31 shlokas
- 1
शैलादिरुवाच
अथवा देवमीशानं लिङ्गे सम्पूजयेच्छिवम्
ब्राह्मणः शिवभक्तश्च शिवध्यानपरायणः
śailādiruvāca
athavā devamīśānaṃ liṅge sampūjayecchivam
brāhmaṇaḥ śivabhaktaśca śivadhyānaparāyaṇaḥ
- 2
अग्निरित्यादिना भस्म गृहीत्वा ह्यग्निहोत्रजम्
उद्धूलयेद्धि सर्वाङ्गमापादतलमस्तकम्
agnirityādinā bhasma gṛhītvā hyagnihotrajam
uddhūlayeddhi sarvāṅgamāpādatalamastakam
- 3
आचामेद्ब्रह्मतीर्थेन ब्रह्मसूत्री ह्युदङ्मुखः
अथौं नमः शिवायेति तनुं कृत्वात्मनः पुनः
ācāmedbrahmatīrthena brahmasūtrī hyudaṅmukhaḥ
athauṃ namaḥ śivāyeti tanuṃ kṛtvātmanaḥ punaḥ
- 4
देवं च तेन मन्त्रेण पूजयेत्प्रणवेन च
सर्वस्मादधिका पूजा अघोरेशस्य शूलिनः
devaṃ ca tena mantreṇa pūjayetpraṇavena ca
sarvasmādadhikā pūjā aghoreśasya śūlinaḥ
- 5
सामान्यं यजनं सर्वमग्निकार्यं च सुव्रत
मन्त्रभेदः प्रभोस्तस्य अघोरध्यानमेव च
sāmānyaṃ yajanaṃ sarvamagnikāryaṃ ca suvrata
mantrabhedaḥ prabhostasya aghoradhyānameva ca
- 6
मन्त्रः
अघोरेभ्यो ऽथ घोरेभ्यो घोरघोरतरेभ्यः शर्वेभ्यः सर्वशर्वेभ्यो नमस्ते अस्तु रुद्ररूपेभ्यः
mantraḥ
aghorebhyo 'tha ghorebhyo ghoraghoratarebhyaḥ śarvebhyaḥ sarvaśarvebhyo namaste astu rudrarūpebhyaḥ
- 7
अघोरेभ्यः प्रशान्तहृदयाय नमः
अथ घोरेभ्यः सर्वात्मब्रह्मशिरसे स्वाहा
घोरघोरतरेभ्यः ज्वालामालिनी शिखायै वषट्
सर्वेभ्यः सर्वशर्वेभ्यः पिङ्गलकवचाय हुम्
नमस्ते अस्तु रुद्ररूपेभ्यः नेत्रत्रयाय वषट्
सहस्राक्षाय दुर्भेदाय पाशुपतास्त्राय हुं फट्
स्नात्वाचाम्य तनुं कृत्वा समभ्युक्ष्याघमर्षणम्
तर्पणं विधिना चार्घ्यं भानवे भानुपूजनम्
aghorebhyaḥ praśāntahṛdayāya namaḥ
atha ghorebhyaḥ sarvātmabrahmaśirase svāhā
ghoraghoratarebhyaḥ jvālāmālinī śikhāyai vaṣaṭ
sarvebhyaḥ sarvaśarvebhyaḥ piṅgalakavacāya hum
namaste astu rudrarūpebhyaḥ netratrayāya vaṣaṭ
sahasrākṣāya durbhedāya pāśupatāstrāya huṃ phaṭ
snātvācāmya tanuṃ kṛtvā samabhyukṣyāghamarṣaṇam
tarpaṇaṃ vidhinā cārghyaṃ bhānave bhānupūjanam
- 8
समं चाघोरपूजायां मन्त्रमात्रेण भेदितम्
मार्गशुद्धिस्तथा द्वारि पूजां वास्त्वधिपस्य च
samaṃ cāghorapūjāyāṃ mantramātreṇa bheditam
mārgaśuddhistathā dvāri pūjāṃ vāstvadhipasya ca
- 9
कृत्वा करं विशोध्याग्रे स शुभासनमास्थितः
नासाग्रकमले स्थाप्य दग्धाक्षः क्षुभिकाग्निना
