22 shlokas
- 1
ऋषय ऊचुः
वैष्णवा इति ये प्रोक्ता वासुदेवपरायणाः
कानि चिह्नानि तेषां वै तन्नो ब्रूहि महामते
ṛṣaya ūcuḥ
vaiṣṇavā iti ye proktā vāsudevaparāyaṇāḥ
kāni cihnāni teṣāṃ vai tanno brūhi mahāmate
- 2
तेषां वा किं करोत्येष भगवान्भूतभावनः
एतन्मे सर्वमाचक्ष्व सूत सर्वार्थवित्तम
teṣāṃ vā kiṃ karotyeṣa bhagavānbhūtabhāvanaḥ
etanme sarvamācakṣva sūta sarvārthavittama
- 3
सूत उवाच
अंबरीषेण वै पृष्टो मार्कण्डेयः पुरा मुनिः
युष्माभिर् अद्य यत्प्रोक्तं तद्वदामि यथातथम्
sūta uvāca
aṃbarīṣeṇa vai pṛṣṭo mārkaṇḍeyaḥ purā muniḥ
yuṣmābhir adya yatproktaṃ tadvadāmi yathātatham
- 4
मार्कण्डेय उवाच
शृणु राजन्यथान्यायं यन्मां त्वं परिपृच्छसि
यत्रास्ते विष्णुभक्तस्तु तत्र नारायणः स्थितः
mārkaṇḍeya uvāca
śṛṇu rājanyathānyāyaṃ yanmāṃ tvaṃ paripṛcchasi
yatrāste viṣṇubhaktastu tatra nārāyaṇaḥ sthitaḥ
- 5
विष्णुरेव हि सर्वत्र येषां वै देवता स्मृता
कीर्त्यमाने हरौ नित्यं रोमाञ्चो यस्य वर्तते
viṣṇureva hi sarvatra yeṣāṃ vai devatā smṛtā
kīrtyamāne harau nityaṃ romāñco yasya vartate
- 6
कंपः स्वेदस्तथाक्षेषु दृश्यन्ते जलबिन्दवः
विष्णुभक्तिसमायुक्तान्श्रौतस्मार्तप्रवर्तकान्
kaṃpaḥ svedastathākṣeṣu dṛśyante jalabindavaḥ
viṣṇubhaktisamāyuktānśrautasmārtapravartakān
- 7
प्रीतो भवति यो दृष्ट्वा वैष्णवो ऽसौ प्रकीर्तितः
नान्यदाच्छादयेद्वस्त्रं वैष्णवो जगतो रणे
prīto bhavati yo dṛṣṭvā vaiṣṇavo 'sau prakīrtitaḥ
nānyadācchādayedvastraṃ vaiṣṇavo jagato raṇe
- 8
विष्णुभक्तम् अथायान्तं यो दृष्ट्वा संमुखस्थितः
प्रणामादि करोत्येवं वासुदेवे यथा तथा
viṣṇubhaktam athāyāntaṃ yo dṛṣṭvā saṃmukhasthitaḥ
praṇāmādi karotyevaṃ vāsudeve yathā tathā
- 9
स वै भक्त इति ज्ञेयः स जयी स्याज्जगत्त्रये
रूक्षाक्षराणि शृण्वन्वै तथा भागवतेरितः
sa vai bhakta iti jñeyaḥ sa jayī syājjagattraye
rūkṣākṣarāṇi śṛṇvanvai tathā bhāgavateritaḥ
- 10
प्रणामपूर्वं क्षान्त्या वै यो वदेद्वैष्णवो हि सः
गन्धपुष्पादि किं सर्वं शिरसा यो हि धारयेत्
praṇāmapūrvaṃ kṣāntyā vai yo vadedvaiṣṇavo hi saḥ
gandhapuṣpādi kiṃ sarvaṃ śirasā yo hi dhārayet
- 11
हरेः सर्वमितीत्येवं मत्वासौ वैष्णवः स्मृतः
विष्णुक्षेत्रे शुभान्येव करोति स्नेहसंयुतः
hareḥ sarvamitītyevaṃ matvāsau vaiṣṇavaḥ smṛtaḥ
