36 shlokas
- 1
सूत उवाच
त्रियंबकेण मन्त्रेण देवदेवं त्रियंबकम्
पूजयेद्बाणलिङ्गे वा स्वयम्भूते ऽपि वा पुनः
sūta uvāca
triyaṃbakeṇa mantreṇa devadevaṃ triyaṃbakam
pūjayedbāṇaliṅge vā svayambhūte 'pi vā punaḥ
- 2
आयुर्वेदविदैर्वापि यथावदनुपूर्वशः
अष्टोत्तरसहस्रेण पुण्डरीकेण शङ्करम्
āyurvedavidairvāpi yathāvadanupūrvaśaḥ
aṣṭottarasahasreṇa puṇḍarīkeṇa śaṅkaram
- 3
कमलेन सहस्रेण तथा नीलोत्पलेन वा
सम्पूज्य पायसं दत्त्वा सघृतं चौदनं पुनः
kamalena sahasreṇa tathā nīlotpalena vā
sampūjya pāyasaṃ dattvā saghṛtaṃ caudanaṃ punaḥ
- 4
मुद्गान्नं मधुना युक्तं भक्ष्याणि सुरभीणि च
अग्नौ होमश्च विपुलो यथावदनुपूर्वशः
mudgānnaṃ madhunā yuktaṃ bhakṣyāṇi surabhīṇi ca
agnau homaśca vipulo yathāvadanupūrvaśaḥ
- 5
पूर्वोक्तैरपि पुष्पैश्च चरुणा च विशेषतः
जपेद्वै नियुतं सम्यक्समाप्य च यथाक्रमम्
pūrvoktairapi puṣpaiśca caruṇā ca viśeṣataḥ
japedvai niyutaṃ samyaksamāpya ca yathākramam
- 6
ब्राह्मणानां सहस्रं च भोजयेद्वै सदक्षिणम्
गवां सहस्रं दत्त्वा तु हिरण्यमपि दापयेत्
brāhmaṇānāṃ sahasraṃ ca bhojayedvai sadakṣiṇam
gavāṃ sahasraṃ dattvā tu hiraṇyamapi dāpayet
- 7
एतद्वः कथितं सर्वं सरहस्यं समासतः
शिवेन देवदेवेन शर्वेणात्युग्रशूलिना
etadvaḥ kathitaṃ sarvaṃ sarahasyaṃ samāsataḥ
śivena devadevena śarveṇātyugraśūlinā
- 8
कथितं मेरुशिखरे स्कन्दायामिततेजसे
स्कन्देन देवदेवेन ब्रह्मपुत्राय धीमते
kathitaṃ meruśikhare skandāyāmitatejase
skandena devadevena brahmaputrāya dhīmate
- 9
साक्षात्सनत्कुमारेण सर्वलोकहितैषिणा
पाराशर्याय कथितं पारंपर्यक्रमागतम्
sākṣātsanatkumāreṇa sarvalokahitaiṣiṇā
pārāśaryāya kathitaṃ pāraṃparyakramāgatam
- 10
शुके गते परं धाम दृष्ट्वा रुद्रं त्रियंबकम्
गतशोको महाभागो व्यासः पर ऋषिः प्रभुः
śuke gate paraṃ dhāma dṛṣṭvā rudraṃ triyaṃbakam
gataśoko mahābhāgo vyāsaḥ para ṛṣiḥ prabhuḥ
- 11
स्कन्दस्य संभवं श्रुत्वा स्थिताय च महात्मने
त्रियंबकस्य माहात्म्यं मन्त्रस्य च विशेषतः
skandasya saṃbhavaṃ śrutvā sthitāya ca mahātmane
triyaṃbakasya māhātmyaṃ mantrasya ca viśeṣataḥ
- 12
कथितं बहुधा तस्मै कृष्णद्वैपायनाय वै
तत्सर्वं कथयिष्यामि प्रसादादेव तस्य वै
kathitaṃ bahudhā tasmai kṛṣṇadvaipāyanāya vai
tatsarvaṃ kathayiṣyāmi prasādādeva tasya vai
- 13
देवं सम्पूज्य विधिना जपेन्मन्त्रं त्रियंबकम्
मुच्यते सर्पपापैश्च सप्तजन्मकृतैरपि
devaṃ sampūjya vidhinā japenmantraṃ triyaṃbakam
mucyate sarpapāpaiśca saptajanmakṛtairapi
- 14
संग्रामे तत्सर्वं लब्ध्वा सौभाग्यमतुलं भवेत्
लक्षहोमेन राज्यार्थी राज्यं लब्ध्वा सुखी भवेत्
saṃgrāme tatsarvaṃ labdhvā saubhāgyamatulaṃ bhavet
lakṣahomena rājyārthī rājyaṃ labdhvā sukhī bhavet
- 15
पुत्रार्थी पुत्रमाप्नोति नियुतेन न संशयः
धनार्थी प्रयुतेनैव जपेदेव न संशयः
putrārthī putramāpnoti niyutena na saṃśayaḥ
dhanārthī prayutenaiva japedeva na saṃśayaḥ
- 16