kṛtvā karaṃ viśodhyāgre sa śubhāsanamāsthitaḥ
nāsāgrakamale sthāpya dagdhākṣaḥ kṣubhikāgninā
- 10
वायुना प्रेर्य तद्भस्म विशोध्य च शुभांभसा
शक्त्यामृतमये ब्रह्मकलां तत्र प्रकल्पयेत्
vāyunā prerya tadbhasma viśodhya ca śubhāṃbhasā
śaktyāmṛtamaye brahmakalāṃ tatra prakalpayet
- 11
अघोरं पञ्चधा कृत्वा पञ्चाङ्गसहितं पुनः
इत्थं ज्ञानक्रियामेवं विन्यस्य च विधानतः
aghoraṃ pañcadhā kṛtvā pañcāṅgasahitaṃ punaḥ
itthaṃ jñānakriyāmevaṃ vinyasya ca vidhānataḥ
- 12
न्यासस्त्रिनेत्रसहितो हृदि ध्यात्वा वरासने
नाभौ वह्निगतं स्मृत्वा भ्रूमध्ये दीपवत्प्रभुम्
nyāsastrinetrasahito hṛdi dhyātvā varāsane
nābhau vahnigataṃ smṛtvā bhrūmadhye dīpavatprabhum
- 13
शान्त्या बीजाङ्कुरानन्तधर्माद्यैरपि संयुते
सोमसूर्याग्निसम्पन्ने मूर्तित्रयसमन्विते
śāntyā bījāṅkurānantadharmādyairapi saṃyute
somasūryāgnisampanne mūrtitrayasamanvite
- 14
वामादिभिश्च सहिते मनोन्मन्याप्यधिष्ठिते
शिवासनेत्ममूर्तिस्थम् अक्षयाकाररूपिणम्
vāmādibhiśca sahite manonmanyāpyadhiṣṭhite
śivāsanetmamūrtistham akṣayākārarūpiṇam
- 15
अष्टत्रिंशत्कलादेहं त्रितत्त्वसहितं शिवम्
अष्टादशभुजं देवं गजचर्मोत्तरीयकम्
aṣṭatriṃśatkalādehaṃ tritattvasahitaṃ śivam
aṣṭādaśabhujaṃ devaṃ gajacarmottarīyakam
- 16
सिंहाजिनांबरधरमघोरं परमेश्वरम्
द्वात्रिंशाक्षररूपेण द्वात्रिंशच्छक्तिभिर्वृतम्
siṃhājināṃbaradharamaghoraṃ parameśvaram
dvātriṃśākṣararūpeṇa dvātriṃśacchaktibhirvṛtam
- 17
सर्वाभरणसंयुक्तं सर्वदेवनमस्कृतम्
कपालमालाभरणं सर्ववृश्चिकभूषणम्
sarvābharaṇasaṃyuktaṃ sarvadevanamaskṛtam
kapālamālābharaṇaṃ sarvavṛścikabhūṣaṇam
- 18
पूर्णेन्दुवदनं सौम्यं चन्द्रकोटिसमप्रभम्
चन्द्ररेखाधरं शक्त्या सहितं नीलरूपिणम्
pūrṇenduvadanaṃ saumyaṃ candrakoṭisamaprabham
candrarekhādharaṃ śaktyā sahitaṃ nīlarūpiṇam
- 19
हस्ते खड्गं खेटकं पाशम् एके रत्नैश्चित्रं चाङ्कुशं नागकक्षाम्
शरासनं पाशुपतं तथास्त्रं दण्डं च खट्वाङ्गमथापरे च
haste khaḍgaṃ kheṭakaṃ pāśam eke ratnaiścitraṃ cāṅkuśaṃ nāgakakṣām
śarāsanaṃ pāśupataṃ tathāstraṃ daṇḍaṃ ca khaṭvāṅgamathāpare ca
- 20
तन्त्रीं च घण्टां विपुलं च शूलं तथापरे डामरुकं च दिव्यम्
वज्रं गदां टङ्कमेकं च दीप्तं समुद्गरं हस्तमथास्य शंभोः
tantrīṃ ca ghaṇṭāṃ vipulaṃ ca śūlaṃ tathāpare ḍāmarukaṃ ca divyam
