84 shlokas
- 1
सूत उवाच
परीक्ष्य भूमिं विधिवद्गन्धवर्णरसादिभिः
अलंकृत्य वितानाद्यैरीश्वरावाहनक्षमाम्
sūta uvāca
parīkṣya bhūmiṃ vidhivadgandhavarṇarasādibhiḥ
alaṃkṛtya vitānādyairīśvarāvāhanakṣamām
- 2
एकहस्तप्रमाणेन मण्डलं परिकल्पयेत्
आलिखेत्कमलं मध्ये पञ्चरत्नसमन्वितम्
ekahastapramāṇena maṇḍalaṃ parikalpayet
ālikhetkamalaṃ madhye pañcaratnasamanvitam
- 3
चूर्णैरष्टदलं वृत्तं सितं वा रक्तमेव च
परिवारेण संयुक्तं बहुशोभासमन्वितम्
cūrṇairaṣṭadalaṃ vṛttaṃ sitaṃ vā raktameva ca
parivāreṇa saṃyuktaṃ bahuśobhāsamanvitam
- 4
आवाह्य कर्णिकायां तु शिवं परमकारणम्
अर्चयेत्सर्वयत्नेन यथाविभवविस्तरम्
āvāhya karṇikāyāṃ tu śivaṃ paramakāraṇam
arcayetsarvayatnena yathāvibhavavistaram
- 5
दलेषु सिद्धयः प्रोक्ताः कर्णिकायां महामुने
वैराग्यज्ञाननालं च धर्मकन्दं मनोरमम्
daleṣu siddhayaḥ proktāḥ karṇikāyāṃ mahāmune
vairāgyajñānanālaṃ ca dharmakandaṃ manoramam
- 6
वामा ज्येष्ठा च रौद्री च काली विकरणी तथा
बलविकरणी चैव बलप्रमथिनी क्रमात्
vāmā jyeṣṭhā ca raudrī ca kālī vikaraṇī tathā
balavikaraṇī caiva balapramathinī kramāt
- 7
सर्वभूतस्य दमनी केसरेषु च शक्तयः
मनोन्मनी महामाया कर्णिकायां शिवासने
sarvabhūtasya damanī kesareṣu ca śaktayaḥ
manonmanī mahāmāyā karṇikāyāṃ śivāsane
- 8
वामदेवादिभिः सार्धं द्वन्द्वन्यायेन विन्यसेत्
मनोन्मनं महादेवं मनोन्मन्याथ मध्यतः
vāmadevādibhiḥ sārdhaṃ dvandvanyāyena vinyaset
manonmanaṃ mahādevaṃ manonmanyātha madhyataḥ
- 9
सूर्यसोमाग्निसंबन्धात्प्रणवाख्यं शिवात्मकम्
पुरुषं विन्यसेद्वक्त्रं पूर्वे पत्रे रविप्रभम्
sūryasomāgnisaṃbandhātpraṇavākhyaṃ śivātmakam
puruṣaṃ vinyasedvaktraṃ pūrve patre raviprabham
- 10
अघोरं दक्षिणे पत्त्रे नीलाञ्जनचयोपमम्
उत्तरे वामदेवाख्यं जपाकुसुमसन्निभम्
aghoraṃ dakṣiṇe pattre nīlāñjanacayopamam
uttare vāmadevākhyaṃ japākusumasannibham
- 11
सद्यं पश्चिमपत्रे तु गोक्षीरधवलं न्यसेत्
ईशानं कर्णिकायां तु शुद्धस्फटिकसन्निभम्
sadyaṃ paścimapatre tu gokṣīradhavalaṃ nyaset
īśānaṃ karṇikāyāṃ tu śuddhasphaṭikasannibham
- 12
चन्द्रमण्डलसंकाशं हृदयायेति मन्त्रतः
वाह्नेये रुद्रदिग्भागे शिरसे धूम्रवर्चसे
candramaṇḍalasaṃkāśaṃ hṛdayāyeti mantrataḥ
vāhneye rudradigbhāge śirase dhūmravarcase
- 13
शिखायै च नमश्चेति रक्ताभे नैरृते दले
कवचायाञ्जनाभाय इति वायुदले न्यसेत्
śikhāyai ca namaśceti raktābhe nairṛte dale
kavacāyāñjanābhāya iti vāyudale nyaset
- 14
अस्त्रायाग्निशिखाभाय इति दिक्षु प्रविन्यसेत्
नेत्रेभ्यश्चेति चैशान्यां पिङ्गलेभ्यः प्रविन्यसेत्
astrāyāgniśikhābhāya iti dikṣu pravinyaset
netrebhyaśceti caiśānyāṃ piṅgalebhyaḥ pravinyaset
- 15
शिवं सदाशिवं देवं महेश्वरमतः परम्
रुद्रं विष्णुं विरिञ्चिं च सृष्टिन्यायेन भावयेत्
śivaṃ sadāśivaṃ devaṃ maheśvaramataḥ param
rudraṃ viṣṇuṃ viriñciṃ ca sṛṣṭinyāyena bhāvayet
