51 shlokas
- 1
ऋषय ऊचुः
निग्रहः कथितस्तेन शिववक्त्रेण शूलिना
कृतापराधिनां तं तु वक्तुमर्हसि सुव्रत
ṛṣaya ūcuḥ
nigrahaḥ kathitastena śivavaktreṇa śūlinā
kṛtāparādhināṃ taṃ tu vaktumarhasi suvrata
- 2
त्वया न विदितं नास्ति लौकिकं वैदिकं तथा
श्रौतं स्मार्तं महाभाग रोमहर्षण सुव्रत
tvayā na viditaṃ nāsti laukikaṃ vaidikaṃ tathā
śrautaṃ smārtaṃ mahābhāga romaharṣaṇa suvrata
- 3
सूत उवाच
पुरा भृगुसुतेनोक्तो हिरण्याक्षाय सुव्रताः
निग्रहो ऽघोरशिष्येण शुक्रेणाक्षयतेजसा
sūta uvāca
purā bhṛgusutenokto hiraṇyākṣāya suvratāḥ
nigraho 'ghoraśiṣyeṇa śukreṇākṣayatejasā
- 4
तस्य प्रसादाद्दैत्येन्द्रो हिरण्याक्षः प्रतापवान्
त्रैलोक्यमखिलं जित्वा सदेवासुरमानुषम्
tasya prasādāddaityendro hiraṇyākṣaḥ pratāpavān
trailokyamakhilaṃ jitvā sadevāsuramānuṣam
- 5
उत्पाद्य पुत्रं गणपं चान्धकं चारुविक्रमम्
रराज लोके देवेन वराहेण निषूदितः
utpādya putraṃ gaṇapaṃ cāndhakaṃ cāruvikramam
rarāja loke devena varāheṇa niṣūditaḥ
- 6
स्त्रीबाधां बालबाधां च गवामपि विशेषतः
कुर्वतो नास्ति विजयो मार्गेणानेन भूतले
strībādhāṃ bālabādhāṃ ca gavāmapi viśeṣataḥ
kurvato nāsti vijayo mārgeṇānena bhūtale
- 7
तेन दैत्येन सा देवी धरा नीता रसातलम्
तेनाघोरेण देवेन निष्फलो निग्रहः कृतः
tena daityena sā devī dharā nītā rasātalam
tenāghoreṇa devena niṣphalo nigrahaḥ kṛtaḥ
- 8
संवत्सरसहस्रान्ते वराहेण च सूदितः
तस्मादघोरसिद्ध्यर्थं ब्राह्मणान्नैव बाधयेत्
saṃvatsarasahasrānte varāheṇa ca sūditaḥ
tasmādaghorasiddhyarthaṃ brāhmaṇānnaiva bādhayet
- 9
स्त्रीणामपि विशेषेण गवामपि न कारयेत्
गुह्याद्गुह्यतमं गोप्यम् अतिगुह्यं वदामि वः
strīṇāmapi viśeṣeṇa gavāmapi na kārayet
guhyādguhyatamaṃ gopyam atiguhyaṃ vadāmi vaḥ
- 10
आततायिनमुद्दिश्य कर्तव्यं नृपसत्तमैः
ब्राह्मणेभ्यो न कर्तव्यं स्वराष्ट्रेशस्य वा पुनः
ātatāyinamuddiśya kartavyaṃ nṛpasattamaiḥ
brāhmaṇebhyo na kartavyaṃ svarāṣṭreśasya vā punaḥ
- 11
अतीवदुर्जये प्राप्ते बले सर्वे निषूदिते
अधर्मयुद्धे सम्प्राप्ते कुर्याद्विधिमनुत्तमम्
atīvadurjaye prāpte bale sarve niṣūdite
adharmayuddhe samprāpte kuryādvidhimanuttamam
- 12
अघृणेनैव कर्तव्यो ह्यघृणेनैव कारयेत्
कृतमात्रे न संदेहो निग्रहः सम्प्रजायते
aghṛṇenaiva kartavyo hyaghṛṇenaiva kārayet
kṛtamātre na saṃdeho nigrahaḥ samprajāyate
- 13
लक्षमात्रं पुमाञ्जप्त्वा अघोरं घोररूपिणम्
दशांशं विधिना हुत्वा तिलेन द्विजसत्तमाः
lakṣamātraṃ pumāñjaptvā aghoraṃ ghorarūpiṇam
daśāṃśaṃ vidhinā hutvā tilena dvijasattamāḥ
- 14
सम्पूज्य लक्षपुष्पेण सितेन विधिपूर्वकम्
बाणलिङ्गे ऽथवा वह्नौ दक्षिणामूर्तिमाश्रितः
sampūjya lakṣapuṣpeṇa sitena vidhipūrvakam
bāṇaliṅge 'thavā vahnau dakṣiṇāmūrtimāśritaḥ
- 15
सिद्धमन्त्रो ऽन्यथा नास्ति द्रष्टा सिद्ध्यादयः पुनः
सिद्धमन्त्रः स्वयं कुर्यात्प्रेतस्थाने विशेषतः
siddhamantro 'nyathā nāsti draṣṭā siddhyādayaḥ punaḥ
siddhamantraḥ svayaṃ kuryātpretasthāne viśeṣataḥ
