22 shlokas
- 1
ऋषय ऊचुः
जीवच्छ्राद्धविधिः प्रोक्तस्त्वया सूत महामते
मूर्खाणाम् अपि मोक्षार्थमस्माकं रोमहर्षण
ṛṣaya ūcuḥ
jīvacchrāddhavidhiḥ proktastvayā sūta mahāmate
mūrkhāṇām api mokṣārthamasmākaṃ romaharṣaṇa
- 2
रुद्रादित्यवसूनां च शक्रादीनां च सुव्रत
प्रतिष्ठा कीदृशी शंभोर्लिङ्गमूर्तेश्च शोभना
rudrādityavasūnāṃ ca śakrādīnāṃ ca suvrata
pratiṣṭhā kīdṛśī śaṃbhorliṅgamūrteśca śobhanā
- 3
विष्णोः शक्रस्य देवस्य ब्रह्मणश्च महात्मनः
अग्नेर्यस्य निरृतेर्वरुणस्य महाद्युतेः
viṣṇoḥ śakrasya devasya brahmaṇaśca mahātmanaḥ
agneryasya nirṛtervaruṇasya mahādyuteḥ
- 4
वायोः सोमस्य यक्षस्य कुबेरस्यामितात्मनः
ईशानस्य धरायाश्च श्रीप्रतिष्ठाथ वा कथम्
vāyoḥ somasya yakṣasya kuberasyāmitātmanaḥ
īśānasya dharāyāśca śrīpratiṣṭhātha vā katham
- 5
दुर्गाशिवाप्रतिष्ठा च हैमवत्याश्च शोभना
स्कन्दस्य गणराजस्य नन्दिनश्च विशेषतः
durgāśivāpratiṣṭhā ca haimavatyāśca śobhanā
skandasya gaṇarājasya nandinaśca viśeṣataḥ
- 6
तथान्येषां च देवानां गणानामपि वा पुनः
प्रतिष्ठालक्षणं सर्वं विस्ताराद्वक्तुमर्हसि
tathānyeṣāṃ ca devānāṃ gaṇānāmapi vā punaḥ
pratiṣṭhālakṣaṇaṃ sarvaṃ vistārādvaktumarhasi
- 7
भवान्सर्वार्थतत्त्वज्ञो रुद्रभक्तश्च सुव्रत
कृष्णद्वैपायनस्यासि साक्षात्त्वमपरा तनुः
bhavānsarvārthatattvajño rudrabhaktaśca suvrata
kṛṣṇadvaipāyanasyāsi sākṣāttvamaparā tanuḥ
- 8
सुमन्तुर्जैमिनिश्चैव पैलश्च परमर्षयः
गुरुभक्तिं तथा कर्तुं समर्थो रोमहर्षणः
sumanturjaiminiścaiva pailaśca paramarṣayaḥ
gurubhaktiṃ tathā kartuṃ samartho romaharṣaṇaḥ
- 9
इति व्यासस्य विपुला गाथा भागीरथीतटे
एकः समो वा भिन्नो वा शिष्यस्तस्य महाद्युतेः
iti vyāsasya vipulā gāthā bhāgīrathītaṭe
ekaḥ samo vā bhinno vā śiṣyastasya mahādyuteḥ
- 10
वैशंपायनतुल्यो ऽसि व्यासशिष्येषु भूतले
तस्मादस्माकमखिलं वक्तुमर्हसि सांप्रतम्
vaiśaṃpāyanatulyo 'si vyāsaśiṣyeṣu bhūtale
tasmādasmākamakhilaṃ vaktumarhasi sāṃpratam
- 11
एवमुक्त्वा स्थितेष्वेव तेषु सर्वेषु तत्र च
बभूव विस्मयो ऽतीव मुनीनां तस्य चाग्रतः
evamuktvā sthiteṣveva teṣu sarveṣu tatra ca
babhūva vismayo 'tīva munīnāṃ tasya cāgrataḥ
