10 shlokas
- 1
सनत्कुमार उवाच
गोसहस्रप्रदानं च वदामि शृणु सुव्रत
गवां सहस्रमादाय सवत्सं सगुणं शुभम्
sanatkumāra uvāca
gosahasrapradānaṃ ca vadāmi śṛṇu suvrata
gavāṃ sahasramādāya savatsaṃ saguṇaṃ śubham
- 2
तास्त्व् अभ्यर्च्य यथाशास्त्रम् अष्टौ सम्यक्प्रयत्नतः
तासां शृङ्गाणि हेम्नाथ प्रतिनिष्केण बन्धयेत्
tāstv abhyarcya yathāśāstram aṣṭau samyakprayatnataḥ
tāsāṃ śṛṅgāṇi hemnātha pratiniṣkeṇa bandhayet
- 3
खुरांश्च रजतेनैव बन्धयेत्कण्ठदेशतः
प्रतिनिष्केण कर्तव्यं कर्णे वज्रं च शोभनम्
khurāṃśca rajatenaiva bandhayetkaṇṭhadeśataḥ
pratiniṣkeṇa kartavyaṃ karṇe vajraṃ ca śobhanam
- 4
शिवाय दद्याद्विप्रेभ्यो दक्षिणां च पृथक्पृथक्
दशनिष्कं तदर्धं वा तस्यार्धार्धम् अथापि वा
śivāya dadyādviprebhyo dakṣiṇāṃ ca pṛthakpṛthak
daśaniṣkaṃ tadardhaṃ vā tasyārdhārdham athāpi vā
- 5
यथाविभवविस्तारं निष्कमात्रमथापि वा
वस्त्रयुग्मं च दातव्यं पृथग्विप्रेषु शोभनम्
yathāvibhavavistāraṃ niṣkamātramathāpi vā
vastrayugmaṃ ca dātavyaṃ pṛthagvipreṣu śobhanam
- 6
गावश्चाराध्य यत्नेन दातव्याः सुमनोरमाः
एवं दत्त्वा विधानेन शिवमभ्यर्च्य शंकरम्
gāvaścārādhya yatnena dātavyāḥ sumanoramāḥ
evaṃ dattvā vidhānena śivamabhyarcya śaṃkaram
- 7
जपेदग्रे यथान्यायं गवां स्तवमनुत्तमम्
गावो ममाग्रतो नित्यं गावो नः पृष्ठतस्तथा
japedagre yathānyāyaṃ gavāṃ stavamanuttamam
gāvo mamāgrato nityaṃ gāvo naḥ pṛṣṭhatastathā
- 8
हृदये मे सदा गावो गवां मध्ये वसाम्य् अहम्
इति कृत्वा द्विजाग्र्येभ्यो दत्त्वा गत्वा प्रदक्षिणम्
hṛdaye me sadā gāvo gavāṃ madhye vasāmy aham
iti kṛtvā dvijāgryebhyo dattvā gatvā pradakṣiṇam
- 9
तद्रोमवर्षसंख्यानि स्वर्गलोके महीयते
tadromavarṣasaṃkhyāni svargaloke mahīyate
- 10
इति श्रीलिङ्गमहापुराणे उत्तरभागे गोसहस्रप्रदानं नामाष्टत्रिंशो ऽध्यायः
iti śrīliṅgamahāpurāṇe uttarabhāge gosahasrapradānaṃ nāmāṣṭatriṃśo 'dhyāyaḥ

