saṃskāraiśca yathākramam
yojayitvā yathākālaṃ kṛtopanayanaṃ punaḥ
- 18
अध्यापयामास तदा स च नोवाच किंचन
न जिह्वा स्पन्दते तस्य दुःखितो ऽभूद्द्विजोत्तमः
adhyāpayāmāsa tadā sa ca novāca kiṃcana
na jihvā spandate tasya duḥkhito 'bhūddvijottamaḥ
- 19
वासुदेवेति नियतम् ऐतरेयो वदत्यसौ
पिता तस्य तथा चान्यां परिणीय यथाविधि
vāsudeveti niyatam aitareyo vadatyasau
pitā tasya tathā cānyāṃ pariṇīya yathāvidhi
- 20
पुत्रानुत्पादयामास तथैव विधिपूर्वकम्
वेदानधीत्य सम्पन्ना बभूवुः सर्वसंमताः
putrānutpādayāmāsa tathaiva vidhipūrvakam
vedānadhītya sampannā babhūvuḥ sarvasaṃmatāḥ
- 21
ऐतरेयस्य सा माता दुःखिता शोकमूर्छिता
उवाच पुत्राः सम्पन्ना वेदवेदाङ्गपारगाः
aitareyasya sā mātā duḥkhitā śokamūrchitā
uvāca putrāḥ sampannā vedavedāṅgapāragāḥ
- 22
ब्राह्मणैः पूज्यमाना वै मोदयन्ति च मातरम्
मम त्वं भाग्यहीनायाः पुत्रो जातो निराकृतिः
brāhmaṇaiḥ pūjyamānā vai modayanti ca mātaram
mama tvaṃ bhāgyahīnāyāḥ putro jāto nirākṛtiḥ
- 23
ममात्र निधनं श्रेयो न कथञ्चन जीवितम्
इत्युक्तः स च निर्गम्य यज्ञवाटं जगाम वै
mamātra nidhanaṃ śreyo na kathañcana jīvitam
ityuktaḥ sa ca nirgamya yajñavāṭaṃ jagāma vai
- 24
तस्मिन्याते द्विजानां तु न मन्त्राः प्रतिपेदिरे
ऐतरेये स्थिते तत्र ब्राह्मणा मोहितास्तदा
tasminyāte dvijānāṃ tu na mantrāḥ pratipedire
aitareye sthite tatra brāhmaṇā mohitāstadā
- 25
ततो वाणी समुद्भूता वासुदेवेति कीर्तनात्
ऐतरेयस्य ते विप्राः प्रणिपत्य यथातथम्
tato vāṇī samudbhūtā vāsudeveti kīrtanāt
aitareyasya te viprāḥ praṇipatya yathātatham
- 26
पूजांचक्रुस्ततो यज्ञं स्वयमेव समागतम्
ततः समाप्य तं यज्ञमैतरेयो धनादिभिः
pūjāṃcakrustato yajñaṃ svayameva samāgatam
tataḥ samāpya taṃ yajñamaitareyo dhanādibhiḥ
- 27
सर्ववेदान्सदस्याह स षडङ्गान्समाहितः
तुष्टुवुश्च तथा विप्रा ब्रह्माद्याश्च तथा द्विजाः
sarvavedānsadasyāha sa ṣaḍaṅgānsamāhitaḥ
tuṣṭuvuśca tathā viprā brahmādyāśca tathā dvijāḥ
- 28
ससर्जुः पुष्पवर्षाणि खेचराः सिद्धचारणाः
एवं समाप्य वै यज्ञमैतरेयो द्विजोत्तमाः
sasarjuḥ puṣpavarṣāṇi khecarāḥ siddhacāraṇāḥ
evaṃ samāpya vai yajñamaitareyo dvijottamāḥ
- 29
मातरं पूजयित्वा तु विष्णोः स्थानं जगाम ह
एतद्वै कथितं सर्वं द्वादशाक्षरवैभवम्
mātaraṃ pūjayitvā tu viṣṇoḥ sthānaṃ jagāma ha
etadvai kathitaṃ sarvaṃ dvādaśākṣaravaibhavam
- 30
पठतां शृण्वतां नित्यं महापातकनाशनम्
जपेद्यः पुरुषो नित्यं द्वादशाक्षरमव्ययम्
paṭhatāṃ śṛṇvatāṃ nityaṃ mahāpātakanāśanam
japedyaḥ puruṣo nityaṃ dvādaśākṣaramavyayam

