10 shlokas
- 1
सनत्कुमार उवाच
अथान्यत्सम्प्रवक्ष्यामि कल्पपादपमुत्तमम्
शतनिष्केण कृत्वैवं सर्वशाखासमन्वितम्
sanatkumāra uvāca
athānyatsampravakṣyāmi kalpapādapamuttamam
śataniṣkeṇa kṛtvaivaṃ sarvaśākhāsamanvitam
- 2
शाखानां विविधं कृत्वा मुक्तादामाद्यलम्बनम्
दिव्यैर्मारकतैश्चैव चाङ्कुराग्रं प्रविन्यसेत्
śākhānāṃ vividhaṃ kṛtvā muktādāmādyalambanam
divyairmārakataiścaiva cāṅkurāgraṃ pravinyaset
- 3
प्रवालं कारयेद्विद्वान्प्रवालेन द्रुमस्य तु
फलानि पद्मरागैश्च परितो ऽस्य सुशोभयेत्
pravālaṃ kārayedvidvānpravālena drumasya tu
phalāni padmarāgaiśca parito 'sya suśobhayet
- 4
मूलं च नीलरत्नेन वज्रेण स्कन्धमुत्तमम्
वैडूर्येण द्रुमाग्रं च पुष्परागेण मस्तकम्
mūlaṃ ca nīlaratnena vajreṇa skandhamuttamam
vaiḍūryeṇa drumāgraṃ ca puṣparāgeṇa mastakam
- 5
गोमेदकेन वै कन्दं सूर्यकान्तेन सुव्रत
चन्द्रकान्तेन वा वेदीं द्रुमस्य स्फटिकेन वा
gomedakena vai kandaṃ sūryakāntena suvrata
candrakāntena vā vedīṃ drumasya sphaṭikena vā
- 6
वितस्तिमात्रमायामं वृक्षस्य परिकीर्तितम्
शाखाष्टकस्य मानं च विस्तारं चोर्ध्वतस्तथा
vitastimātramāyāmaṃ vṛkṣasya parikīrtitam
śākhāṣṭakasya mānaṃ ca vistāraṃ cordhvatastathā
- 7
तन्मूले स्थापयेल्लिङ्गं लोकपालैः समावृतम्
पूर्वोक्तवेदिमध्ये तु मण्डले स्थाप्य पादपम्
tanmūle sthāpayelliṅgaṃ lokapālaiḥ samāvṛtam
pūrvoktavedimadhye tu maṇḍale sthāpya pādapam
- 8
पूजयेद्देवम् ईशानं लोकपालांश्च यत्नतः
पूर्ववज्जपहोमाद्यं तुलाभारवदाचरेत्
pūjayeddevam īśānaṃ lokapālāṃśca yatnataḥ
pūrvavajjapahomādyaṃ tulābhāravadācaret
- 9
निवेदयेद्द्रुमं शंभोर्योगिनां वाथ वा नृप
भस्माङ्गिभ्यो ऽथवा राजा सार्वभौमो भविष्यति
nivedayeddrumaṃ śaṃbhoryogināṃ vātha vā nṛpa
bhasmāṅgibhyo 'thavā rājā sārvabhaumo bhaviṣyati
- 10
इति श्रीलिङ्गमहापुराणे उत्तरभागे कल्पपादपदानविधिर्नाम त्रयस्त्रिंशो ऽध्यायः
iti śrīliṅgamahāpurāṇe uttarabhāge kalpapādapadānavidhirnāma trayastriṃśo 'dhyāyaḥ

