17 shlokas
- 1
सनत्कुमार उवाच
अथातः सम्प्रवक्ष्यामि तिलधेनुविधिक्रमम्
पूर्वोक्तमण्डपे कुर्याच्छिवपूजां तु पश्चिमे
sanatkumāra uvāca
athātaḥ sampravakṣyāmi tiladhenuvidhikramam
pūrvoktamaṇḍape kuryācchivapūjāṃ tu paścime
- 2
तस्याग्रे मध्यतो भूमौ पद्ममालिख्य शोभनम्
वस्त्रैराच्छादितं पद्मं तन्मध्ये विन्यसेच्छुभम्
tasyāgre madhyato bhūmau padmamālikhya śobhanam
vastrairācchāditaṃ padmaṃ tanmadhye vinyasecchubham
- 3
तिलपुष्पं तु कृत्वाथ हेमपद्मं विनिक्षिपेत्
त्रिंशन्निष्केन कर्तव्यं तदर्धार्धेन वा पुनः
tilapuṣpaṃ tu kṛtvātha hemapadmaṃ vinikṣipet
triṃśanniṣkena kartavyaṃ tadardhārdhena vā punaḥ
- 4
पञ्चनिष्केण कर्तव्यं तदर्धार्धेन वा पुनः
तमाराध्य विधानेन गन्धपुष्पादिभिः क्रमात्
pañcaniṣkeṇa kartavyaṃ tadardhārdhena vā punaḥ
tamārādhya vidhānena gandhapuṣpādibhiḥ kramāt
- 5
पद्मस्योत्तरदिग्भागे विप्रान् एकादश न्यसेत्
तानभ्यर्च्य विधानेन गन्धपुष्पादिभिः क्रमात्
padmasyottaradigbhāge viprān ekādaśa nyaset
tānabhyarcya vidhānena gandhapuṣpādibhiḥ kramāt
- 6
आच्छादनोत्तरासंगं विप्रेभ्यो दापयेत्क्रमात्
उष्णीषं च प्रदातव्यं कुण्डले च विभूषिते
ācchādanottarāsaṃgaṃ viprebhyo dāpayetkramāt
uṣṇīṣaṃ ca pradātavyaṃ kuṇḍale ca vibhūṣite
- 7
हेमाङ्गुलीयकं दत्त्वा ब्राह्मणेभ्यो विधानतः
एकं दश च वस्त्राणि तेषामग्रे प्रकीर्य च
hemāṅgulīyakaṃ dattvā brāhmaṇebhyo vidhānataḥ
ekaṃ daśa ca vastrāṇi teṣāmagre prakīrya ca
- 8
तेषु वस्त्रेषु निःक्षिप्य तिलाद्यानि पृथक्पृथक्
कांस्यपात्रं शतपलं विभिद्यैकादशांशकम्
teṣu vastreṣu niḥkṣipya tilādyāni pṛthakpṛthak
kāṃsyapātraṃ śatapalaṃ vibhidyaikādaśāṃśakam
- 9
इक्षुदण्डं च दातव्यं ब्राह्मणेभ्यो विशेषतः
गोशृङ्गे तु हिरण्येन द्विनिष्केण तु कारयेत्
ikṣudaṇḍaṃ ca dātavyaṃ brāhmaṇebhyo viśeṣataḥ
gośṛṅge tu hiraṇyena dviniṣkeṇa tu kārayet
- 10
रजतेन तु कर्तव्याः खुरा निष्कद्वयेन तु
एवं पृथक्पृथग्दत्त्वा तत्तिलेषु विनिक्षिपेत्
rajatena tu kartavyāḥ khurā niṣkadvayena tu
evaṃ pṛthakpṛthagdattvā tattileṣu vinikṣipet
- 11
रुद्रैकादशमन्त्रैस्तु रुद्रेभ्यो दापयेत्तदा
पद्मस्य पूर्वदिग्भागे विप्रान्द्वादश पूजितान्
rudraikādaśamantraistu rudrebhyo dāpayettadā
padmasya pūrvadigbhāge viprāndvādaśa pūjitān
- 12
एतेनैव तु मार्गेण तेषु श्रद्धासमन्वितः
द्वादशादित्यमन्त्रैश्च दापयेदेवमेव च
etenaiva tu mārgeṇa teṣu śraddhāsamanvitaḥ
dvādaśādityamantraiśca dāpayedevameva ca
- 13
पूर्ववद्दक्षिणे भागे विप्रान्षोडश संस्थितान्
मूर्तिं विघ्नेशमन्त्रैश्च दापयेत्पूर्ववत्पुनः
pūrvavaddakṣiṇe bhāge viprānṣoḍaśa saṃsthitān
mūrtiṃ vighneśamantraiśca dāpayetpūrvavatpunaḥ
- 14
यजमानेन कर्तव्यं सर्वमेतद्यथाक्रमम्
केवलं रुद्रदानं वा आदित्येभ्यो ऽथवा पुनः
yajamānena kartavyaṃ sarvametadyathākramam
kevalaṃ rudradānaṃ vā ādityebhyo 'thavā punaḥ
- 15
मूर्त्यादीनां च वा देयं यथाविभवविस्तरम्
पद्मं विन्यस्य राजासौ शेषं वा कारयेन्नृपः
mūrtyādīnāṃ ca vā deyaṃ yathāvibhavavistaram
padmaṃ vinyasya rājāsau śeṣaṃ vā kārayennṛpaḥ
- 16
दक्षिणा च प्रदातव्या पञ्चनिष्केण भूषणम्
dakṣiṇā ca pradātavyā pañcaniṣkeṇa bhūṣaṇam
- 17
इति श्रीलिङ्गमहापुराणे उत्तरभागे तिलधेनुदानविधिनिरूपणं नाम सप्तत्रिंशो ऽध्यायः
iti śrīliṅgamahāpurāṇe uttarabhāge tiladhenudānavidhinirūpaṇaṃ nāma saptatriṃśo 'dhyāyaḥ