- 12
अथान्तरिक्षे विपुला साक्षाद्देवी सरस्वती
अलं मुनीनां प्रश्नो ऽयमिति वाचा बभूव ह
athāntarikṣe vipulā sākṣāddevī sarasvatī
alaṃ munīnāṃ praśno 'yamiti vācā babhūva ha
- 13
सर्वं लिङ्गमयं लोकं सर्वं लिङ्गे प्रतिष्ठितम्
तस्मात्सर्वं परित्यज्य स्थापयेत्पूजयेच्च तत्
sarvaṃ liṅgamayaṃ lokaṃ sarvaṃ liṅge pratiṣṭhitam
tasmātsarvaṃ parityajya sthāpayetpūjayecca tat
- 14
लिङ्गस्थापनसन्मार्गनिहितस्वायतासिना
आशु ब्रह्माण्डमुद्भिद्य निर्गच्छेदविशङ्कया
liṅgasthāpanasanmārganihitasvāyatāsinā
āśu brahmāṇḍamudbhidya nirgacchedaviśaṅkayā
- 15
उपेन्द्राम्भोजगर्भेन्द्रयमाम्बुधनदेश्वराः
तथान्ये च शिवं स्थाप्य लिङ्गमूर्तिं महेश्वरम्
upendrāmbhojagarbhendrayamāmbudhanadeśvarāḥ
tathānye ca śivaṃ sthāpya liṅgamūrtiṃ maheśvaram
- 16
स्वेषु स्वेषु च पक्षेषु प्रधानास्ते यथा द्विजाः
ब्रह्मा हरश्च भगवान्विष्णुर्देवी रमा धरा
sveṣu sveṣu ca pakṣeṣu pradhānāste yathā dvijāḥ
brahmā haraśca bhagavānviṣṇurdevī ramā dharā
- 17
लक्ष्मीर्धृतिः स्मृतिः प्रज्ञा धरा दुर्गा शची तथा
रुद्राश्च वसवः स्कन्दो विशाखः शाख एव च
lakṣmīrdhṛtiḥ smṛtiḥ prajñā dharā durgā śacī tathā
rudrāśca vasavaḥ skando viśākhaḥ śākha eva ca
- 18
नैगमेशश्च भगवांल्लोकपाला ग्रहास्तथा
सर्वे नन्दिपुरोगाश्च गणा गणपतिः प्रभुः
naigameśaśca bhagavāṃllokapālā grahāstathā
sarve nandipurogāśca gaṇā gaṇapatiḥ prabhuḥ
- 19
पितरो मुनयः सर्वे कुबेराद्याश्च सुप्रभाः
आदित्या वसवः सांख्या अश्विनौ च भिषग्वरौ
pitaro munayaḥ sarve kuberādyāśca suprabhāḥ
ādityā vasavaḥ sāṃkhyā aśvinau ca bhiṣagvarau
- 20
विश्वेदेवाश्च साध्याश्च पशवः पक्षिणो मृगाः
ब्रह्मादिस्थावरान्तं च सर्वं लिङ्गे प्रतिष्ठितम्
viśvedevāśca sādhyāśca paśavaḥ pakṣiṇo mṛgāḥ
brahmādisthāvarāntaṃ ca sarvaṃ liṅge pratiṣṭhitam
- 21
तस्मात्सर्वं परित्यज्य स्थापयेल्लिङ्गमव्ययम्
यत्नेन स्थापितं सर्वं पूजितं पूजयेद्यदि
tasmātsarvaṃ parityajya sthāpayelliṅgamavyayam
yatnena sthāpitaṃ sarvaṃ pūjitaṃ pūjayedyadi
- 22
इति श्रीलिङ्गमहापुराणे उत्तरभागे षट्चत्वारिंशो ऽध्यायः
iti śrīliṅgamahāpurāṇe uttarabhāge ṣaṭcatvāriṃśo 'dhyāyaḥ