viṣṇukṣetre śubhānyeva karoti snehasaṃyutaḥ
- 12
प्रतिमां च हरेर्नित्यं पूजयेत्प्रयतात्मवान्
विष्णुभक्तः स विज्ञेयः कर्मणा मनसा गिरा
pratimāṃ ca harernityaṃ pūjayetprayatātmavān
viṣṇubhaktaḥ sa vijñeyaḥ karmaṇā manasā girā
- 13
नारायणपरो नित्यं महाभागवतो हि सः
भोजनाराधनं सर्वं यथाशक्त्या करोति यः
nārāyaṇaparo nityaṃ mahābhāgavato hi saḥ
bhojanārādhanaṃ sarvaṃ yathāśaktyā karoti yaḥ
- 14
विष्णुभक्तस्य च सदा यथान्यायं हि कथ्यते
नारायणपरो विद्वान्यस्यान्नं प्रीतमानसः
viṣṇubhaktasya ca sadā yathānyāyaṃ hi kathyate
nārāyaṇaparo vidvānyasyānnaṃ prītamānasaḥ
- 15
अश्नाति तद्धरेरास्यं गतमन्नं न संशयः
स्वार्चनादपि विश्वात्मा प्रीतो भवति माधवः
aśnāti taddharerāsyaṃ gatamannaṃ na saṃśayaḥ
svārcanādapi viśvātmā prīto bhavati mādhavaḥ
- 16
महाभागवते तच्च दृष्ट्वासौ भक्तवत्सलः
वासुदेवपरं दृष्ट्वा वैष्णवं दग्धकिल्बिषम्
mahābhāgavate tacca dṛṣṭvāsau bhaktavatsalaḥ
vāsudevaparaṃ dṛṣṭvā vaiṣṇavaṃ dagdhakilbiṣam
- 17
देवापि भीतास्तं यान्ति प्रणिपत्य यथागतम्
श्रूयतां हि पुरावृत्तं विष्णुभक्तस्य वैभवम्
devāpi bhītāstaṃ yānti praṇipatya yathāgatam
śrūyatāṃ hi purāvṛttaṃ viṣṇubhaktasya vaibhavam
- 18
दृष्ट्वा यमो ऽपि वै भक्तं वैष्णवं दग्धकिल्बिषम्
उत्थाय प्राञ्जलिर्भूत्वा ननाम भृगुनन्दनम्
dṛṣṭvā yamo 'pi vai bhaktaṃ vaiṣṇavaṃ dagdhakilbiṣam
utthāya prāñjalirbhūtvā nanāma bhṛgunandanam
- 19
तस्मात्सम्पूजयेद्भक्त्या वैष्णवान्विष्णुवन्नरः
स याति विष्णुसामीप्यं नात्र कार्या विचारणा
tasmātsampūjayedbhaktyā vaiṣṇavānviṣṇuvannaraḥ
sa yāti viṣṇusāmīpyaṃ nātra kāryā vicāraṇā
- 20
अन्यभक्तसहस्रेभ्यो विष्णुभक्तो विशिष्यते
विष्णुभक्तसहस्रेभ्यो रुद्रभक्तो विशिष्यते
रुद्रभक्तात्परतरो नास्ति लोके न संशयः
anyabhaktasahasrebhyo viṣṇubhakto viśiṣyate
viṣṇubhaktasahasrebhyo rudrabhakto viśiṣyate
rudrabhaktātparataro nāsti loke na saṃśayaḥ
- 21
तस्मात्तु वैष्णवं चापि रुद्रभक्तमथापि वा
पूजयेत्सर्वयत्नेन धर्मकामार्थमुक्तये
tasmāttu vaiṣṇavaṃ cāpi rudrabhaktamathāpi vā
pūjayetsarvayatnena dharmakāmārthamuktaye
- 22
इति श्रीलिङ्गमहापुराणे उत्तरभागे विष्णुभक्तकथनं नाम चतुर्थो ऽध्यायः
iti śrīliṅgamahāpurāṇe uttarabhāge viṣṇubhaktakathanaṃ nāma caturtho 'dhyāyaḥ