vajraṃ gadāṃ ṭaṅkamekaṃ ca dīptaṃ samudgaraṃ hastamathāsya śaṃbhoḥ
- 21
वरदाभयहस्तं च वरेण्यं परमेश्वरम्
भावयेत्पूजयेच्चापि वह्नौ होमं च कारयेत्
varadābhayahastaṃ ca vareṇyaṃ parameśvaram
bhāvayetpūjayeccāpi vahnau homaṃ ca kārayet
- 22
होमश्च पूर्ववत्सर्वो मन्त्रभेदश्च कीर्तितः
अष्टपुष्पादि गन्धादि पूजास्तुतिनिवेदनम्
homaśca pūrvavatsarvo mantrabhedaśca kīrtitaḥ
aṣṭapuṣpādi gandhādi pūjāstutinivedanam
- 23
अन्तर्बलिं च कुण्डस्य वाह्नेयेन विधानतः
मण्डलं विधिना कृत्वा मन्त्रैरेतैर्यथाक्रमम्
antarbaliṃ ca kuṇḍasya vāhneyena vidhānataḥ
maṇḍalaṃ vidhinā kṛtvā mantrairetairyathākramam
- 24
रुद्रेभ्यो मातृगणेभ्यो यक्षेभ्यो ऽसुरेभ्यो ग्रहेभ्यो राक्षसेभ्यो नागेभ्यो नक्षत्रेभ्यो विश्वगणेभ्यः क्षेत्रपालेभ्यः अथ वायुवरुणदिग्भागे क्षेत्रपालबलिं क्षिपेत्
अर्घ्यं गन्धं च पुष्पं च धूपं दीपं च सुव्रताः
नैवेद्यं मुखवासादि निवेद्यं वै यथाविधि
rudrebhyo mātṛgaṇebhyo yakṣebhyo 'surebhyo grahebhyo rākṣasebhyo nāgebhyo nakṣatrebhyo viśvagaṇebhyaḥ kṣetrapālebhyaḥ atha vāyuvaruṇadigbhāge kṣetrapālabaliṃ kṣipet
arghyaṃ gandhaṃ ca puṣpaṃ ca dhūpaṃ dīpaṃ ca suvratāḥ
naivedyaṃ mukhavāsādi nivedyaṃ vai yathāvidhi
- 25
विज्ञाप्यैवं विसृज्याथ अष्टपुष्पैश्च पूजनम्
सर्वसामान्यमेतद्धि पूजायां मुनिपुङ्गवाः
vijñāpyaivaṃ visṛjyātha aṣṭapuṣpaiśca pūjanam
sarvasāmānyametaddhi pūjāyāṃ munipuṅgavāḥ
- 26
एवं संक्षेपतः प्रोक्तमघोरार्चादि सुव्रत
अघोरार्चाविधानं च लिङ्गे वा स्थण्डिले ऽपि वा
evaṃ saṃkṣepataḥ proktamaghorārcādi suvrata
aghorārcāvidhānaṃ ca liṅge vā sthaṇḍile 'pi vā
- 27
स्थण्डिलात्कोटिगुणितं लिङ्गार्चनमनुत्तमम्
लिङ्गार्चनरतो विप्रो महापातकसंभवैः
sthaṇḍilātkoṭiguṇitaṃ liṅgārcanamanuttamam
liṅgārcanarato vipro mahāpātakasaṃbhavaiḥ
- 28
पापैरपि न लिप्येत पद्मपत्रमिवांभसा
लिङ्गस्य दर्शनं पुण्यं दर्शनात्स्पर्शनं वरम्
pāpairapi na lipyeta padmapatramivāṃbhasā
liṅgasya darśanaṃ puṇyaṃ darśanātsparśanaṃ varam
- 29
अर्चनादधिकं नास्ति ब्रह्मपुत्र न संशयः
एवं संक्षेपतः प्रोक्तमघोरार्चनमुत्तमम्
arcanādadhikaṃ nāsti brahmaputra na saṃśayaḥ
evaṃ saṃkṣepataḥ proktamaghorārcanamuttamam
- 30
वर्षकोटिशतेनापि विस्तरेण न शक्यते
varṣakoṭiśatenāpi vistareṇa na śakyate

