8 shlokas
- 1
सनत्कुमार उवाच
कन्यादानं प्रवक्ष्यामि सर्वदानोत्तमोत्तमम्
कन्यां लक्षणसम्पन्नां सर्वदोषविवर्जिताम्
sanatkumāra uvāca
kanyādānaṃ pravakṣyāmi sarvadānottamottamam
kanyāṃ lakṣaṇasampannāṃ sarvadoṣavivarjitām
- 2
मातापित्रोस्तु संवादं कृत्वा दत्त्वा धनं महत्
आत्मीकृत्याथ संस्नाप्य वस्त्रं दत्त्वा शुभं नवम्
mātāpitrostu saṃvādaṃ kṛtvā dattvā dhanaṃ mahat
ātmīkṛtyātha saṃsnāpya vastraṃ dattvā śubhaṃ navam
- 3
भूषणैर्भूषयित्वाथ गन्धमाल्यैरथार्चयेत्
निमित्तानि समीक्ष्याथ गोत्रनक्षत्रकादिकान्
bhūṣaṇairbhūṣayitvātha gandhamālyairathārcayet
nimittāni samīkṣyātha gotranakṣatrakādikān
- 4
उभयोश्चित्तमालोक्य उभौ सम्पूज्य यत्नतः
दातव्या श्रोत्रियायैव ब्राह्मणाय तपस्विने
ubhayościttamālokya ubhau sampūjya yatnataḥ
dātavyā śrotriyāyaiva brāhmaṇāya tapasvine
- 5
साक्षादधीतवेदाय विधिना ब्रह्मचारिणे
दासदासीधनाढ्यं च भूषणानि विशेषतः
sākṣādadhītavedāya vidhinā brahmacāriṇe
dāsadāsīdhanāḍhyaṃ ca bhūṣaṇāni viśeṣataḥ
- 6
क्षेत्राणि च धनं धान्यं वासांसि च प्रदापयेत्
यावन्ति देहे रोमाणि कन्यायाः संततौ पुनः
kṣetrāṇi ca dhanaṃ dhānyaṃ vāsāṃsi ca pradāpayet
yāvanti dehe romāṇi kanyāyāḥ saṃtatau punaḥ
- 7
तावद्वर्षसहस्राणि रुद्रलोके महीयते
tāvadvarṣasahasrāṇi rudraloke mahīyate
- 8
इति श्रीलिङ्गमहापुराणे उत्तरभागे कन्यादानविधिर्नाम चत्वारिंशो ऽध्यायः
iti śrīliṅgamahāpurāṇe uttarabhāge kanyādānavidhirnāma catvāriṃśo 'dhyāyaḥ