धनधान्यादिभिः सर्वैः सम्पूर्णः सर्वमङ्गलैः
क्रीडते पुत्रपौत्रैश्च मृतः स्वर्गे प्रजायते
dhanadhānyādibhiḥ sarvaiḥ sampūrṇaḥ sarvamaṅgalaiḥ
krīḍate putrapautraiśca mṛtaḥ svarge prajāyate
- 17
नानेन सदृशो मन्त्रो लोके वेदे च सुव्रताः
तस्मात्त्रियंबकं देवं तेन नित्यं प्रपूजयेत्
nānena sadṛśo mantro loke vede ca suvratāḥ
tasmāttriyaṃbakaṃ devaṃ tena nityaṃ prapūjayet
- 18
अग्निष्टोमस्य यज्ञस्य फलमष्टगुणं भवेत्
त्रयाणामपि लोकानां गुणानामपि यः प्रभुः
agniṣṭomasya yajñasya phalamaṣṭaguṇaṃ bhavet
trayāṇāmapi lokānāṃ guṇānāmapi yaḥ prabhuḥ
- 19
वेदानामपि देवानां ब्रह्मक्षत्रविशामपि
अकारोकारमकाराणां मात्राणामपि वाचकः
vedānāmapi devānāṃ brahmakṣatraviśāmapi
akārokāramakārāṇāṃ mātrāṇāmapi vācakaḥ
- 20
तथा सोमस्य सूर्यस्य वह्नेरग्नित्रयस्य च
अंबा उमा महादेवो ह्यम्बकस्तु त्रियंबकः
tathā somasya sūryasya vahneragnitrayasya ca
aṃbā umā mahādevo hyambakastu triyaṃbakaḥ
- 21
सुपुष्पितस्य वृक्षस्य यथा गन्धः सुशोभनः
वाति दूरात्तथा तस्य गन्धः शंभोर्महात्मनः
supuṣpitasya vṛkṣasya yathā gandhaḥ suśobhanaḥ
vāti dūrāttathā tasya gandhaḥ śaṃbhormahātmanaḥ
- 22
तस्मात्सुगन्धो भगवान्गन्धारयति शङ्करः
गान्धारश्च महादेवो देवानामपि लीलया
tasmātsugandho bhagavāngandhārayati śaṅkaraḥ
gāndhāraśca mahādevo devānāmapi līlayā
- 23
सुगन्धस्तस्य लोके ऽस्मिन्वायुर्वाति नभस्तले
तस्मात्सुगन्धिस्तं देवं सुगन्धि पुष्टिवर्धनम्
sugandhastasya loke 'sminvāyurvāti nabhastale
tasmātsugandhistaṃ devaṃ sugandhi puṣṭivardhanam
- 24
यस्य रेतः पुरा शंभोर्हरेर्योनौ प्रतिष्ठितम्
तस्य वीर्यादभूदण्डं हिरण्मयम् अजोद्भवम्
yasya retaḥ purā śaṃbhorhareryonau pratiṣṭhitam
tasya vīryādabhūdaṇḍaṃ hiraṇmayam ajodbhavam
- 25
चन्द्रादित्यौ सनक्षत्रौ भूर्भुवः स्वर्महस्तपः
सत्यलोकमतिक्रम्य पुष्टिर्वीर्यस्य तस्य वै
candrādityau sanakṣatrau bhūrbhuvaḥ svarmahastapaḥ
satyalokamatikramya puṣṭirvīryasya tasya vai
- 26
पञ्चभूतान्यहङ्कारो बुद्धिः प्रकृतिरेव च
पुष्टिर्बीजस्य तस्यैव तस्माद्वै पुष्टिवर्धनः
pañcabhūtānyahaṅkāro buddhiḥ prakṛtireva ca
puṣṭirbījasya tasyaiva tasmādvai puṣṭivardhanaḥ
- 27
तं पुष्टिवर्धनं देवं घृतेन पयसा तथा
मधुना यवगोधूममाषबिल्वफलेन च
taṃ puṣṭivardhanaṃ devaṃ ghṛtena payasā tathā
madhunā yavagodhūmamāṣabilvaphalena ca
- 28
कुमुदार्कशमीपत्रगौरसर्षपशालिभिः
हुत्वा लिङ्गे यथान्यायं भक्त्या देवं यजामहे
kumudārkaśamīpatragaurasarṣapaśālibhiḥ
hutvā liṅge yathānyāyaṃ bhaktyā devaṃ yajāmahe
- 29
ऋतेनानेन मां पाशाद्बन्धनात्कर्मयोगतः
मृत्योश्च बन्धनाच्चैव मुक्षीय भव तेजसा
ṛtenānena māṃ pāśādbandhanātkarmayogataḥ
mṛtyośca bandhanāccaiva mukṣīya bhava tejasā
- 30
उर्वारुकाणां पक्वानां यथा कालादभूत्पुनः
तथैव कालः सम्प्राप्तो मनुना तेन यत्नतः
urvārukāṇāṃ pakvānāṃ yathā kālādabhūtpunaḥ
tathaiva kālaḥ samprāpto manunā tena yatnataḥ

