14 shlokas
- 1
सनत्कुमार उवाच
अधुना सम्प्रवक्ष्यामि तिलपर्वतमुत्तमम्
पूर्वोक्तस्थानकाले तु कृत्वा सम्पूज्य यत्नतः
sanatkumāra uvāca
adhunā sampravakṣyāmi tilaparvatamuttamam
pūrvoktasthānakāle tu kṛtvā sampūjya yatnataḥ
- 2
सुसमे भूतले रम्ये वेदिना च विवर्जिते
दशतालप्रमाणेन दण्डं संस्थाप्य वै मुने
susame bhūtale ramye vedinā ca vivarjite
daśatālapramāṇena daṇḍaṃ saṃsthāpya vai mune
- 3
अद्भिः संप्रोक्ष्य पश्चाद्धि तिलांस्त्वस्मिन्विनिक्षिपेत्
पञ्चगव्येन तं देशं प्रोक्षयेद्ब्राह्मणोत्तमः
adbhiḥ saṃprokṣya paścāddhi tilāṃstvasminvinikṣipet
pañcagavyena taṃ deśaṃ prokṣayedbrāhmaṇottamaḥ
- 4
मण्डलं कल्पयेद्विद्वान्पूर्ववत्सुसमन्ततः
नववस्त्रैश्च संस्थाप्य रम्यपुष्पैर्विकीर्य च
maṇḍalaṃ kalpayedvidvānpūrvavatsusamantataḥ
navavastraiśca saṃsthāpya ramyapuṣpairvikīrya ca
- 5
तस्मिन्संचयनं कार्यं तिलभारैर्विशेषतः
दण्डप्रादेशमुत्सेधमुत्तमं परिकीर्तितम्
tasminsaṃcayanaṃ kāryaṃ tilabhārairviśeṣataḥ
daṇḍaprādeśamutsedhamuttamaṃ parikīrtitam
- 6
चतुरङ्गुलहीनं तु मध्यमं मुनिपुङ्गवाः
दण्डतुल्यं कनिष्ठं स्याद्दण्डहीनं न कारयेत्
caturaṅgulahīnaṃ tu madhyamaṃ munipuṅgavāḥ
daṇḍatulyaṃ kaniṣṭhaṃ syāddaṇḍahīnaṃ na kārayet
- 7
वेष्टयित्वा नवैर्वस्त्रैः परितः पूजयेत्क्रमात्
सद्यादीनि प्रविन्यस्य पूजयेद्विधिपूर्वकम्
veṣṭayitvā navairvastraiḥ paritaḥ pūjayetkramāt
sadyādīni pravinyasya pūjayedvidhipūrvakam
- 8
अष्टदिक्षु च कर्तव्याः पूर्वोक्ता मूर्तयः क्रमात्
त्रिनिष्केन सुवर्णेन प्रत्येकं कारयेत्क्रमात्
aṣṭadikṣu ca kartavyāḥ pūrvoktā mūrtayaḥ kramāt
triniṣkena suvarṇena pratyekaṃ kārayetkramāt
- 9
दक्षिणा विधिना कार्या तुलाभारवदेव तु
होमश्च पूर्ववत्प्रोक्तो यथावन्मुनिसत्तमाः
dakṣiṇā vidhinā kāryā tulābhāravadeva tu
homaśca pūrvavatprokto yathāvanmunisattamāḥ
- 10
अर्चयेद्देवदेवेशं लोकपालसमावृतम्
तिलपर्वतमध्यस्थं तिलपर्वतरूपिणम्
arcayeddevadeveśaṃ lokapālasamāvṛtam
tilaparvatamadhyasthaṃ tilaparvatarūpiṇam
- 11
शिवार्चना च कर्तव्या सहस्रकलशादिभिः
दर्शयेत्तिलमध्यस्थं देवदेवमुमापतिम्
śivārcanā ca kartavyā sahasrakalaśādibhiḥ
darśayettilamadhyasthaṃ devadevamumāpatim
- 12
पूजयित्वा विधानेन क्रमेण च विसर्जयेत्
श्रोत्रियाय दरिद्राय दापयेत्तिलपर्वतम्
pūjayitvā vidhānena krameṇa ca visarjayet
śrotriyāya daridrāya dāpayettilaparvatam
- 13
एवं तिलनगः प्रोक्तः सर्वस्मादधिकः परः
evaṃ tilanagaḥ proktaḥ sarvasmādadhikaḥ paraḥ
- 14
इति श्रीलिङ्गमहापुराणे उत्तरभागे तिलपर्वतदानं नाम त्रिंशो ऽध्यायः
iti śrīliṅgamahāpurāṇe uttarabhāge tilaparvatadānaṃ nāma triṃśo 'dhyāyaḥ