- 16
शिवाय रुद्ररूपाय शान्त्यतीताय शंभवे
शान्ताय शान्तदैत्याय नमश्चन्द्रमसे तथा
śivāya rudrarūpāya śāntyatītāya śaṃbhave
śāntāya śāntadaityāya namaścandramase tathā
- 17
वेद्याय विद्याधाराय वह्नये वह्निवर्चसे
कालायै च प्रतिष्ठायै तारकायान्तकाय च
vedyāya vidyādhārāya vahnaye vahnivarcase
kālāyai ca pratiṣṭhāyai tārakāyāntakāya ca
- 18
निवृत्त्यै धनदेवाय धारायै धारणाय च
मन्त्रैरेतैर्महाभूतविग्रहं च सदाशिवम्
nivṛttyai dhanadevāya dhārāyai dhāraṇāya ca
mantrairetairmahābhūtavigrahaṃ ca sadāśivam
- 19
ईशानमुकुटं देवं पुरुषास्यं पुरातनम्
अघोरहृदयं हृष्टं वामगुह्यं महेश्वरम्
īśānamukuṭaṃ devaṃ puruṣāsyaṃ purātanam
aghorahṛdayaṃ hṛṣṭaṃ vāmaguhyaṃ maheśvaram
- 20
सद्यमूर्तिं स्मरेद्देवं सदसद्व्यक्तिकारणम्
पञ्चवक्त्रं दशभुजमष्टत्रिंशत्कलामयम्
sadyamūrtiṃ smareddevaṃ sadasadvyaktikāraṇam
pañcavaktraṃ daśabhujamaṣṭatriṃśatkalāmayam
- 21
सद्यमष्टप्रकारेण प्रभिद्य च कलामयम्
वामं त्रयोदशविधैर्विभिद्य विततं प्रभुम्
sadyamaṣṭaprakāreṇa prabhidya ca kalāmayam
vāmaṃ trayodaśavidhairvibhidya vitataṃ prabhum
- 22
अघोरमष्टधा कृत्वा कलारूपेण संस्थितम्
पुरुषं च चतुर्धा वै विभज्य च कलामयम्
aghoramaṣṭadhā kṛtvā kalārūpeṇa saṃsthitam
puruṣaṃ ca caturdhā vai vibhajya ca kalāmayam
- 23
ईशानं पञ्चधा कृत्वा पञ्चमूर्त्या व्यवस्थितम्
हंस हंसेति मन्त्रेण शिवभक्त्या समन्वितम्
īśānaṃ pañcadhā kṛtvā pañcamūrtyā vyavasthitam
haṃsa haṃseti mantreṇa śivabhaktyā samanvitam
- 24
ओङ्कारमात्रम् ओङ्कारम् अकारं समरूपिणम्
आ ई ऊ ए तथा अंबानुक्रमेणात्मरूपिणम्
oṅkāramātram oṅkāram akāraṃ samarūpiṇam
ā ī ū e tathā aṃbānukrameṇātmarūpiṇam
- 25
प्रधानसहितं देवं प्रलयोत्पत्तिवर्जितम्
अणोरणीयांसमजं महतो ऽपि महत्तमम्
pradhānasahitaṃ devaṃ pralayotpattivarjitam
aṇoraṇīyāṃsamajaṃ mahato 'pi mahattamam
- 26
ऊर्ध्वरेतसम् ईशानं विरूपाक्षमुमापतिम्
सहस्रशिरसं देवं सहस्राक्षं सनातनम्
ūrdhvaretasam īśānaṃ virūpākṣamumāpatim
sahasraśirasaṃ devaṃ sahasrākṣaṃ sanātanam
- 27
सहस्रहस्तचरणं नादान्तं नादविग्रहम्
खद्योतसदृशाकारं चन्द्ररेखाकृतिं प्रभुम्
sahasrahastacaraṇaṃ nādāntaṃ nādavigraham
khadyotasadṛśākāraṃ candrarekhākṛtiṃ prabhum
- 28
द्वादशान्ते भ्रुवोर्मध्ये तालुमध्ये गले क्रमात्
हृद्देशे ऽवस्थितं देवं स्वानन्दममृतं शिवम्
dvādaśānte bhruvormadhye tālumadhye gale kramāt
hṛddeśe 'vasthitaṃ devaṃ svānandamamṛtaṃ śivam
- 29
विद्युद्वलयसंकाशं विद्युत्कोटिसमप्रभम्
श्यामं रक्तं कलाकारं शक्तित्रयकृतासनम्
vidyudvalayasaṃkāśaṃ vidyutkoṭisamaprabham
śyāmaṃ raktaṃ kalākāraṃ śaktitrayakṛtāsanam
- 30
सदाशिवं स्मरेद्देवं तत्त्वत्रयसमन्वितम्
विद्यामूर्तिमयं देवं पूजयेच्च यथाक्रमात्
sadāśivaṃ smareddevaṃ tattvatrayasamanvitam
vidyāmūrtimayaṃ devaṃ pūjayecca yathākramāt