- 16
मातृस्थाने ऽपि वा विद्वान्वेदवेदाङ्गपारगः
केवलं मन्त्रसिद्धो वा ब्राह्मणः शिवभावितः
mātṛsthāne 'pi vā vidvānvedavedāṅgapāragaḥ
kevalaṃ mantrasiddho vā brāhmaṇaḥ śivabhāvitaḥ
- 17
कुर्याद्विधिमिमं धीमान् आत्मनो ऽर्थं नृपस्य वा
शूलाष्टकं न्यसेद्विद्वान्पूर्वादीशानकान्तकम्
kuryādvidhimimaṃ dhīmān ātmano 'rthaṃ nṛpasya vā
śūlāṣṭakaṃ nyasedvidvānpūrvādīśānakāntakam
- 18
त्रिशिखं च त्रिशूलं च चतुर्विंशच्छिखाग्रतः
अघोरविग्रहं कृत्वा संकलीकृतविग्रहः
triśikhaṃ ca triśūlaṃ ca caturviṃśacchikhāgrataḥ
aghoravigrahaṃ kṛtvā saṃkalīkṛtavigrahaḥ
- 19
सर्वनाशकरं ध्यात्वा सर्वकर्माणि कारयेत्
कालाग्निकोटिसंकाशं स्वदेहमपि भावयेत्
sarvanāśakaraṃ dhyātvā sarvakarmāṇi kārayet
kālāgnikoṭisaṃkāśaṃ svadehamapi bhāvayet
- 20
शूलं कपालं पाशं च दण्डं चैव शरासनम्
बाणं डमरुकं खड्गमष्टायुधमनुक्रमात्
śūlaṃ kapālaṃ pāśaṃ ca daṇḍaṃ caiva śarāsanam
bāṇaṃ ḍamarukaṃ khaḍgamaṣṭāyudhamanukramāt
- 21
अष्टहस्तश्च वरदो नीलकण्ठो दिगंबरः
पञ्चतत्त्वसमारूढो ह्यर्धचन्द्रधरः प्रभुः
aṣṭahastaśca varado nīlakaṇṭho digaṃbaraḥ
pañcatattvasamārūḍho hyardhacandradharaḥ prabhuḥ
- 22
दंष्ट्राकरालवदनो रौद्रदृष्टिर्भयङ्करः
हुंफट्कारमहाशब्दशब्दिताखिलदिङ्मुखः
daṃṣṭrākarālavadano raudradṛṣṭirbhayaṅkaraḥ
huṃphaṭkāramahāśabdaśabditākhiladiṅmukhaḥ
- 23
त्रिनेत्रं नागपाशेन सुबद्धमुकुटं स्वयम्
सर्वाभरणसम्पन्नं प्रेतभस्मावगुण्ठितम्
trinetraṃ nāgapāśena subaddhamukuṭaṃ svayam
sarvābharaṇasampannaṃ pretabhasmāvaguṇṭhitam
- 24
भूतैः प्रेतैः पिशाचैश्च डाकिनीभिश्च राक्षसैः
संवृतं गजचर्मेण च सर्पभूषणभूषितम्
bhūtaiḥ pretaiḥ piśācaiśca ḍākinībhiśca rākṣasaiḥ
saṃvṛtaṃ gajacarmeṇa ca sarpabhūṣaṇabhūṣitam
- 25
वृश्चिकाभरणं देवं नीलनीरदनिस्वनम्
नीलाञ्जनाद्रिसंकाशं सिंहचर्मोत्तरीयकम्
vṛścikābharaṇaṃ devaṃ nīlanīradanisvanam
nīlāñjanādrisaṃkāśaṃ siṃhacarmottarīyakam
- 26
ध्यायेदेवमघोरेशं घोरघोरतरं शिवम्
षट्त्रिंशदुक्तमात्राभिः प्राणायामेन सुव्रताः
dhyāyedevamaghoreśaṃ ghoraghorataraṃ śivam
ṣaṭtriṃśaduktamātrābhiḥ prāṇāyāmena suvratāḥ
- 27
महामुद्रासमायुक्तः सर्वकर्माणि कारयेत्
सिद्धमन्त्रश्चिताग्नौ वा प्रेतस्थाने यथाविधि
mahāmudrāsamāyuktaḥ sarvakarmāṇi kārayet
siddhamantraścitāgnau vā pretasthāne yathāvidhi
- 28
स्थापयेन्मध्यदेशे तु ऐन्द्रे याम्ये च वारुणे
कौबेर्यां विधिवत्कृत्वा होमकुण्डानि शास्त्रतः
sthāpayenmadhyadeśe tu aindre yāmye ca vāruṇe
kauberyāṃ vidhivatkṛtvā homakuṇḍāni śāstrataḥ
- 29
आचार्यो मध्यकुण्डे तु साधकाश्च दिशासु वै
परिस्तीर्य विलोमेन पूर्ववच्छूलसंभृतः
ācāryo madhyakuṇḍe tu sādhakāśca diśāsu vai
paristīrya vilomena pūrvavacchūlasaṃbhṛtaḥ
- 30
कालाग्निपीठमध्यस्थः स्वयं शिष्यैश्च तादृशैः
ध्यात्वा घोरमघोरेशं द्वात्रिंशाक्षरसंयुतम्
kālāgnipīṭhamadhyasthaḥ svayaṃ śiṣyaiśca tādṛśaiḥ
dhyātvā ghoramaghoreśaṃ dvātriṃśākṣarasaṃyutam

